​អ្នកតបណ្ដាញទឹក​ជីកផ្លូវហើយ​ ទុកចោល​មិនធ្វើឱ្យស្អាតដូចដើម​

អ្នកធ្វើដំណើរប្រតិកម្ម ​និងក្រុមមនុស្សជីកផ្លូវ តបណ្តាញទឹកស្អាតបង្កឲ្យខូចផ្លូវរួចទុកចោល​។ វាជាទម្លាប់របស់ក្រុមមនុស្សមួយចំនួនតូចដែលគេដឹងថា ក្រុមការងារមកពីស្ថាប័នរដ្ឋាករទឹកបានជីក​កកាយផ្លូវដ៏រលោងស្អាតដើម្បីតបណ្ដាញទឹកស្អាតប៉ុន្តែពេលជីកកកាយរួចគឺគ្រាន់តែកាយដីលុប​ពីលើ​ដោយ​ពុំបានអ៊ុតបេតុងឲ្យល្អដូចដើមវិញឡើយ។

ជាក់ស្តែងលើផ្លូវបេតុងមួយខ្សែស្ថិតនៅភូមិ អូរអណ្តូង១ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ ត្រូវបានក្រុមជំនាញតបណ្តាញទឹកស្អាតបានចុះមកកាត់ផ្លូវបេតុងឆ្អឹង​ដែក​ដើម្បីតបណ្តាញទឹកស្អាត​ពេលតបណ្តាញរួចបែរជាគ្រាន់តែកាយដីលុបរួចចេញទៅបាត់។

​តាមប្រភពពីបងប្រុស សុន សុជាតិ រស់នៅសង្កាត់ព្រែកប្រាបានឲ្យដឹងថា​ វាមិនគួរឲ្យមាន​មនុស្ស​មក​ជីកកាត់ផ្លូវរួចទុកចោលដែលបង្កឲ្យអ្នកធ្វើដំណើរបើក​បរយានយន្តធ្លាក់ជង្ហុក​ជួបគ្រោះថ្នាក់​ចរាចរណ៍ទៀតផង។ ហើយសកម្មភាពបំផ្លាញផ្លូវបែបនេះគឺតែងតែឃើញញឹកញាប់ណាស់។

ទាក់ទិនទៅនឹងករណីជីកផ្លូវបេតុងបង្កឲ្យខូចខាតនេះលោក គុយ គឹមហ៊ាង នាយករងរដ្ឋបាល​សាលាខណ្ឌច្បារអំពៅទទួលបន្ទុកសាធារណការ និងធ្វើការស្នើសុំទៅអង្គភាពរដ្ឋាករទឹកឲ្យមកជួសជុលផ្លូវដែលជីកតបណ្តាញទឹកឲ្យល្អស្អាតដូចដើមវិញ៕​

អត្ថបទ៖ នរា