ផ្លូវមាត់សមុទ្រ កំពង់ផែ «កោះទន្សាយ» ស្ថាបនាបានប្រមាណ ៩៥ ភាគរយ

នាថ្ងៃទី ១៧ ខែមករា ឆ្នាំ ២០២៤ នេះ អភិបាលខេត្តកែប បានលើកឡើងឱ្យដឹងថា ផ្លូវប្របមាត់សមុទ្រ ដែលមានប្រវែង ជាង ១២ គីឡូម៉ែត្រ ស្ថាបនាពីទីក្រុងកែប ចំណុចផែកោះទន្សាយ ឆ្ពោះទៅតំបន់អង្កោល កាត់តាមបណ្តោយមាត់សមុទ្រ បើគិតមកទល់ពេលនេះ បានសម្រេចការស្ថាបនារបស់ខ្លួនក្នុងលទ្ធផលប្រមាណ ៩៥ ភាគរយហើយ បើតាមគម្រោង ផ្លូវនេះ នឹងសម្រេចរួចរាល់ជាស្ថាពរនាពេលឆាប់ៗ ខាងមុខ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក សោម ពិសិដ្ឋ អភិបាលខេត្តកែប បានមានប្រសាសន៍បញ្ជាក់ឱ្យដឹងថា ផ្លូវប្របមាត់សមុទ្រនេះជាការស្ថាបនាថ្មីសុទ្ធសាទ តាមរយៈការចុះដោះស្រាយផលប៉ះពាល់នានា ដែលជាប់គាំងប្រមាណជាង ៦ ឆ្នាំ រហូតមានការស្រុះស្រួលគ្នារវាងពលរដ្ឋ និងអាជ្ញាធរ ទើបទទួលបានសមិទ្ធផលថ្មីដូចពេលនេះ ហើយបច្ចប្បន្នឃើញថា ការក្រាលកៅស៊ូបានសម្រេចរួចរាល់ ហើយការស្ថាបនាផ្លវូថ្មើរជើង និងជិះកង់ ក៏ជិតរួចរាល់ហើយដែរ។

លោក សោម ពិសិដ្ឋ បានមានប្រសាសន៍បន្ថែមថា ការស្ថាបនាផ្លូវដែលជាសសៃឈាមទេសចរណ៍ដ៏មានសារៈសំខាន់នេះ គឺស្របតាមគោលនយោបាយរបស់រាជរដ្ឋាភិបាលតាំងពីអាណត្តិមុន រហូតមកដល់អាណត្តិថ្មីនេះ ក្រោមការដឹកនាំរបស់ សម្តេចធិបតី ហ៊ុន ម៉ាណែត ដែល សម្តេច តែងតែជំរុញឱ្យទូទាំងរាជធានី-ខេត្ត ពង្រីកនូវសក្តានុពលទេសចរណ៍របស់ខ្លួន តាមរយៈការខិតខំរួមគ្នារបស់ថ្នាក់ដឹកនាំ ខេត្តកែប បានលេចចេញនូវសមិទ្ធផលធំៗជាច្រើន ហើយសមិទ្ធផលទាំងនោះ បានរួមចំណែកទាញចំណូលបន្ថែមដល់ប្រជាពលរដ្ឋផងដែរ៕

អត្ថបទ ៖ សឹង រ៉ាត់