ព័ត៌មានជាតិ

ចូលឆ្នាំចិន-វៀតណាម៣ថ្ងៃឆ្នាំ២០២១ខេត្តរតនគិរីមានការធ្លាក់ចុះភ្ញៀវទេសចរ២៩.០៧%

បានផុស

៥ years មុន

នៅ

ថ្ងៃចន្ទ ១៥ កុម្ភៈ ២០២១

ដោយ

នៅក្នុងរយៈពេល៣ថ្ងៃ(១២-១៣-១៤កុម្ភៈឆ្នាំ២០២១)នៃពិធីបុណ្យចូលឆ្នាំចិន-វៀតណាម មានភ្ញៀវ ទេសចរជាតិ-អន្តរជាតិសរុបចំនួន១២,៦៨៩នាក់ ក្នុងនោះភ្ញៀវអន្តរជាតិមានចំនួន៦៤នាក់ ភ្ញៀវជាតិ១២,៦២៥នាក់ គឺមានការធ្លាក់ចុះ២៩.០៧%។

ភ្ញៀវជាតិធ្លាក់ចុះ២៨.២៣% ភ្ញៀវអន្តរជាតិធ្លាក់ចុះ៧៨.៦០% បើប្រៀបធៀបនិងបុណ្យចូលឆ្នាំចិន-វៀតណាមឆ្នាំ២០២០ មានចំនួន១៧,៨៩០នាក់។ នេះបើតាមតួរលេខមន្ទីរទេសចរណ៍បានបង្ហាញឲ្យដឹងនៅរសៀលថ្ងៃទី១៤ ខែកុម្ភៈ ឆ្នាំ២០២១នេះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ង៉ែត ពិទូ ប្រធានមន្ទីរទេសចរណ៍ខេត្តរតនគិរីបានឲ្យដឹងថា គិតត្រឹមល្ងាចថ្ងៃទី១៤ ខែកុម្ភៈ ឆ្នាំ២០២១នេះ កត្តាធំបំផុតដែលនាំអោយភ្ញៀវទេសចរមានការធ្លាក់ចុះបណ្តាលមកពីប្រជាពលរដ្ឋមានការព្រួយបារម្ភពីជំងឺកូវីដ-១៩ ជាពិសេសច្រកទ្វារអន្តរជាតិនានាត្រូវបានបិទការចេញចូលទាំងស្រុងដើម្បីបង្ការទប់ស្កាត់ជំងឺកូវីដ-១៩ផងដែរ។

លោកបន្តថា ភ្ញៀវបានមកទស្សនាកម្សាន្តតាមរមណីយដ្ឋាននៅក្នុងខេត្តរតនគិរីមានចំនួន១៤កន្លែងសុទ្ធសឹងជារមណីយដ្ឋានធម្មជាតិ។ ហើយរមណីយដ្ឋានដែលពេញនិយមនិងមានភ្ញៀវទេសចរទៅលេងកម្សាន្តយ៉ាងច្រើននោះ គឺបឹងយក្ខឡោម ក្នុងក្រុងបានលុង រមណីយដ្ឋានទឹកធ្លាក់អូរសៀងលែ,រមណីយដ្ឋានបឹងលំកុដ ក្នុងស្រុកលំផាត់ ក្រៅពីរមណីយដ្ឋានធម្មជាតិទាំងបីកន្លែងនេះ ក៏មានរមណីដ្ឋានដទៃទៀតដែរដែលមានភ្ញៀវទេសចរជាតិ និងអន្តរជាតិ ទៅលេងកម្សាន្តយ៉ាងច្រើនកុះករ ។

លោកបន្តថា រយៈពេល៣ថ្ងៃនេះ គ្រប់រមណីយដ្ឋានដែលភ្ញៀវបានទៅលេងកម្សាន្ត លោកសង្កេតឃើញថា ភ្ញៀវទេសចរទាំងអស់បានចូលរួមថែរក្សាអនាម័យបរិស្ថានបានល្អ ពោលគឺក្រោយហូបចុករួចពួកគាត់បានវេចខ្ចប់សំរាមទុកដាក់បានត្រឹមត្រូវ។ ជាពិសេសនោះគឺពួកគាត់មានស្មារតីម្ចាស់ការចូលរួមការពារទប់ស្កាត់ជំងឺកូវីដ-១៩ តាមរយៈការចូលខ្លួនឲ្យបាញ់កម្ដៅការលាងសម្អាតដៃនៅតាមឡាបូសាធារណៈ ដែលបានរៀបចំជូននៅតាមរមណីយដ្ឋាននានា ការពាក់ម៉ាស និងការរក្សាគម្លាតសង្គមជាដើម។

លោក ង៉ែត ពិទូ បានថ្លែងអំណរគុណយ៉ាងជ្រាលជ្រៅចំពោះភ្ញៀវទេសចរជាតិ-អន្តរជាតិ ដែលបានមកលេងកម្សាន្តក្នុងទឹកដីខេត្តរតនគិរី ជាពិសេសម្ចាស់ផ្ទះសំណាក់ សណ្ឋាគារ និងម្ចាស់សេវាកម្មម្ហូបអាហារទាំងអស់ដែលបានចូលរួមជាមួយអាជ្ញាធរខេត្តក្នុងការរឹតបន្តឹងវិធានការអនាម័យតាមការណែនាំរបស់ក្រសួងសុខាភិបាល ដើម្បីបង្ការកុំឲ្យមាននៃការរាតត្បាតជំងឺកូវីដ-១៩។

ជាមួយគ្នានេះ លោកក៏សូមថ្លែងអំណរគុណផងដែរចំពោះសមត្ថកិច្ចពាក់ព័ន្ធដែលបានបំពេញតួនាទីភារកិច្ចចូលរួមថែរក្សាការពារសន្តិសុខ សណ្តាប់ធ្នាប់សាធារណៈ ទាំងយប់ទាំងថ្ងៃជូនភ្ញៀវទេសចរជាតិ-អន្តរជាតិបានយ៉ាងល្អប្រសើរ៕

អត្ថបទ ៖ វុទ្ធឦសាន