ពលរដ្ឋ និងអាជ្ញាធរ រួមគ្នាធ្វើស្ពានឈើថ្មី នៅអូរផ្កាដកព័រសម្រួលការធ្វើដំណើរ

អាជ្ញាធរ និងប្រជាពលរដ្ឋភូមិញើន ឃុំស្តៅ ស្រុកសេសាន ខេត្តស្ទឹងត្រែង បានប្រមូលកម្លាំងគ្នា និងចូលជាថវិកា សាងសង់ស្ពានថ្មី អូរផ្កាដកព័រ ដើម្បីតភ្ជាប់ផ្លូវគមនាគមន៍មួយនេះសម្រាប់សិស្សានុសិស្សទៅកាន់សាលារៀន និងបម្រើឱ្យការដឹកជញ្ជូនផលកសិកម្មឱ្យមានតម្លៃទីផ្សារកើនឡើង។  

លោក អ៊ិត តាន់ តំណាងក្រុមបច្ចេកទេសសាងសង់ស្ពាននេះបានបញ្ជាក់ថា៖ នេះជាតម្រូវការដែលបងប្អូនមិនអាចខ្វះបាន ព្រោះបច្ចុប្បន្នប្រទេសកម្ពុជាមានការវិវឌ្ឍន៍រីកចម្រើន ពីទីក្រុងឈានមកទីជនបទ ប្រជាពលរដ្ឋក៍មានជីវភាព ធូរធារ។

លោកបន្តថា៖ នៅថ្ងៃនេះលោកអភិបាលស្រុកសេសានមកដល់ ក៏សំណូមពរឱ្យជួយសម្ភារៈដែលនៅខ្វះ សម្រាប់ដំណើរការ​សាងសង់ស្ពាននេះ ព្រោះក្រុមការងារជំរុញការសាងសង់ឱ្យហើយឆាប់ នៅមុនថ្ងៃចូលឆ្នាំប្រពៃណីខ្មែរយើង អញ្ចឹងការសាងសង់ស្ពាននេះនៅខ្វះខាត ទីមួយគឺប៊ូឡុង ទី២គឺក្តារ។  

លោក សុវណ្ណ ពិសេដ្ឋ អភិបាលស្រុកសេសាន បានបញ្ជាក់ថា៖ ស្ពាននេះពិតជាបានបម្រើផលប្រយោជន៍ទាំងអស់គ្នា  ហើយការខិតខំប្រឹងប្រែងរបស់បងប្អូនប្រជាជនយើងក៏បានបង្ហាញពីកម្លាំងសាមគ្គី ចំណាយទាំងកម្លាំងកាយ កម្លាំងចិត្ត ថវិកា និងពេលវេលា ដើម្បីរួមគ្នាដោះស្រាយ បញ្ហាលំបាក ប្រឈម នៅមូលដ្ឋានដែលស្ថិតនៅឆ្ងាយដាច់ស្រយាល ពីកន្លែងមួយទៅកន្លែងមួយទៀត។

លោកបន្តថា៖ នៅតំបន់នេះបងប្អូនប្រជាពលរដ្ឋ យើងភាគច្រើនរស់នៅរាយប៉ាយពីគ្នាហើយនៅតាមបណ្ដោយផ្លូវមានអូរច្រើន តម្រូវឱ្យយើងសាងសង់ស្ពានទើបអាជ្ញាធរ សហគមន៍ និងប្រជាពលរដ្ឋ បានពិភាក្សារួមគ្នា ដោះស្រាយបញ្ហានេះ ហើយយើងសាងសង់ស្ពាននេះឡើងក្នុងគោលបំណងដឹកកសិផលទៅកាន់ទីផ្សារ ទី២ ដើម្បីងាយស្រួលក្នុងការធ្វើដំណើររបស់សិស្សានុសិស្សទៅរៀនប្រជាជនទៅទទួលយកសេវាសាធារណៈ ដូចជាសេវាសុខាភិបាល សេវាអប់រំ   ហើយ និងសេវារដ្ឋបាលផ្សេងៗទៀត។ 

សូមបញ្ចាក់ថា៖ ស្ពានឈើ ថ្មីនេះមានប្រវែង២៧ម៉ែត្រ ទទឹង៦ម៉ែត្រ បានសាងសង់ឡើងពីឈើគ្រាក់ធំៗ ដើម្បីធានាដល់ការប្រើប្រាស់បានយូរអង្វែង និងទុកជាមរតកសម្រាប់អ្នកជំនាន់ក្រោយផងទោះបីថា កសាងឡើងមិនមានជាងជាវិស្វករអីក៏ពិតមែន ប៉ុន្តែវាជាទឹកចិត្តរបស់បងប្អូនប្រជាសហគមន៍របស់យើង៕

​អត្ថបទ៖ ងិនលីម​