សម្តេចតេជោ ហ៊ុន សែន សម្រេចជួយកសាងកុដិ-ទិញដីពង្រីកវត្តសម្រាប់ព្រះសង្ឃ និងកូននេនសីហា

សម្តេចតេជោ ហ៊ុន សែន ប្រធានក្រុមឧត្តមប្រឹក្សាផ្ទាល់ព្រះមហាក្សត្រ បានសម្រេចចិត្តជួយកសាងកុដិ និងទិញដីពង្រីកវត្តប្រគេនព្រះសង្ឃ និងព្រះអង្គ សីហា។

សម្តេចតេជោ បានសរសេរនៅលើហ្វេសប៊ុកផ្លូវការដូច្នេះថា«ព្រឹកមិញ បានជួបកូនអួន សារ៉ាត់ដែលជាអ្នកផ្សព្វផ្សាយពីកូននេនសីហា។ ចំណុចសំខាន់តើត្រូវជួយកូន នេនសីហា របៀបណា? និងការជួយកសាងកុដិសម្រាប់ព្រះសង្ឃគង់នៅ និងទិញដីបន្ថែមដើម្បីពង្រីកនិងកសាងវត្ត»។

សំណេរសម្តេចតេជោ បានលើកឡើងទៀត «ខ្ញុំនឹងចាត់ឱ្យតំណាងរបស់ខ្ញុំទៅជួបព្រះចៅអធិការវត្ត និងកូននេន សីហា ដោយរួមដំណើរជាមួយ អួន សារ៉ាត់ ដើម្បីពិភាក្សាដោះស្រាយជាក់ស្តែង»។

សម្តេចតេជោ អតីតនាយករដ្ឋមន្រ្តី ក៏បានអរគុណលោក អួន សារ៉ាត់ ដែលបានជួយផ្សព្វផ្សាយពីកូននេន សីហា និងសូមអរគុណសប្បុរសជន ដែលបានជួយដល់កូននេន សីហាដើម្បីកសាងព្រះវិហារ និងសូមអំពាវនាវសូមបន្តជួយរហូតរួចរាល់នូវព្រះវិហារនេះ។

សម្តេចតេជោ បានអះអាងថា នឹងទទួលខុសត្រូវលើការជាវដីពង្រីកវត្ត និងកសាងកុដិសម្រាប់ព្រះសង្ឃគង់នៅ៕