បង្ក្រាបរថយន្ដដឹកប្រហិត​២​តោនគ្មានច្បាប់អនុញ្ញាតនាំចូលពីប្រទេសថៃ

កម្លាំងការិយាល័យនគរបាលប្រឆាំងបទល្មើសសេដ្ឋកិច្ច បានធ្វើបង្ក្រាបឃាត់រថយន្តម៉ាក Ssang Young Istana មួយគ្រឿងលួចដឹកប្រហិតចម្រុះចំនួន២០០០គីឡូក្រាមគ្មានច្បាប់អនុញ្ញាតចេញពីតំបន់សនៃព្រំដែនថៃ។ ការបង្ក្រាបនេះបានធ្វើឡើងកាលពិថ្ងៃទី៦ ខែកុម្ភៈ ឆ្នាំ២០២៤ នៅចំណុចដីឡូតិ៍គ្មានលេខ សង្កាត់កាកាប១ ខណ្ឌពោធិ៍សែនជ័យ។

តាមរបាយការណ៍របស់អគ្គស្នងការដ្ឋាននគរបាលជាតិបានឲ្យដឹងថា រថយន្ដដែលត្រូវឃាត់ម៉ាក Ssang Young Istana ពណ៌ប្រាក់ ពាក់ផ្លាកលេខ ភ្នំពេញ 2T-6216 ដឹកផលិតផល ប្រហិតចម្រុះ ចំនួន២០០០គីឡូក្រាមគ្មានសុវត្ថិភាព និងមិនអនុលោមភាពផ្នែកបទដ្ឋានព័ត៌មានលក្ខខណ្ឌតម្រូវម្ហូបអាហារដោយគ្មានច្បាប់អនុញ្ញាត ពីតំបន់សនៃព្រំដែនថៃ។

ក្រោយពីបង្ក្រាប កម្លាំងការិយាល័យនគរបាលប្រឆាំងបទល្មើសសេដ្ឋកិច្ច បានប្រគល់រថយន្ត និងផលិតផលប្រហិតចម្រុះខាងលើ ជូនអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការ ក្លែងបន្លំ សាខា ក.ប.ប. រាជធានីភ្នំពេញ ដើម្បីយកទៅបំផ្លាញចោលតាមនីតិវិធី៕