អភិបាលស្រុកសន្ទុក ណែនាំយុវសិស្សត្រូវគិតពីសុខភាព និងអនាគត ចៀសឆ្ងាយគ្រឿងញៀន

លោក ឡង គីសឹង អភិបាល និងជាប្រធានគណកម្មាធិការត្រួតពិនិត្យគ្រឿងញៀន ស្រុកសន្ទុក បានណែនាំសិស្សានុសិស្សទាំងអស់ត្រូវគិតពីសុខភាព និងអនាគត ដោយចៀសឆ្ងាយពីគ្រឿងញៀន។ ការថ្លែងនេះ ធ្វើឡើងក្នុងឱកាសលោកចូលរួមកម្មវិធី ផ្សព្វផ្សាយការងារក្មេងទំនើង គ្រឿងញៀន និងគ្រោះថ្នាក់ចរាចរណ៍ នៅ វិទ្យាល័យតាំងក្រសាំង ស្រុកសន្ទុក ខេត្តកំពង់ធំ នាព្រឹកថ្ងៃ៧ ខែកុម្ភៈ ឆ្នាំ២០២៤។

ថ្លែងក្នុងនាម លោក ងួន រតន: អភិបាល និងជាប្រធានគណកម្មាធិការត្រួតពិនិត្យគ្រឿងញៀខេត្តកំពង់ធំ លោក ឡង គីសឹង បានកោតសសើរ អរគុណដល់គ្រប់សមាសភាពទាំងអស់របស់ស្រុក ដែលបានរួមគ្នាចូលរួមអនុវត្តនូវគោលនយោបាយ ភូមិឃុំមានសុវត្ថិភាព និងផែនការយុទ្ធនាការប្រយុទ្ធប្រឆាំងគ្រឿងញៀនខុសច្បាប់ និងបទបញ្ជាផ្សេងៗសំដៅរក្សាបាននូវសុខសន្តិភាព សន្តិសុខ និងសណ្តាប់ធ្នាប់នៅមូលដ្ឋានដោះស្រាយរាល់ក្តីកង្វល់របស់ប្រជាពលរដ្ឋ។

លោក ឡង គីសឹង បានថ្លែងបន្តដោយសំណូមពរដល់គ្រប់សមាសភាពទាំងអស់ ត្រូវបន្តការងាររបស់ខ្លួន ហើយយុវជនទាំងអស់ត្រូវចៀសឱ្យយផុតពីអបាយទាំង៣ ពិសេសគ្រឿងញៀនដើម្បីមានសុខភាពល្អ អនាគតភ្លឺស្វាង ក្លាយជាធនធាន​មានប្រយោជន៍ដល់ក្រុមគ្រួសារ និងសហគមន៍។

គួរបញ្ជាក់ថា រាជរដ្ឋាភិបាលនីតិកាលទី៧ ដឹកនាំដោយ សម្តេចមហាបវរធិបតី ហ៊ុន ម៉ាណែត បានចាត់ទុកការងារប្រយុទ្ធប្រឆាំងគ្រឿងញៀនជាការងារអាទិភាព ហើយប្រជាពលរដ្ឋគ្រប់ស្រទាប់ត្រូវតែបានយល់ដឹង ដើម្បីឱ្យពួកគាត់ចៀសចាកឆ្ងាយបានបញ្ហាគ្រឿងញៀន៕