ដកបញ្ឈរជើងមេគយតំបន់៥ ព្រោះហេតុផលមួយ

មេគយចល័តតំបន់៥លោក ឈួន សោភាត្រូវបានដកបញ្ឈរជើងបណ្តោះអាសន្នបន្ទាប់ពីរងការរិះគន់ខ្លាំងៗរឿងចាប់រថយន្តអង្គភាពយោធាការពារព្រំដែនដែលបើកដោយលោក នាង រិទ្ធិឆ័យ អនុសេនីយ៍ត្រីដែលជាទាហានការពារព្រំដែនខេត្តបន្ទាយមានជ័យ ដែលបានធ្វើឲ្យទាហានរូបនេះតូចិត្តរត់ទៅចងកសម្លាប់ខ្លួន។

ប្រភព័ត៌មានពីអគ្គនាយកដ្ឋានគយ និងរដ្ឋាករបានឲ្យដឹងថាលោក ឈួន សោភាត្រូវបានដកចេញពីតំណែង ដើម្បីស៊ើបស្រាវជ្រាវរករឿងពិត ដោយដាក់ជំនួសឲ្យលោក យឹម ផល្លីធ្វើជាប្រធានស្តីទី។

ក្រសួងការពារជាតិបានបញ្ជូនក្រុមការងារចុះស្រាវជ្រាវ ហើយរកឃើញថារថយន្តដែលគយចល័តតំបន់៥ចាប់នោះពិត​ជារថយន្តរបស់អង្គភាពដែលបានចុះបញ្ជីនៅអគ្គនាយកដ្ឋានសំភារៈ បច្ចេកទេសក្រសួងការពារជាតិប្រាកដមែន។

សូមរំឭកថា លោកអនុសេនីយ៍ត្រី នាង រិទ្ធិឆ័យ កាលពីថ្ងៃទី ១០ ខែកុម្ភៈ បានជួបគ្រោះថ្នាក់ចរាចរក្រោយមលោកបានដោះស្រាយរួចរាល់ហើយយករថយន្តទៅជួសជុលដោយខ្ចីលុយគេទៅធ្វើ លុះជួសជុលរថយន្តហើយមកអង្គភាពវិញ មិនបានពាក់ស្លាលេខដោយសាទើបចេញពីកន្លែងជួសជុល ក៏ត្រូវគយចល័តតំបន់៥ចាប់យករថយន្ត ទោះបីជាអង្គភាពបានស្នើសុំធានា នឹងមានឯកសារត្រឹមត្រូវ ក៏ខាងគយចល័តមិនព្រមឲ្យ ធ្វើឲ្យលោកអនុសេនីយ៍ត្រី នាង រិទ្ធិឆ័យ តូចិត្តបានសម្រេចចិត្តចងក សម្លាប់ខ្លួនឯងកាលពីព្រឹកថ្ងៃទី១០​ ខែកុម្ភៈ​ ឆ្នាំ២០២១ កន្លងទៅ​នេះ៕

អត្ថបទ៖ ឡេង ដេត