លោក ពៅ សុខ ៖ សៀវភៅ សម្តេច ហ៊ុន សែន និងបេសកកម្ម​បញ្ចប់សង្រ្កាម​នៅកម្ពុជា នឹងត្រូវបញ្ចប់​ក្នុងពេលឆាប់ៗនេះ

លោក ពៅ សុខ សមាជិកក្រុមប្រឹក្សាភិបាលសមាគមអ្នកនិពន្ធខ្មែរ និងជាទីប្រឹក្សាផ្ទាល់សម្តេច​មហាបវរ​ធិបតី ហ៊ុន ម៉ាណែត មានប្រសាសន៍ថា ក្នុងឆាប់ៗឆាងមុខនេះ លោកនឹងបញ្ចប់​វណ្ណ​កម្មថ្មីមួយទៀត គឺសៀវភៅមានចំណងជើងថា (សម្តេច ហ៊ុន សែន និងបេសកកម្មបញ្ចប់សង្រ្កាម​នៅ​កម្ពុជា)។

លោក ពៅ សុខ មានប្រសាសន៍បន្តថា សៀវភៅនេះ គឺនិយាយតែពីសកម្មភាពស្វែង​រកការចរ​ចា​សន្តិភាព​របស់សម្តេចតេជោ ហ៊ុន សែន ចន្លោះពីចុងឆ្នាំ ១៩៨៧ ដល់ចុងឆ្នាំ ១៩៩៨ ជាថ្ងៃដែល​សម្តេចតេជោ ហ៊ុន សែន ប្រកាសប្រាប់ពិភពលោកដោយចំហថា សង្រ្គាមនៅកម្ពុជា ត្រូវបាន​បញ្ចប់ជាស្ថាពរហើយ វិថីសន្តិភាព និង​ការអភិវឌ្ឍ បានមានវត្តមាននៅកម្ពុជា។

លោក ពៅ សុខ បញ្ជាក់ថា បន្ទាប់ពីការស្រាវជ្រាវរយៈពេលច្រើនឆ្នាំរួចមក លោកឃើញថា ទម្រាំ​កម្ពុជា​ទទួល​បាននូវសុខសន្តិភាពពេញលេញទូទាំងប្រទេស កម្ពុជាប្រែក្លាយពីប្រទេសដែល​មាន​តំបន់ត្រួតត្រា ៤ មក​ជាព្រះរាជាណាចក្រមួយ ដែលមានព្រះមហាក្សត្រតែមួយ រដ្ឋធម្មនុញ្ញតែមួយ ដែនដីតែមួយ រដ្ឋបាល​តែ​មួយ សម្តេចតេជោ ហ៊ុន សែន បានប្រថុយគ្រោះថ្នាក់ចំនួន ៤ ករណី ដែលទីមួយនៅពេលសម្តេច សម្រេច​ចិត្ត​បើកផ្លូវ និងស្វះស្វែងរកឲ្យមានការចរចា ឬជំនួបលើកទី ១ ហ៊ុន សែន-សីហនុ នៅហ្វ៊ែរអង់តាដឺន័រ ទី ២ ការធ្វើ​កំណែទម្រង់សេដ្ឋកិច្ច ទី ៣ ការធ្វើកំណែទម្រង់ដីធ្លី ទី ៤ ការធ្វើកំណែទម្រង់របបនយោបាយ។

ក្នុងនោះ ការផ្លាស់ប្តូរឈ្មោះប្រទេសពីសាធារណរដ្ឋប្រជាមានិតកម្ពុជា ទៅជា (រដ្ឋកម្ពុជា) នៅថ្ងៃទី ៣០ ខែមេសា ឆ្នាំ ​១៩៨៩ ការកែប្រែ ឬធ្វើវិសោធនកម្មរដ្ឋធម្មនុញ្ញ ការកែប្រែទង់ជាតិ និងភ្លេងជាតិជាដើម។

លោក ពៅ សុខ អះអាងថា ករណីទាំងនេះ សុទ្ធតែជាការប្រថុយគ្រោះថ្នាក់ដល់អាយុជីវិតរបស់​សម្តេចទាំង​អស់។ ប៉ុន្តែ នៅពេលនោះសម្តេច ដែលស្ថិតនៅជាឯកឧត្តមនៅឡើយ តែងតែមាន​ប្រសាសន៍ប្រាប់អ្នកកាសែ​ត​ថា សម្តេចមិនខ្លាចនឹងលះបង់ឡើយ ឲ្យតែប្រជាជនកម្ពុជាបានសុខ ឲ្យតែប្រទេសកម្ពុជាមានសុខសន្តិភាព ឲ្យតែអាចបញ្ចប់ការបង្ហូរឈាមប្រជាជនកម្ពុជាបាន។

លោក ពៅ សុខ បានលើកឡើងទៀតថា តាមការអះអាងរបស់​លោក ​ចម ប្រសិទ្ធ ដែលប្រាប់អ្នក​កាសែត​បរទេស​នៅអំឡុងពេលនោះ គឺសម្តេចតេជោ ហ៊ុន សែន ត្រូវបាន​គេ​ប៉ុន​ប៉ងធ្វើឃាត​ជា​ច្រើនលើក តែមិនបានសម្រេច ហើយសម្តេចកម្រនឹងពាក់អាវក្រោះដើម្បីការពារខ្លួន ដោយ​សម្តេច​មានប្រសាសន៍ប្រាប់បាងកកប៉ុស្តិ៍ថា ប្រជាជនកម្ពុជាគ្រប់ទីកន្លែង ជាអាវក្រោះរបស់សម្តេច ជាអាវ​ក្រោះ​ការពារសម្តេច។ សម្តេច តែងតែបន្លំខ្លួនទៅខ្ចីម៉ូតូអ្នកស្រុកជិះ ដើម្បីស្វែង​រកតម្រូវ ការ​ពិត​របស់ប្រជាជនក្នុង​មូលដ្ឋាន ជាជាងស្តាប់របាយការណ៍មន្រ្តីមូលដ្ឋាន។ សម្តេចតេជោ គឺជា​មនុស្ស​ប្រាកដនិយម ឬជាក់ស្តែង​និយម និងជឿជាក់និយមម្នាក់៕