អភិបាលខេត្តកំពង់ចាម ណែនាំឱ្យពលរដ្ឋ និង​ស្ថាប័ន ប្រុងប្រយ័ត្ន និងចូលរួមបង្ការ ទប់ស្កាត់គ្រោះអគ្គិភ័យ

អភិបាលខេត្តកំពង់ចាម លោក អ៊ុន ចាន់ដា បានណែនាំដល់អង្គភាព ស្ថាប័ននានា និងប្រជាពលរដ្ឋ ឱ្យមានស្មារតីប្រុងប្រយ័ត្នខ្ពស់ ក្នុងការចូលរួមបង្ការ និងទប់ស្កាត់គ្រោះអគ្គិភ័យ។ លោកបានណែនាំបែបនេះ ក្នុងពិធីប្រារព្ធទិវាបង្ការ និងពន្លត់អគ្គីភ័យ នៅទីលានព្រលានយន្តហោះចាស់ ស្ថិតក្នុងភូមិព្រសំ ឃុំរអាង ស្រុកកំពង់សៀម នៅព្រឹកថ្ងៃទី២១ ខែកុម្ភៈ ឆ្នាំ២០២៤។

លោកអភិបាលខេត្ត បានលើកឡើងថា សម្រាប់ប្រជាពលរដ្ឋ និយោជិត និយោជក និងយុវជនគ្រប់រូប ត្រូវមានស្មារតីប្រុងប្រយ័ត្នខ្ពស់ក្នុងការចូលរួមបង្ការទប់ស្កាត់គ្រោះអគ្គិភ័យ ព្រោះការងារបង្ការទប់ស្កាត់គ្រោះអគ្គិភ័យ​ មិនមែនជាកាតព្វកិច្ចរបស់នណារម្នាក់នោះទេ ប៉ុន្តែ វា គឺជាកាតព្វកិច្ចទាំអស់គ្នា។ ម្យ៉ាងទៀត លោកថា នៅគ្រប់លំនៅដ្ឋានទាំងអស់ គួរតែមានឧបករណ៍បង្ការពន្លត់អគ្គិភ័យ និងត្រូវត្រៀមឧបករណ៍សម្ភារៈសាមញ្ញៗ ដូចជាភួយ ខ្សាច់ មានទឹកបម្រុងទុកពេញពាង បើមានទុយោទឹក ម៉ូទ័របូមទឹក ម៉ាស៊ីនបូមបាញ់ទឹកកាន់តែប្រសើរ សម្រាប់ពន្លត់នៅពេលដែលមានភ្លើងឆេះគ្រាដំបូង។

បន្ថែមពីនេះ លោកបានអំពាវនាវ ឱ្យមានការប្រុងប្រយ័ត្ននូវបញ្ហាភ្លើងផ្សែងតាមរយៈការប្រើប្រាស់ភ្លើងចង្ក្រាន ការដុត​ទៀន ធូប ចរន្តអគ្គិសនី ជាតិគីមី ឧស្ម័នផ្ទុះ (ចង្ក្រានហ្គាស និងកំប៉ុងហ្គាស)ជាដើម។ ប្រសិនបើមានគ្រោះអគ្គិភ័យ ឬហានិភ័យផ្សេងៗកើតឡើង សូមប្រញ៉ាប់រាយការណ៍ទៅអាជ្ញាធរមានសមត្ថកិច្ច ដែលនៅជិតបំផុត ដើម្បីសមត្ថកិច្ចជំនាញជួយអន្តរាគមន៍បានទាន់ពេលវេលា និងមានប្រសិទ្ធភាព។

ជាមួយគ្នានេះ លោកអភិបាលខេត្ត ក៏បានសម្តែងការកោតសរសើរនូវការយកចិត្តទុកដាក់ខ្ពស់របស់កម្លាំងនៃស្នងការដ្ឋាននគរបាលខេត្ត ដែលបានអន្តរាគមន៍ទាន់ពេលវេលា និងការគ្រប់គ្រងបានយ៉ាងឆាប់រហ័សលើបញ្ហាអគ្គិភ័យ នាពេលកន្លងមក។ គួរជម្រាបថា ការប្រារព្ធទិវានេះ ក៏មានការបង្ហាញរបស់មន្ត្រីការិយាល័យ នគរបាលជំនាញ អំពីវិធីសាស្ត្រងាយៗ ក្នុងការទប់ស្កាត់ ពន្លត់អគ្គិភ័យ ដែលអាចឱ្យប្រជាពលរដ្ឋ សង្គ្រោះខ្លួនឯងជាបឋមផងដែរ៕

 អត្ថបទ និង រូបភាព៖ ឡេក ចាន់ពេជ្រ