រដ្ឋមន្ត្រីសុខាភិបាលស្នើអង្គការ UNFPA ពង្រីកសកម្មភាពសេវាសុខភាពមាតា និងសុខភាពបន្តពូជនៅតំបន់ភាគឦសាន

លោកសាស្ត្រាចារ្យ ឈាង រ៉ា រដ្ឋមន្ត្រីក្រសួងសុខាភិបាល បានស្នើដល់អង្គការ UNFPA ជួយពង្រីកសកម្មភាពសេវាសុខភាពមាតា និងសុខភាពបន្តពូជវ័យជំទង់ និងយុវជននៅតំបន់ភាគឦសានដើម្បីឈានទៅសម្រេចបាននូវការគ្របដណ្តប់សុខភាពជាសកល។

នៅក្នុងជំនួបពិភាក្សាការងារជាមួយលោកវេជ្ជបណ្ឌិត Aleksandar Sasha Bodiroza នាយករងប្រចាំតំបន់អាស៊ី
របស់មូលនិធិសហប្រជាជាតិសម្រាប់ប្រជាជន(UNFPA)កាលពីរសៀលថ្ងៃទី២១កុម្ភៈនៅទីស្តីការក្រសួង លោករដ្ឋមន្ត្រីបានសំណូមពរ UNFPA បន្តរក្សា និងពង្រីកគោលដៅសកម្មភាពការងារដែល UNFPA កំពុងជួយនៅខេត្តទាំង ៨ នៃតំបន់ភាគឦសាន ដោយសារខេត្តទាំងនេះមានតម្រូវការសេវាសុខភាពមាតា និងសុខភាពបន្តពូជ និងវ័យជំទង់ និងយុវជនដោយសូមគិតដល់ការរួមបញ្ជូលសេវាថែទាំសុខភាពបឋមផងដែរ ជាពិសេសជួយរកទិន្នន័យក្រុមជនងាយរងគ្រោះដែលមិនបានទទួលសេវាសុខភាពដើមី្បជួយសម្រួលក្នុងការផ្តល់សេវាថែទាំសុខភាពជូនពួកគាត់។

ជាមួយគ្នានេះដែរលោករដ្ឋមន្ត្រី បានស្នើដល់អង្គការ UNFPA បន្តជួយបណ្តុះបណ្តាលឆ្មប ទាំងមុនបម្រើការងារ និងកំពុងបម្រើការងារការងារកោសល្យវិច្ឆ័យវេជ្ជសាស្ត្រពង្រឹងសំណុំសេវាសុខភាពអប្បបរមាដំបូងសម្រាប់សុខភាពបន្តពូជ
និងសុខភាពផ្លូវភេទក្នុងគ្រាមានគ្រោះអាសន្ន និងគ្រោះមហន្តរាយដើមី្បរួមគ្នាលើកកម្ពស់សុខុមាលភាពរបស់ប្រជាជនកម្ពុជាដើម្បីឈានទៅសម្រេចបាននូវការគ្របដណ្តប់សុខភាពជាសកលស្របតាមផែនការយុទ្ធសាស្រ្តបញ្ចកោណ នៃរាជរដ្ឋាភិបាល អាណត្តិទី៧។

លោកវេជ្ជបណ្ឌិត  Aleksandar Sasha Bodiroza នាយករងប្រចាំតំបន់បានលើកឡើងថាUNFPA បានចាប់ផ្តើមការងារនៅកម្ពុជាតាំងពីឆ្នាំ១៩៩៤ ដោយមានការគាំទ្រពីរាជរដ្ឋាភិបាលកម្ពុជា ក្រោមការសម្របសម្រួលរបស់
ក្រុមប្រឹក្សាអភិវឌ្ឍន៍កម្ពុជាបានសហការជាមួយក្រសួងសុខាភិបាលលើកម្មវិធីសុខភាពបន្តពូជ សុខភាពផ្លូវភេទ
ផែនការគ្រួសារ ការងារពាក់ព័ន្ធនឹងហឹង្សាផ្អែកលើយេនឌ័រព្រមទាំងបានសហការជាមួយក្រសួងពាក់ព័ន្ធផ្សេងៗរបស់រាជរដ្ឋាភិបាល និងអង្គការជាតិ-អន្តរជាតិ ឈានទៅសម្រេច SDG មុនកាលបរិច្ឆេទកំណត់៕

អត្ថបទ៖ សំអឿន