ព័ត៌មានជាតិ

នាយកប្រតិបត្តិក្រុមហ៊ុនអាមេរិក ប្រកាសជំហរជំរុញកំណើនពាណិជ្ជកម្ម និងការវិនិយោគរវាងកម្ពុជា-អាមេរិក

បានផុស

២ years មុន

នៅ

ថ្ងៃអង្គារ ២៧ កុម្ភៈ ២០២៤

ដោយ

ចំពោះមុខលោក ស៊ុន ចាន់ថុល អនុប្រធានទី១ ក្រុមព្រឹក្សាអភិវឌ្ឍន៍កម្ពុជា លោក Jim Jones នាយកប្រតិបត្តិនៃក្រុមហ៊ុន Jones Group International បានអះអាងពីការត្រៀមខ្លួន ដើម្បីជួយជំរុញកំណើនពាណិជ្ជកម្ម និងការវិនិយោគទ្វេភាគីកម្ពុជា-សហរដ្ឋអាមេរិក ឲ្យកាន់តែរីកចម្រើនថែមមួយកម្រិតទៀត។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងជំនួបពិភាក្សាការងារដើម្បីពិនិត្យលើចក្ខុវិស័យស្នូល ជំរុញកំណើនពាណិជ្ជកម្ម និងការវិនិយោគរវាង កម្ពុជា-សហរដ្ឋអាមេរិក នាថ្ងៃទី២៦ ខែកុម្ភៈ ម្សិលមិញនេះ លោក Jim Jones បានលើកឡើងថា ក្នុងរយៈពេលប៉ុន្មានឆ្នាំចុងក្រោយនេះ លោកបានសង្កេតឃើញពីភាពរីកចម្រើនជាបន្តបន្ទាប់នៅក្នុងប្រទេសកម្ពុជា។ ជាងនេះទៀត អ្វីដែលគួរឲ្យចាប់អារម្មណ៍ គឺការដាក់ចេញរបស់រាជរដ្ឋាភិបាលក្នុងការប្រែក្លាយប្រទេសកម្ពុជា ទៅជាប្រទេសដែលមានចំណូលមធ្យមកម្រិតខ្ពស់ក្នុងឆ្នាំ២០៣០ ព្រមទាំងទិសដៅប្រែក្លាយកម្ពុជាពីប្រទេសប្រើប្រាស់កម្លាំងពលកម្មទៅជាប្រទេសប្រើប្រាស់ជំនាញបច្ចេកទេស និងផែនការរៀបចំឲ្យមានការអភិវឌ្ឍន៍ហេដ្ឋារចនាសម្ព័ន្ធប្រើប្រាស់បច្ចេកវិទ្យាទំនើបជាដើម។

នាយកប្រតិបត្តិក្រុមហ៊ុនអាមេរិករូបនេះបានគូសបញ្ជាក់បន្ថែមពីការត្រៀមខ្លួនដើម្បីជួយជំរុញឲ្យមានការកើនឡើងនូវពាណិជ្ជកម្ម និងការវិនិយោគរវាងប្រទេសទាំងពីរ និងជឿជាក់ថាតាមរយៈពាណិជ្ជកម្ម និងការវិនិយោគ នឹងជំរុញឲ្យទំនាក់ទំនងទ្វេភាគីរវាងកម្ពុជា និងសហរដ្ឋអាមេរិក កាន់តែល្អកើនឡើងមួយកម្រិតទៀត។

ស្របពេលជាមួយគ្នានោះ ដើម្បីធ្វើឲ្យកាន់តែស៊ីជម្រៅនូវទំនាក់ទំនងទ្វេភាគី និងជំរុញកំណើនពាណិជ្ជកម្ម និងការវិនិយោគ រវាងប្រទេសទាំងពីរ លោក ស៊ុន ចាន់ថុល ក៏បានលើកឡើងនូវគោលដៅជាយុទ្ធសាស្ត្រគំនិតផ្ដួចផ្ដើមផ្សេងៗដូចជា ការបង្កើនកិច្ចសម្របសម្រួលពាណិជ្ជកម្មឲ្យរលូន រួមមានបង្កភាពងាយស្រួលលើនីតិវិធីគយ កាត់បន្ថយរបាំងពាណិជ្ជកម្ម និងបទប្បញ្ញត្តិរដ្ឋបាល, លើកកម្ពស់តម្រូវការទីផ្សារ តាមរយៈការពង្រីក និងបញ្ជ្រៀតទីផ្សារសម្រាប់ផលិតផលកម្ពុជា (Made in Cambodia) ឬការចរចាកិច្ចព្រមព្រៀងពាណិជ្ជកម្មដូចជា កិច្ចព្រមព្រៀងពាណិជ្ជកម្មសេរីទ្វេភាគី (FTA) ឬការពង្រឹងពាណិជ្ជកម្មដែលមានស្រាប់, បន្ថែមពីនោះ សហរដ្ឋអាមេរិកក៏អាចគាំទ្រការវិនិយោគរបស់កម្ពុជា តាមរយៈគំនិតផ្ដួចផ្ដើមដូចជាជំនួយបច្ចេកទេស ការកសាងសមត្ថភាព និងសកម្មភាពលើកកម្ពស់ និងផ្សព្វផ្សាយការវិនិយោគជាដើម៕

Related Topics:លោក ស៊ុន ចាន់ថុល

សេចក្ដីជូនដំណឹង៦ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា