ដំណើរការចាក់វ៉ាក់សាំងគ្រូពេទ្យជួរមុខ និងកងកម្លាំងនៅព្រំដែន នឹងបន្តដល់ដំណាច់ខែនេះ

ក្រសួងសុខាភិបាលកំពុងដំណើរការចាក់វ៉ាក់សាំងការពារជំងឺកូវីដ១៩ដល់គ្រូពេទ្យជួរមុខនិងកងកម្លាំងប្រដាប់អាវុធនៅតាមខេត្តជាប់ព្រំដែនកម្ពុជាថៃ និងវៀតណាម។

លោក ស្រី ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល មានប្រសាសន៍នៅក្នុងសន្និសីទសារព័ត៌មាន នៅព្រឹកថ្ងៃទី ១៩ ខែកុម្ភៈនេះថា មុនចុះចាក់វ៉ាក់សាំងដល់ក្រុមជួរមុខនៅតាមបណ្តាខេត្តជាប់ព្រំដែនកម្ពុជាថៃនិងវៀតណាមនេះក្រសួងបានបណ្តុះបណ្តាលទៅតាមក្យួនខ្នាតបច្ចេកទេស ត្រឹមត្រូវដល់ក្រុមការងារចាក់ថ្នាំបង្ការប្រមាណជាង៣០០នាក់ចាប់ពីថ្ងៃទី១៦រហូតដល់បំណាច់ខែកម្ភៈឆ្នាំ២០២១នេះ។

លោកស្រីបានបន្តទៀតថាការចាក់វ៉ាក់សាំងនេះគឺធ្វើទៅតាមដំណាក់កាលនីមួយៗដោយសារតែវ៉ាក់សាំងដែលក្រសួងទទួលបាននៅមានកម្រិតនៅឡើយដែលទាមទារឲ្យក្រសួងត្រូវជ្រើសរើសរកក្រុមមនុស្សជួរមុខចាក់មុនជាលើកទី១និងទុកសម្រាប់ចាក់លើកទី២ជាបន្តទៀត។

លោកស្រីបានបន្ថែមថាសម្រាប់ចាក់លើកទី១នេះគឺក្រសួងចា ក់ទៅលើមនុស្សចំនួនតែ១៤៩៥០០នាក់ទេក្នុងចំណោមវ៉ាក់សាំងដែលទទួលបានដំបូង៣០ម៉ឺនដូសដែលភាគីចិនផ្តល់ឲ្យសម្រាប់ក្រសួងសុខាភិបាល។ចំណែកវ៉ាក់សាំងដែលនៅសល់ក្រសួងទុកសម្រាប់ចាក់ជាលើកទី២ដល់អ្នកបានចាក់លើកទី១រួចហើយ។

លោកស្រីបានបញ្ជាក់ថាគិតចាប់ពីថ្ងៃទី១០ រហូតដល់ថ្ងៃទី១៨ ខែកុម្ភៈ ឆ្នាំ២០២១ក្រសួងបានចាក់វ៉ាក់សាំងកូវីដ១៩ ស៊ីណូហ្វាមរបស់ចិន ជូនជនស៊ីវិលបានចំនួន ៣,៨០៣នាក់ហើយ ក្នុងនោះស្ត្រីមានចំនួន ១,២៥៩នាក់ក្នុងចំណោមអ្នកដែលស្ម័គ្រចិត្តមកចាក់វ៉ាក់សាំងសរុប ៤,៦៦៩នាក់ក្នុងនោះតែអ្នកដែលគ្រូពេទ្យមិនអនុញ្ញាតឱ្យចាក់មានចំនួន ៨៦៦នាក់៕

អត្ថបទ៖សំអឿន