សម្ដេច ហ៊ុន​ សែន៖ កម្ពុជា​មិនល្ងង់ទៅយកកងទ័ពចិន មកដាក់លើទឹកដីរបស់ខ្លួនឡើយ

ជាថ្មីម្ដងទៀត ប្រតិកម្មតបនឹងការលើកឡើងថា គម្រោងព្រែកជីកហ្វូណនតេជោរបស់កម្ពុជា សាងសង់ឡើងដើម្បីបម្រើឱ្យវិស័យយោធារបស់ចិននោះ សម្ដេចតេជោ ហ៊ុន សែន បានប្រកាសថា កម្ពុជា មិនល្ងង់ទៅដល់យកកងទ័ពចិន មកដាក់លើទឹកដីរបស់ខ្លួនឡើយ។

ថ្លែងចេញពីវេទិកានៃជំនួបជាមួយសមាគមឧកញ៉ាកម្ពុជា នាយប់ថ្ងៃទី២៦ ខែមេសា ឆ្នាំ២០២៤នេះ សម្ដេចតេជោ ហ៊ុន សែន ថ្នាក់ដឹកនាំកំពូលនៃកម្ពុជា បានឆ្លើយតបទៅវិញដូច្នេះថា «តើកម្ពុជាត្រូវការប្រើប្រាស់កងទ័ពចិនដើម្បីអ្វី?… កម្ពុជា មិនល្ងង់ទៅដល់យកកងទ័ពចិន មកដាក់លើទឹកដីរបស់ខ្លួន ផ្ទុយនឹងរដ្ឋធម្មនុញ្ញរបស់ខ្លួនឯងទេ»។ សម្ដេចតេជោ បន្តថា ចិន ក៏មិនល្ងង់នឹងយកកងទ័ពមកដាក់ចោលក្នុងប្រទេសកម្ពុជា ដែលផ្ទុយនឹងគោលការណ៍គោរពឯករាជ្យ អធិបតេយ្យភាពរបស់កម្ពុជានោះដែរ។

សម្ដេចតេជោ បានប្រាប់ទៅកាន់ក្រុមមតិប្រឆាំងទាំងនោះថា កម្ពុជា មិនអនុញ្ញាតឡើយឱ្យបានវត្តមានកងទ័ពបរទេសនៅលើទឹកដីរបស់ខ្លួន លើកលែងតែមានការផ្លាស់ប្ដុរអនុព័ន្ធយោធា ក៏ដូចជាតាមរយៈការធ្វើសមយុទ្ធមិត្តភាពរួមគ្នាជាមួយគ្នា។ សម្ដេចតេជោ សង្កត់ធ្ងន់ដូច្នេះថា៖ «សូមក្រុមជ្រុលនិយម ប្រមាថមើលងាយមកលើកម្ពុជា កងទ័ពបរទេសណាទាំងអស់ មិនអាចមកឈរជើងស្រុកខ្មែរបានទេ លើកលែងតែអនុព័ន្ធយោធាមកនៅចុះ ខ្ញុំដាក់ទៅប្រទេសអ្នកឯង អ្នកឯងដាក់មកប្រទេសខ្ញុំ»៕