ពលរដ្ឋ គ្រូបង្រៀន យុវជន និងអាជ្ញាធរ ប្រកាសគាំទ្រ «គម្រោងព្រែកជីកហ្វូណនតេជោ»

ប្រជាពលរដ្ឋ លោកគ្រូ អ្នកគ្រូ យុវជន និងអាជ្ញាធរនៅខណ្ឌព្រែកព្នៅ បានប្រកាសគាំទ្រ «គម្រោងព្រែកជីកហ្វូណន តេជោ» ដោយមើលឃើញយ៉ាងច្បាស់ថា គម្រោងព្រែកជីកនេះ នឹងផ្ដល់ផលប្រយោជន៍ជាច្រើនដល់សង្គម-សេដ្ឋកិច្ចរបស់កម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

គម្រោងព្រែកជីកហ្វូណនតេជោ គឺជាព្រែកជីកប្រវត្តិសាស្ត្រលើកទី១ នៅកម្ពុជា ដែលជាគំនិតផ្តួចផ្តើមរបស់សម្តេចតេជោ ហ៊ុន សែន អតីតនាយករដ្ឋមន្ត្រី និងជាប្រធានព្រឹទ្ធសភានៃកម្ពុជា ហើយបច្ចុប្បន្ន សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានបន្តស្នាដៃ និងជំរុញបន្ថែម ក្នុងការអភិវឌ្ឍគម្រោងព្រែកជីកហ្វូណនតេជោនេះឱ្យសម្រេចបាននាពេលអនាគត ហើយតាមការគ្រោងទុក គម្រោងបើកការដ្ឋានសាងសង់ នឹងចាប់ផ្ដើមនៅចុងឆ្នាំ២០២៤ ឬដើមឆ្នាំ២០២៥ ខាងមុខ។

ប្រជាពលរដ្ឋ លោកគ្រូ អ្នកគ្រូ យុវជន និងអាជ្ញាធរ បានបង្ហាញការជឿជាក់ចំពោះការដឹកនាំរបស់រាជរដ្ឋភិបាល ចាប់តាំងពីអាណត្តិដឹកនាំដោយសម្ដេចតេជោ ហ៊ុន សែន អតីតនាយករដ្ឋមន្រ្ដី និងនៅអាណត្តិនេះ ក្រោមការដឹកនាំដោយសម្ដេចធិបតី ហ៊ុន ម៉ាណែត ជានាយករដ្ឋមន្រ្ដី នឹងធ្វើឱ្យគម្រោងព្រែកជីកហ្វូណនតេជោនេះ ជាផលប្រយោជន៍ ជាប្រវត្តិសាស្រ្ដ សម្រាប់ប្រទេសកម្ពុជាបន្ថែមទៀត។

គម្រោងព្រែកជីកហ្វូណនតេជោ តភ្ជាប់ផ្លូវទឹករវាងទន្លេទៅកាន់សមុទ្រកម្ពុជា ដោយឆ្លងកាត់ខេត្តកណ្តាល តាកែវ កំពត និងខេត្តកែប ដែលមានប្រវែង១៨០គីឡូម៉ែត្រ។ ប្រជាពលរដ្ឋ លោកគ្រូ អ្នកគ្រូ យុវជន និងអាជ្ញាធរ លើកឡើងថា ព្រែកជីកហ្វូណនតេជោ នឹងផ្តល់អត្ថប្រយោជន៍ដ៏មហាសាលដល់កម្ពុជា ជាពិសេសវិស័យដឹកជញ្ជូន ដូចជា កាត់បន្ថយតម្លៃដឹកជញ្ជូន កាត់បន្ថយពេលវេលា ចម្ងាយ ការខូចខាតផ្លូវថ្នល់ ការកកស្ទះចរាចរណ៍ គ្រោះថ្នាក់ចរាចរណ៍ ក៏ដូចជាកាត់បន្ថយនីតិវិធីសម្រាប់នាវា និង បែបបទក្នុងការឆ្លងកាត់ទំនិញពីកម្ពុជាទៅសមុទ្រ។

លើសពីនេះ បង្កើតជាតំបន់ពាណិជ្ជកម្ម តំបន់សេដ្ឋកិច្ចពិសេស ការអភិវឌ្ឍផែរណបថ្មីៗជាច្រើន ការពង្រីកតំបន់អភិវឌ្ឍន៍កសិកម្ម ធារាសាស្ត្រ វារីវប្បកម្ម ទេសចរណ៍ ជួយរំដោះទឹកជំនន់ក្នុងរដូវវស្សា ជួយបង្កើនផលត្រីទឹកសាបនៅតាមព្រែក អចលនទ្រព្យ និងការវិនិយោគផ្សេងៗ ជាដើម។ និយាយជារួម គម្រោងព្រែកជីកហ្វូណនតេជោនេះ គឺជាគម្រោងបម្រើផលប្រយោជន៍ ជាតិដ៏ធំធេង ជាពិសេស ផ្នែកសេដ្ឋកិច្ច-សង្គមនៅកម្ពុជា៕