ព័ត៌មានជាតិ

សម្តេចធិបតី៖ មេដឹកនាំអនាគតកម្ពុជាទាំងអស់ ត្រូវជៀសវាងការចូលរួមផែនការនយោបាយដែលជំរុញការផ្លាស់ប្តូររបបដោយវិធីសាស្រ្តមិនប្រជាធិបតេយ្យ

បានផុស

២ years មុន

នៅ

ថ្ងៃចន្ទ ២០ ឧសភា ២០២៤

ដោយ

នាពិធីបើកសន្និសីទស្តីអំពី “អនាគតកម្ពុជាគ្មានអំពើប្រល័យពូជសាសន៍” នៅថ្ងៃទី២០ ខែឧសភានេះ សម្តេចធិបតី នាយករដ្ឋមន្រ្តី ហ៊ុន ម៉ាណែត បានក្រើនរំឭកដល់មេដឹកនាំអនាគតរបស់កម្ពុជាទាំងអស់ ត្រូវជៀសវាងការចូលរួមផែនការនយោបាយដែលជំរុញការផ្លាស់ប្តូររបបដោយវិធីសាស្រ្តមិនប្រជាធិបតេយ្យ ហើយត្រូវតែការពារសន្តិភាពដែលសម្រេចបានដោយលំបាកបំផុតនេះឱ្យខានតែបាន ទោះក្នុងតម្លៃណាក៏ដោយ។

នាឱកាសនេះ សម្តេចធិបតី គូសបញ្ជាក់ថា ការការពារសន្តិភាព មិនមែនជាកាតព្វកិច្ចសម្រាប់តែប្រជាជាតិកម្ពុជាតែប៉ុណ្ណោះទេ ប៉ុន្តែវាជាកាតព្វកិច្ចសម្រាប់សហគមន៍អន្តរជាតិទាំងមូលដែលយើងឃើញថាសង្គ្រាមនៅទូទាំងពិភពលោក មិនដែលផ្តល់ផលល្អសម្រាប់ប្រជាជាតិណាមួយក្នុងសាកលលោកនោះទេ។ ជាសត្យានុម័ត សង្គ្រាមគឺជាស្ថានការណ៍ដែលបង្កឱ្យមានការសម្លាប់រង្គាលជនស៊ីវិល ដោយសារតែការប្រយុទ្ធគ្នារបស់ក្រុមប្រដាប់អាវុធ ហើយនៅពេលដែលសង្គ្រាមកើតឡើង គ្មានឡើយសិទ្ធិមនុស្ស គ្មានឡើយប្រជាធិបតេយ្យ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សម្តេចធិបតីសង្កត់ធ្ងន់ថា៖«ដូច្នេះ នេះជាការទទួលខុសត្រូវរបស់រដ្ឋ និងប្រជាជនទាំងអស់គ្នាក្នុងការការពារសន្តិភាពនិងការឱ្យតម្លៃដល់សន្តិភាពដែលសម្រេចបានមកជាមួយនូវការលះបង់មិនអាចកាត់ថ្លៃបាន ដោយមិនត្រូវយល់ច្រឡំថាសន្តិភាពបានមកដោយឯកឯងនោះទេ។មេដឹកនាំអនាគតរបស់កម្ពុជាទាំងអស់ត្រូវជៀសវាងពីការចូលរួមផែនការនយោបាយដែលជំរុញការផ្លាស់ប្តូររបបដោយវិធីសាស្រ្តមិនប្រជាធិបតេយ្យ ហើយត្រូវតែប្រកាន់ខ្ជាប់នូវមនសិកានៃការទទួលខុសត្រូវក្នុងការការពារសន្តិភាពឱ្យខានតែបាន»។

នាយករដ្ឋមន្រ្តីកម្ពុជា ថ្លែងទៀតថា ឈរលើគោលការណ៍ដែលមានចែងក្នុងរដ្ឋធម្មនុញ្ញកម្ពុជា និងធម្មនុញ្ញនៃអង្គការសហប្រជាជាតិ កម្ពុជានឹងបន្តអនុវត្តគោលនយោបាយការបរទេសឯករាជ្យផ្អែកលើច្បាប់ កសាងទំនាក់ទំនង និងកិច្ចសហប្រតិបត្តិការល្អរវាងកម្ពុជាជាមួយប្រទេសទាំងអស់ក្នុងពិភពលោក និងជាមួយអង្គការអន្តរជាតិនានាព្រមទាំងនឹងបន្តចូលរួមយ៉ាងសកម្មក្នុងបុព្វហេតុសន្តិភាព ស្ថិរភាព សន្តិសុខ និងវិបុលភាពក្នុងតំបន់ និងពិភពលោក។
សម្តេចធិបតីថ្លែងយ៉ាងដូច្នេះថា៖« យើងនឹងបន្តការពារខ្លួនប្រឆាំងនឹងការប្រឌិតដែលមានចេតនាអាក្រក់នៅក្នុងគោលដៅបង្ខូចកេរ្តិ៍ឈ្មោះរបស់កម្ពុជានិងប្រឆាំងរាល់ការប៉ុនប៉ងទាំងឡាយដែលចង់ធ្វើឱ្យកម្ពុជាធ្លាក់ចូលអន្ទាក់ប្រកួតប្រជែងក្នុងភូមិសាស្រ្តនយោបាយហើយប្រែក្លាយកម្ពុជាឱ្យទៅជាសមរភូមិនៃសង្គ្រាមត្រជាក់សារជាថ្មីម្តងទៀត»៕