កំពង់ផែសេះសខេត្តកែប សម្រេចការសាងសង់ ៩០ភាគរយ មានសមត្ថភាពផ្ទុកទំនិញបានដល់ ៨ពាន់តោន

នាថ្ងៃទី២៧ ខែឧសភា ឆ្នាំ២០២៤ លោក កូវ គឹមហាក់ តំណាងឱ្យក្រុមហ៊ុន ដែលបានសាងសង់កំពង់ផែសេះសដឹកជញ្ជូនទំនិញកម្រិតធន់ធ្ងន់របស់ខេត្តកែបជាប្រវត្តិសាស្រ្ត ដែលមានសមត្ថភាពក្នុងការដឹកជញ្ជូនទំនិញបានពី ៥ពាន់តោនដល់៨ពាន់តោនបានទៀតផង។

ចាប់តាំងពីដំណើរការសាងសង់រហូតមកទល់ពេលនេះ ចំណតជលយានសេះស ឬ កំពង់ផែសេះស សម្រេចការសាងសង់របស់ខ្លួនក្នុងរង្វង់ប្រមាណ ៩០% ហើយគ្រោងនឹងបញ្ចប់ក្នុងពេលឆាប់ៗនេះ។

លោក កូវ គឹមហាក់ តំណាងក្រុមហ៊ុនបានឲ្យដឹងទៀតថា យើងបានអនុវត្តគម្រោងសាងសង់កំពង់ផែសស នេះអស់រយៈពេល២ឆ្នាំមកហើយ ក្នុងនោះសម្រេចបានលទ្ធផលនៅក្នុងរង្វង់ប្រមាណ ៩០% ហើយដែរ។ ក្នុងនោះយើងសម្រេចបាន ក្នុងការចាក់ដី និងឈូសឆាយបំពេញទីលានកំពង់ផែ សាងសង់ផែប៉េតុង ដោយបានចាក់គ្រឹះ រៀបជញ្ជាំងទប់ដី និងធ្នឹមប្រវែង ការចាក់ប៉េតុងលើទីលានផែ និងជួសជុលផ្លូវសម្រាប់ចូលកំពង់ផែ មានប្រវែង ២.០០០ម៉ែត្រ ជាមួយការសាង​សង់ទីស្នាក់ការកំពង់ផែ ជាមួយគ្រឿងសង្ហារឹមមួយចំនួនហើយដែរ។

លោក កូវ គឹមហាក់ តំណាងឱ្យក្រុមហ៊ុនបានបញ្ជាក់ឱ្យដឹងថា នៅពេលក្រុមហ៊ុនសាងសង់រួច កំពង់ផែមួយនេះមានសមត្ថភាព ក្នុ្ងងការផ្ទុកទំនិញចាប់ពី ៥ពាន់តោន ទៅ ៨ពាន់តោន ដោយសារទីតាំងដែលយើងកំពុងសាងសង់ជាប្រភេទដីល្បាប់ (ដីខ្មៅ) ពិតណាស់វាមិនអាចដំណើរការបានទេ ប្រសិនបើយើងមិនធ្វើកាយដីស្អុយទាំងនោះចេញ ហើយជំនួសមកវិញដោយដីដែលមានគុណភាព អាចទ្រទ្រង់ទម្ងន់ដ៏ធ្ងន់នេះបាន។ លោកបន្ថែមថា ក្រៅពីនោះទៀតនៅមានហេដ្ឋារចនាសម្ព័ន្ធនានាក៏ធ្វើឡើងស្របតាមគុនភាពខ្ពស់ទើបយើងអាចធានាដែលកំពង់ផែមួយនេះ អាចមានសមត្ថភាពផ្ទុកទំនិញដល់កម្រិតធ្ងន់ទាំងនោះបាន។

គួរបញ្ជាក់ថា គម្រោងសាងសង់ចំណតជលយានសេះសនេះ ជាប្រភេទគម្រោងវិនិយោគ BOT ដោយទទួលបានការគាំទ្រពីរដ្ឋបាលខេត្ត ជាគម្រោងវិនិយោគចំណតជលយាន កំពង់ផែសេះស ស្ថិតនៅភូមិអូរក្រសារ សង្កាត់អូរក្រសារ ក្រុងកែប ខេត្តកែប និងស្របតាមស្មារតីលិខិត របស់ក្រសួងសេដ្ឋកិច្ច និងហិរញ្ញវត្ថុ នៅលើផ្ទៃដីដែលមានទំហំ ៣០.០០០ម៉ែត្រការ៉េ។

គម្រោងនេះ ត្រូវបានសិក្សាច្បាស់លាស់ ព្រមជាមួយនូវកិច្ចសន្យាការពារបរិស្ថានដោយក្រុមហ៊ុនសាងសង់ និងមានការឯកភាពដោយក្រសួងបរិស្ថានផងដែរ។ គម្រោងនេះក៏ត្រូវបានសាងសង់ឡើងស្របតាមលិខិតអនុញ្ញាត របស់ក្រសួងសាធារណការ និងដឹកជញ្ជូន។

កំពង់ផែដឹកទំនិញធន់ធ្ងន់មួយនេះ នឹងរំពឹងថា ពិតជាល្អណាស់សម្រាប់រកចំណូល ដែលអាចឈានទៅពង្រីកសេដ្ឋកិច្ចជាតិ និងខេត្ត ផ្តល់ឱកាសការងារដល់ពលរដ្ឋ និងជះផលជាវិជ្ជមានរបស់ប្រជានេសាទ និងសហគមន៍ផងដែរ៕

អត្ថបទ៖ សឹង រ៉ាត់