តួកគី ប្រកាសជួយពង្រឹងសមត្ថភាពដល់មន្ត្រីនគរបាលកម្ពុជា

ប្រតិភូក្រសួងមហាផ្ទៃកម្ពុជា បានបំពេញទស្សនកិច្ចនៅសាធារណរដ្ឋតួកគី ចាប់ពីថ្ងៃទី២៥ ដល់ថ្ងៃទី៣១ ខែឧសភា ឆ្នាំ២០២៤ ក្នុងនោះក៏មានជំនួបរវាងក្រសួងមហាផ្ទៃនៃកម្ពុជា និងក្រសួងមហាផ្ទៃតួកគី ដោយតួកគី សម្រេចបាននូវលទ្ធផលសំខាន់ៗ៤ចំណុច ក្នុងការជួយពង្រឹងសមត្ថភាពនគរបាលកម្ពុជា។ នេះបើតាមការផ្សព្វផ្សាយលើទំព័រហ្វេសប៊ុករបស់លោក ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅថ្ងៃទី២៩ ខែឧសភា នេះ។  

ក្នុងដំណើរទស្សនកិច្ចរបស់ប្រតិភូក្រសួងមហាផ្ទៃ នៃព្រះរាជាណាចក្រកម្ពុជា ដឹកនាំដោយ លោក ទូច វិសាលសុខ រដ្ឋលេខាធិការក្រសួងមហាផ្ទៃ ជាតំណាងលោក ស សុខា រួមទាំងប្រតិភូអមដំណើរផ្សេងទៀត។ ដោយឡែក ថ្ងៃទី២៨ ខែឧសភា ឆ្នាំ២០២៤ ប្រតិភូក្រសួងមហាផ្ទៃកម្ពុជា បានជួបពិភាក្សាការងារជាមួយអនុរដ្ឋមន្ត្រីក្រសួងមហាផ្ទៃ ជួបជាមួយថ្នាក់ដឹកនាំនាយកដ្ឋាននគរបាលប្រតិបត្តិការពិសេស និងជួបជាមួយថ្នាក់ដឹកនាំបណ្ឌិត្យសភានគរបាល នៃសាធារណរដ្ឋតួកគី ជាលទ្ធផល តួកគី សម្រេចផ្តល់ជូនកម្ពុជា ដូចខាងក្រោម៖

លទ្ធផលទី១ តួកគី ផ្តល់អាហារូបករណ៍ ចំនួន ៨កន្លែង ក្នុង១ឆ្នាំ ជូនដល់មន្រ្តីនគរបាលកម្ពុជា ដើម្បីក្លាយជាគ្រូបង្រៀនបន្តវេន។ ទី២ តួកគី ចូលរួមអភិវឌ្ឍន៍កម្មវិធីបណ្តុះបណ្តាលរួមគ្នា (2+2)។ ទី៣ តួកគី ជួយបណ្ឌិត្យសភានគរបាលកម្ពុជា ក្នុងការកែលម្អកម្មវិធីសិក្សា និងទី៤ តួកគី បញ្ជូនអ្នកជំនាញ ជួយរៀបចំមន្ទីរពិសោធន៍ និងកិច្ចការស្រាវជ្រាវនៅកម្ពុជា៕