ក្រសួងអប់រំ ពង្រឹងសមត្ថភាពមន្រ្តីទទួលបន្ទុកការងារយុវជនស្ម័គ្រចិត្តដើម្បីសហគមន៍ខ្ញុំ

ក្រសួងអប់រំ យុវជន និងកីឡា រៀបចំសិក្ខាសាលាថ្នាក់តំបន់ ស្តីពី ការរៀបចំ និងគ្រប់គ្រងគម្រោងយុវជនស្ម័គ្រចិត្ត ដើម្បីពង្រឹងសមត្ថភាពបន្ថែមដល់សិក្ខាកាមជាមន្រ្តីអប់រំទទួលបន្ទុកការងារយុវជន និងយុវជនស្ម័គ្រចិត្តដើម្បីសហគមន៍ខ្ញុំ។ នេះបើតាមការផ្ដល់ព័ត៌មានពីក្រសួងអប់រំ យុវជន និងកីឡា នៅរសៀលថ្ងៃទី៣១ ខែឧសភា ឆ្នាំ២០២៤ នេះ។

លោក សេរី ជំនះ រដ្ឋលេខាធិការ ក្រសួងអប់រំ យុវជន និងកីឡា នារសៀលថ្ងៃទី៣០ ខែឧសភា ឆ្នាំ២០២៤ បានអញ្ជើញជាអធិបតីក្នុង ពិធី បិទសិក្ខាសាលាថ្នាក់តំបន់ “ស្តីពី ការរៀបចំ និងគ្រប់គ្រងគម្រោងដល់យុវជនស្ម័គ្រចិត្ត” ដោយមានការអញ្ជើញចូលរួមពី លោកស្រី គីម ម៉េនសារ៉េ នាយកប្រចាំប្រទេស ភ្នាក់ងារភីសខ័រ (Peace Corps) សហរដ្ឋអាមេរិកប្រចាំនៅប្រទេសកម្ពុជា។

ជាមួយគ្នានេះ ក៏មានវត្តមានថ្នាក់ដឹកនាំទទួលបន្ទុកការងារយុវជន យុវជនស្ម័គ្រចិត្ត និងតំណាងយុវជនស្ម័គ្រចិត្តដើម្បីសហគមន៍ខ្ញុំ ដែលអញ្ជើញមកពីខេត្តចំនួន១០ រួមមាន៖ ខេត្តតាកែវ កំពត កំពង់ឆ្នាំង កំពង់ចាម ត្បូងឃ្មុំ កំពង់ធំ ស្វាយរៀង ពោធិ៍សាត់ បាត់ដំបង និងបន្ទាយមានជ័យ។

សិក្ខាសាលានេះរៀបចំឡើងដោយ នាយកដ្ឋានគ្រប់គ្រងមជ្ឈមណ្ឌល នៃក្រសួងអប់រំ យុវជន និងកីឡា សហការជាមួយ ភ្នាក់ងារភីខ័រសហរដ្ឋអាមេរិក មានរយៈពេល ៣ថ្ងៃ ដោយចាប់ផ្តើមពីថ្ងៃទី២៨ ដល់ថ្ងៃទី៣០ ខែឧសភា ឆ្នាំ២០២៤ នៅសណ្ឋាគារសាន់វ៉េ រាជធានីភ្នំពេញ ក្នុងគោលបំណង ដើម្បីពង្រឹងសមត្ថភាពបន្ថែមដល់សិក្ខាកាមជាមន្រ្តីអប់រំទទួលបន្ទុកការងារយុវជន និងយុវជនស្ម័គ្រចិត្តដើម្បីសហគមន៍ខ្ញុំ អំពីរបៀប នៃការតាក់តែងគម្រោងឱ្យឆ្លើយតបទៅនឹងតម្រូវការរបស់សហគមន៍ និងវិធីសាស្រ្តក្នុងការកៀរគរធនធានសម្រាប់យកមកអនុវត្តគម្រោងនៅតាមសហគមន៍ឱ្យកាន់តែល្អប្រសើរ ជាពិសេសការជួយជំរុញទឹកចិត្តយុវជនស្ម័គ្រចិត្តកម្ពុជា ដែលនឹងទៅធើ្វការងារស្ម័គ្រចិត្តនៅតាមសហគមន៍ទូទាំងព្រះរាជាណាចក្រកម្ពុជា។

សិក្ខាសាលាបណ្តុះបណ្តាលនេះ ក៏បានផ្តល់នូវបំណិនថ្មី និងល្អៗបន្ថែមជាច្រើន ដើម្បីជាទុនដល់យុវជនយកទៅបំពេញនូវចំណុចខ្វះខាតរបស់ខ្លួន ក្នុងការចុះអនុវត្តកម្មវិធីការស្ម័គ្រចិត្ត ក៏ដូចជាការហ្វឹកហាត់ខ្លួន ជាពិសេសការវិភាគលើមូលដ្ឋានគ្រឹះច្បាស់លាស់ក្នុងការអភិវឌ្ឍខ្លួនឱ្យក្លាយជាយុវជនគំរូ ដែលជាមូលធនមនុស្សសម្រាប់អភិវឌ្ឍសហគមន៍ និងសង្គមជាតិ៕