នាយករដ្ឋមន្ត្រី ឧបត្ថម្ភថវិកាសរុប៥០ម៉ឺនដុល្លារ ដល់សមាគមសិល្បករខ្មែរ​

ដើម្បីជួយទ្រទ្រង់ និងធានានិរន្តរភាពសមាគមសិល្បករខ្មែរ សម្ដេចនាយករដ្ឋមន្ត្រីកម្ពុជា ឧបត្ថម្ភថវិកាសរុបចំនួន៥០ម៉ឺនដុល្លារ ដល់សមាគមសិល្បករខ្មែរ​ សម្រាប់ប្រើប្រាស់ក្នុងរយៈពេល៥ឆ្នាំ។ សម្ដេចធិបតី បានប្រកាសឱ្យដឹងបែបនេះ នៅក្នុងពិធីជួបសំណេះសំណាល និងពិសាអាហារសាមគ្គីជាមួយសិល្បករខ្មែរ ដែលធ្វើឡើងក្រោមប្រធានបទ « អ្នកស្នងមរតក» នាល្ងាចថ្ងៃទី៣១ ខែឧសភា ឆ្នាំ២០២៤។

សម្ដេចធិបតី ហ៊ុន ម៉ាណែត បានប្រកាសដូច្នេះថា «ខ្ញុំសូមចូលរួមជួយសមាគមសិល្បករខ្មែរក្នុងរយៈពេល៥ឆ្នាំ ក្នុងមួយឆ្នាំគឺ១០ម៉ឺនដុល្លារផងដែរ»។

លើសពីការឧបត្ថម្ភជាសាច់ប្រាក់ដើម្បីធានានិរន្តរភាពដល់សមាគមសិល្បករខ្មែរឱ្យមានសកម្មភាព សម្ដេចប្រមុខរាជរដ្ឋាភិបាល បានបង្កើតមូលនិធិដើម្បីជួយទ្រង់ទម្រង់សិល្បៈដែលងាយរងគ្រោះ នឹងអាចឈានដល់បាត់បង់។​

ក្រៅពីនេះ ក្នុងន័យជួយសម្រួលដល់ការបង្កើតនូវស្នាដៃសិល្បៈថ្មីៗ និងឆ្លើយនឹងសំណើររបស់អ្នកឧកញ៉ា ម៉ៅ ចំណាន  ប្រធានសមាគមសិល្បករខ្មែរ​ នាថ្ងៃនេះ​ សម្ដេចមហាបវរធិបតី ហ៊ុន ម៉ាណែត បានឯកភាពគោលការណ៍ក្នុងការអនុគ្រោះពន្ធពាក់ព័ន្ធទៅនឹងការបង្កើតស្នាដៃសិល្បៈថ្មីៗ នៅក្នុងវិស័យសិល្បៈ។

ដូចគ្នាដែរ ក្នុងចេតនា ដើម្បីជាការទ្រទ្រង់ដល់សមាគមសិល្បករខ្មែរឱ្យមាននិរន្តរភាព កាលពីថ្ងៃទី២៨ ខែឧសភា ថ្មីៗនេះ សម្ដេចតេជោ ហ៊ុន សែន​ ប្រធានព្រឹទ្ធសភាកម្ពុជា បានប្រកាសឧបត្ថម្ភទឹកប្រាក់ចំនួន៥០ម៉ឺនដុល្លារ សម្រាប់សមាគមប្រើប្រាស់ក្នុងរយៈពេល៥ឆ្នាំ៕