ព័ត៌មានជាតិ

ឯកឧត្ដម ហ៊ុន ម៉ានី និង ឯកអគ្គរដ្ឋទូតចិន គូសបញ្ជាក់ចំណងមិត្តភាពកម្ពុជា-ចិន ដែលជាទំនាក់ទំនងប្រវត្តិសាស្ត្រស្មោះត្រង់

បានផុស

២ years មុន

នៅ

ថ្ងៃពុធ ៥ មិថុនា ២០២៤

ដោយ

ឯកឧត្ដម ហ៊ុន ម៉ានី ឧបនាយករដ្ឋមន្ត្រី និងជារដ្ឋមន្ត្រីក្រសួងមុខងារសាធារណៈ និង ឯកឧត្ដម វ៉ាង វិនធាន ឯកអគ្គរដ្ឋទូត នៃសាធារណរដ្ឋប្រជាមានិតចិនប្រចាំព្រះរាជាណាចក្រកម្ពុជា បានគូសបញ្ជាក់ពីទំនាក់ទំនង និងចំណងមិត្តភាពកម្ពុជា-ចិន ដែលជាទំនាក់ទំនងប្រវត្តិសាស្ត្រ យូរអង្វែង និងស្មោះត្រង់ គ្រប់ដំណាក់កាល។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ការគូសបញ្ជាក់នេះ ក្នុងឱកាស ឯកឧត្ដម ហ៊ុន ម៉ានី បានទទួលជួបសំណេះសំណាល និងការជម្រាបលាពី ឯកឧត្ដម វ៉ាង វិនធាន កាលពីរសៀលថ្ងៃទី ៤ ខែមិថុនា ឆ្នាំ ២០២៤ នៅទីស្ដីការក្រសួងមុខងារសាធារណៈ។

នាជំនួបនោះ ឯកឧត្ដម ហ៊ុន ម៉ានី និង ឯកឧត្ដម វ៉ាង វិនធាន បានរំលឹកអនុស្សាវរីយ៍ល្អៗ បំពេញរួមគ្នាក្នុងនាមស្ថាប័ន និងក្នុងនាមបុគ្គលផ្ទាល់ នារយៈពេលជិត ៦ ឆ្នាំ មកនេះ ហើយក៏បានគូសបញ្ជាក់ពីទំនាក់ទំនង និងចំណងមិត្តភាពកម្ពុជា-ចិន ទាំងក្នុងក្របខណ្ឌគណបក្ស និងគណបក្ស រាជរដ្ឋាភិបាល និងរាជរដ្ឋាភិបាល និងរវាងប្រជាជន និងប្រជាជន ដែលជាទំនាក់ទំនងប្រវត្តិសាស្ត្រ យូរអង្វែង និងស្មោះត្រង់ គ្រប់ដំណាក់កាល។

ផ្ដើមពីទំនាក់ទំនងរវាងព្រះបរមរតនកោដ្ឋ ជាមួយលោកប្រធាន ម៉ៅ សេទុង និង ឯកឧត្ដម ជូ អេងឡាយ មិត្តភាពនេះ បានបន្តពង្រឹងពង្រីកតាមរយៈការដឹកនាំរបស់ សម្តេចតេជោ ហ៊ុន សែន និង ឯកឧត្តម ស៊ី ជីនពីង ដោយ កម្ពុជា-ចិន បានក្លាយជា «ដៃគូយុទ្ធសាស្ត្រគ្រប់ជ្រុងជ្រោយ» និងជា «មិត្តដែកថែប» ដែលតែងតែជួយគាំទ្រគ្នាទៅវិញទៅមកក្នុងគ្រាលំបាក ជាពិសេសក្នុងដំណាក់កាលវិបត្តិកូវីដ-១៩ និងបានឆ្លងកាត់ការសាកល្បង និងបទពិសោធជាច្រើនកន្លងមក ទាំងក្នុងឆាកតំបន់ និងអន្តរជាតិ។

ឈរលើមូលដ្ឋានគ្រឹះ នៃការទុកចិត្ត និងយោគយល់គ្នាខ្ពស់បំផុត កម្ពុជា-ចិន បានឈានដល់ការឯកភាពបង្កើត «ក្របខណ្ឌកិច្ចសហការត្បូងពេជ្រ» ហើយកំពុងបន្តបោះជំហានឆ្ពោះទៅមុខកាន់តែស៊ីជម្រៅក្នុងកិច្ចសហប្រតិបត្តិការលើគ្រប់វិស័យទាំងក្របខណ្ឌនយោបាយ សេដ្ឋកិច្ច និងសង្គម ក្រោមការដឹកនាំរបស់ សម្តេចធិបតី នាយករដ្ឋមន្ត្រី នៃរាជរដ្ឋាភិបាលអាណត្តិទី ៧ ដើម្បីឈានទៅរកការកសាងសហគមន៍ជោគវាសនារួមកម្ពុជា-ចិន។

ជាមួយនេះ ឯកឧត្ដមឧបនាយករដ្ឋមន្ត្រី ក៏បានកត់សម្គាល់ និងវាយតម្លៃខ្ពស់ចំពោះសមិទ្ធផល និងការរីកចម្រើនយ៉ាងច្រើនជាបន្តបន្ទាប់ នៃទំនាក់ទំនងកម្ពុជា-ចិន នៅក្នុងអាណត្តិ ឯកឧត្ដម វ៉ាង វិនធាន ជាឯកអគ្គរដ្ឋទូតចិនប្រចាំកម្ពុជា តាមរយៈការជំរុញកិច្ចសហប្រតិបត្តិការទ្វេភាគី ដែលនាំមកនូវការអភិវឌ្ឍសង្គម និងសេដ្ឋកិច្ចកម្ពុជា ផងដែរ៕

អត្ថបទ ៖ ពិសី