សម្តេច ហ៊ុន សែន ប្រាប់ទូតអឺរ៉ុបថា សម្តេច នឹងមិនបោះបង់ជំហរជួយមីយ៉ាន់ម៉ាឱ្យចេញផុតពីភ្នក់ភ្លើងសង្រ្គាមឡើយ

នៅចំពោះមុខឯកអគ្គរដ្ឋទូតសហភាពអឺរ៉ុប, សម្ដេចតេជោ ហ៊ុន សែន ប្រធានព្រឹទ្ធសភា ប្រាប់ទូតអឺរ៉ុបថា សម្ដេច នឹងមិនបោះបង់ជំហរក្នុងការជួយដល់មីយ៉ាន់ម៉ាក្នុងដំណើរស្វែងរកសុខសន្តិភាពនោះឡើយ ដោយត្រូវមានការអំណត់អត់ធន់បន្តិច ដោយសារសភាពការណ៍នៅមីយ៉ាន់ម៉ា នៅតែលំបាកនិងស្មុគស្មាញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជុំវិញបញ្ហាមីយ៉ាន់ម៉ា សម្ដេចតេជោ និង លោក​ Igor Driesmans ឯកអគ្គរដ្ឋទូតបានសម្ដែង ការព្រួយបារម្ភចំពោះសភាពការណ៍កាន់តែស្មុគស្មាញ ជាពិសេសផ្នែកសេដ្ឋកិច្ច សង្គម។

បញ្ហាសង្គ្រាមដែលកំពុងអូសបន្លាយនេះ សម្ដេចតេជោ និងឯកអគ្គរដ្ឋទូតសហភាពអឺរ៉ុប បានឯកភាពគ្នាថា ត្រូវមានដំណោះស្រាយតាមរយៈការចរចាមួយ ដើម្បីឈានទៅបញ្ចប់ភាពទាល់ច្រកនៅមីយ៉ាន់ម៉ា។ លោកទូត ក៏កោតសរសើរចំពោះសកម្មភាពរបស់សម្ដេចតេជោ ក្នុងការប្រឹងប្រែងរកសុខសន្តិភាពនៅមីយ៉ាន់ម៉ា។

គួររម្លឹកជូនថា ចាប់តាំងពីមីយ៉ានម៉ា ផ្ទុះសង្គ្រាម សម្ដេចតេជោ ហ៊ុន សែន តែងតែស្វះស្វែងជួយបញ្ចប់សង្គ្រាមជានិច្ច។ ជាក់ស្ដែងក្នុងតួនាទីជាប្រធានអាស៊ាននៅឆ្នាំ២០២២ សម្ដេចតេជោ ហ៊ុន សែន ខិតខំប្រឹងរិះរកគ្រប់វិធី ថែមទាំងធ្វើដំណើរទៅកាន់ប្រទេសមីយ៉ាន់ម៉ា ភ្ជាប់ជាមួយជំនួយសប្បុរសធម៌ ដើម្បីជួយបញ្ចប់សង្គ្រាម ប៉ុន្តែសង្គ្រាមមួយនេះ ហាក់គ្មានសញ្ញាណនៃភាពវិជ្ជមានឡើយ។​

សម្រាប់ឆ្នាំ២០២៤ ពោលគឺនៅថ្ងៃទី០៧ ខែឧសភា   នេះ ក្នុងតំណែងជាប្រធានព្រឹទ្ធសភា សម្ដេចតេជោ ហ៊ុន សែន ជួបពិភាក្សាជាមួយ លោក មីន អោងឡាំង តាមរយៈប្រព័ន្ធវីដេអូ ដោយក្នុងជំនួបនោះ សម្តេចតេជោ ក៏បានគូសបញ្ជាក់ឡើងវិញពីសារៈសំខាន់នៃការអនុវត្តកិច្ចព្រមព្រៀងឯកច្ឆន្ទប្រាំចំនុច ទៅកាន់លោក មី នអោងឡាំង ហើយរំពឹងថាការរីកចម្រើននេះ នឹងចូលរួមចំណែកដល់ដំណើរការស្វែងរកសន្តិភាព ដែលមានមីយ៉ាន់ម៉ាខ្លួនឯងជាអ្នកដឹកនាំ និងជាម្ចាស់៕