អ្នកនាំពាក្យរងក្រសួងការងារ ៖ កម្ពុជា ជាឋានសួគ៌របស់សហជីពជាង៦ពាន់

តាមរយៈគេហទំព័រហ្វេសប៊ុក កាលពីថ្ងៃទី១៩ ខែមិថុនា  លោកស្រី ឃុន ណៃហៀក អនុរដ្ឋលេខាធិការ និងជាអ្នកនាំពាក្យរងក្រសួងការងារ បានសរសេរថា កម្ពុជា គឺជាឋានសួគ៌របស់សហជីព ដែលមានសហជីព ចំនួនប្រមាណជាង ៦ពាន់សហជីព បាននិងកំពុង អនុវត្តសិទ្ធិសេរីភាព ខ្លួន យ៉ាងពេញលេញអនុលោមតាមច្បាប់ស្តីពីការងារ ច្បាប់ស្តីពីសហជីព និងបទដ្ឋានការងារអន្តរជាតិ។ អ្នកនាំពាក្យរងរូបនេះ បង្ហោះដូច្នេះ គឺតបទៅកាន់វិទ្យុអាស៊ីសេរី ដែលផ្សាយចោទប្រកាន់ថា សហជីពនៅកម្ពុជា មិនទទួលបានសិទ្ធិសេរីភាព។

អនុរដុ្ឋលេខាធិការ និងជាអ្នកនាំពាក្យរងទី១រូបនេះ លើកឡើងថា បើសហជីពទទួលរងនូវការបំបិទសិទ្ធិសេរីភាព នោះប្រាកដជាគ្មានចំនួនសហជីពដ៏ច្រើនសន្ធឹក អាចបង្កើតនៅកម្ពុជាបានឡើយ។  អ្នកនាំពាក្យរងសរសេរដូច្នេះ ៖« បើសិនជាសហជីពពិតជាមិនទទួលបានសិទ្ធិសេរីភាពមែននោះ ពិតជាមិនមាន ចំនួនសហជីពដ៏ច្រើនអាចបង្កើត និងអនុវត្តនូវសិទ្ធិសេរីភាពយ៉ាងពេញលេញតាមច្បាប់នោះឡើយ»។

លោកស្រី ឃុន ណៃហៀក អនុរដ្ឋលេខាធិការ ក្រសួងការងារ និងបណ្ដុះបណ្ដាលវិជ្ជាជីវៈ ប្រាប់ទៅកាន់វិទ្យុអាស៊ីសេរីថា គួរយល់ដឹងឱ្យច្បាស់ថា អ្វីដែលជាសកម្មភាពសហជីព ហើយអ្វីដែលជាការប្រព្រឹត្តខុសច្បាប់របស់បុគ្គលដែលជាសហជីព។

លោកស្រីអ្នកនាំពាក្យរង ក៏ប្រាប់ឱ្យវិទ្យុនេះត្រូវរៀនទទួលស្គាល់ការពិត នៃការវិវត្តន៍រីកចម្រើននៃអង្គការវិជ្ជាជីវ: និងការធានាការអនុវត្តសិទ្ធិសេរីភាពអង្គការវិជ្ជាជីវ:នៅកម្ពុជា ចៀសវាងការចេញរបាយការណ៍ណាមួយដែលអាចនឹងប្រឈមផ្លូវច្បាប់៕