ព័ត៌មានជាតិ

១ សប្តាហ៍នេះ ក្រសួងការងារ មានតម្រូវការកម្លាំងពលកម្មជាង ៥ ម៉ឺន ៧ ពាន់កន្លែង សម្រាប់បម្រើលើវិស័យធំៗ ៣

បានផុស

២ years មុន

នៅ

ថ្ងៃអង្គារ ២៣ កក្កដា ២០២៤

ដោយ

នៅក្នុងរយៈពេល ១ សប្ដាហ៍ នេះ ពោលចាប់ពីថ្ងៃទី ២២ ដល់ ថ្ងៃទី ២៨ ខែកក្កដា ឆ្នាំ ២០២៤ នេះក្រសួងការងារ និងបណ្ដុះបណ្ដាលវិជ្ជាជីវៈ មានតម្រូវការកម្លាំងពលកម្មក្នុងស្រុកប្រមាណជាង ៥ ម៉ឺន ៧ ពាន់កន្លែង សម្រាប់បម្រើទៅលើវិស័យធំៗ ចំនួន ៣ រួមមាន វិស័យឧស្សាហកម្ម សេវាកម្ម និងកសិកម្ម។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាមក្រសួងការងារ និងបណ្តុះបណ្តាលវិជ្ជាជីវៈ បានឱ្យដឹងថា បច្ចុប្បន្ននេះក្រសួងមានតម្រូវការកម្លាំងពលកម្មចំនួន ៥៧ ៦៣៥ កន្លែង សម្រាប់បម្រើទៅលើវិស័យធំៗ ចំនួន ៣ ក្នុងនោះ វិស័យឧស្សាហកម្មមានតម្រូវការចំនួន ៤៣ ៧៥៨ កន្លែង វិស័យសេវាកម្មមានចំនួន ៤ ៧៦៧ កន្លែង និងវិស័យកសិកម្មមានចំនួន ៩ ១១០ កន្លែង។

ក្នុងនោះនៅខេត្តរតនគីរី មានតម្រូវការផ្នែកកសិកម្មចំនួន ៥ ២៨៦ កន្លែង ខេត្តកំពង់ស្ពឺ មានតម្រូវការកម្លាំងពលកម្មផ្នែកឧស្សាហកម្ម ១២ ០២០ កន្លែង។ ខេត្តក្រចេះមានតម្រូវការផ្នែកកសិកម្ម ៣ ៥០០ កន្លែង។ រាជធានីភ្នំពេញមាន ១១ ២០៤ កន្លែង ក្នុងនោះផ្នែកឧស្សាហកម្ម ៩ ៥១៥ កន្លែង និងផ្នែកសេវាកម្ម ១ ៦៨៩ កន្លែង។

ខេត្តស្វាយរៀងមានចំនួន ៧ ៥៩៦ កន្លែង ក្នុងនោះវិស័យឧស្សាហកម្មមាន ៦ ២១៨ កន្លែង និងសេវាកម្ម ១ ៣៧៨ កន្លែង។ ខេត្តកណ្តាលមានតម្រូវការកម្លាំងពលកម្មវិស័យឧស្សាហកម្ម ១ ១១០ កន្លែង។ ខេត្តតាកែវមាន ៣ ០២៥ កន្លែង ក្នុងនោះវិស័យឧស្សាហកម្ម ៣ ៩៨៨ កន្លែង និងសេវាកម្ម ៣៧ កន្លែង។ ខេត្តបន្ទាយមានជ័យមានតម្រូវការកម្លាំងពលកម្ម ៦៧៤ កន្លែង ក្នុងនោះផ្នែកវិស័យឧស្សាហកម្ម ៣៦ កន្លែង និងសេវាកម្ម ៦៣៨ កន្លែង។ ខេត្តពោធិ៍សាត់ ៣៧៧ កន្លែង ក្នុងនោះសេវាកម្ម ១៥៣ និងសេវាកម្ម ២២៤ កន្លែង។ ខេត្តកំពង់ឆ្នាំងមានតម្រូវការផ្នែកឧស្សាហកម្ម ១០ ៣០០ កន្លែង និងខេត្តផ្សេងៗ មាន ១ ៥៤៣ កន្លែង ក្នុងនោះឧស្សាហកម្មមាន ៤១៨ កន្លែង សេវាកម្ម ៨០១ កន្លែង និងកសិកម្ម ៣២៤ កន្លែង។

ក្រសួងការងារ បានបន្តទៀតថា កម្លាំងពលកម្មជាង ៥ ម៉ឺន ៧ ពាន់កន្លែង នឹងត្រូវបែងចែកទៅតាមប្រភេទមុខរបរចំនួន ១០ រួមមាន អ្នកបញ្ជាម៉ាស៊ីនដេរចំនួន ៣៥ ៥៣៤ កន្លែង កម្មករចម្ការដំណាំចំនួន ៩ ០៨៦ កន្លែង កម្មករក្នុងផលិតកម្មចំនួន ៤ ២៩១ កន្លែង អ្នកធ្វើការក្នុងកាស៊ីណូ ១ ៣៤៩ កន្លែង មន្ត្រីឥណទាន និងកម្ចីប្រាក់ ៨៦៧ កន្លែង អ្នកបច្ចេកទេសត្រួតពិនិត្យដំណើរការផលិត ៤៤១កន្លែង អ្នកធ្វើការផ្នែកសិប្បកម្មខាងសម្ភារៈវាយនភណ្ឌធ្វើពីស្បែក ៥០០ កន្លែង អ្នកបញ្ជាម៉ាស៊ីនធ្វើស្បែកជើង ៤៩៥ កន្លែង កម្មករវេចខ្ចប់ដោយដៃ ២៦៦ កន្លែង អ្នកលក់ដូរតាមការទំនាក់ទំនង ៣៩១ កន្លែង និងមុខរបរផ្សេងៗ ៤ ៤១៥ កន្លែង៕

អត្ថបទ ៖ សំអឿន