វិស័យធានារ៉ាប់រងបានផ្តល់សំណងជូនអតិថិជនរបស់ខ្លួន​មានទឹកប្រាក់សរុបចំនួន ៦៣ លានដុល្លារអាមេរិកក្នុងឆ្នាំ២០២៣

ក្រុមហ៊ុនធានារ៉ាប់រងទាំងអស់នៅកម្ពុជាបានផ្តល់សំណងជូនអតិថិជនរបស់ខ្លួនដែលជួបនូវហានិភ័យ មានទឹកប្រាក់សរុបចំនួន ៦៣ លានដុល្លារអាមេរិកក្នុងឆ្នាំ២០២៣កន្លងទៅ។ នេះបើយោងតាមមន្រ្តីជាន់ខ្ពស់នៃសមាគមធនារ៉ាប់រងកម្ពុជា (IAC)

លោក ហ៊ុយ វ៉ាថារ៉ូ ប្រធានសមាគមធានារ៉ាប់រងកម្ពុជា បានមានប្រសាសន៍ក្នុងពិធីបើកកម្មវិធី«ទិវាធានារ៉ាប់រងកម្ពុជា ឆ្នាំ២០២៤» កាលពីចុងសប្តាហ៍មុននៅថ្ងៃ​ ខេត្តព្រះសីហនុថា ជាមួយទឹកប្រាក់សំណងសរុប ក្នុងនោះបើរាប់តែទឹកប្រាក់សំណងលើប្រភេទផលិតផលធានារ៉ាប់រងចម្បងៗ រួមមាន ​ទឹកប្រាក់សំណងប្រមាណ ​២២ ​លាន​ដុល្លារអាមេរិក ត្រូវបាន​ទូទាត់​សម្រាប់​ថ្លៃ​ព្យាបាលសុខភាព (ធានារ៉ាប់រងសុខភាព)​, ជំនួយហិរញ្ញវត្ថុភ្លាមៗជិត ១៦ លានដុល្លារអាមេរិក ត្រូវបានផ្តល់ជូនក្រុមគ្រួសារក្រោមបណ្ណសន្យារ៉ាប់រងអាយុជីវិត ដែលបាន​ជួយ​ពួកគេឱ្យជៀសផុតពីការលំបាកផ្នែកហិរញ្ញវត្ថុ, ទឹកប្រាក់សំណង ១០​ លាន​ដុល្លារអាមេរិក​ត្រូវបានទូទាត់សម្រាប់​ការ​ខូចខាត​ទ្រព្យសម្បត្តិ​​បណ្ដាល​មក​ពី​អគ្គិភ័យ, ទឹកប្រាក់សំណង ​៩ ​លាន​ដុល្លារអាមេរិក​សម្រាប់​ការ​ទូទាត់សំណងជូនជនរងគ្រោះ និងការខូចខាតទ្រព្យសម្បត្តិនៅក្នុងគ្រោះថ្នាក់ចរាចរណ៍ (​ធានា​រ៉ាប់រង​យានយន្ត), និង ​២ ​លាន​ដុល្លារអាមេរិក ​សម្រាប់​សំណង​សម្រាប់ការព្យាបាល និងការបាត់បង់ជីវិតបណ្តាលមកពី​គ្រោះថ្នាក់បុគ្គល ជាដើម។ ​លោកបានថ្លែងបញ្ជាក់ថា៖« ទោះជាយ៉ាងណា ចំនួនទឹកប្រាក់សំណងធានារ៉ាប់រងទាំងនេះ នៅមានកម្រិតតិចតួចប៉ុណ្ណោះ បើធៀបនឹងទំហំទឹកប្រាក់បាត់បង់សេដ្ឋកិច្ចដែលបណ្តាលមកពីហានិភ័យគ្មានការធានារ៉ាប់រង»។

លោកបានពន្យល់ថា​វិស័យធានារ៉ាប់រងនៅកម្ពុជាបានរួមចំណែកកាន់តែច្រើនឡើងនៅក្នុងការជំរុញកំណើនសេដ្ឋកិច្ចជាតិ តាមរយៈមុខងារនៃការកៀរគរមូលនិធិសន្សំដើម្បីចាក់បញ្ចូលទៅក្នុងចរន្តសេដ្ឋកិច្ចពិត។

ជាមួយគ្នានេះដែរ បុព្វលាភដែលក្រុមហ៊ុនធានារ៉ាប់រងប្រមូលបាន ត្រូវបានចាត់ចែងយ៉ាងត្រឹមត្រូវស្របតាម​បទប្បញ្ញត្តិជាធរមាន និងត្រូវបានប្រើប្រាស់ជាមូលនិធិវិនិយោគនៅក្នុងវិស័យផ្សេងៗនៃសេដ្ឋកិច្ច ដូចជា ហេដ្ឋារចនាសម្ព័ន្ធ ជាដើម។ គិតត្រឹមដំណាច់ឆ្នាំ២០២៣ ប្រាក់បញ្ញើសរុបរបស់ក្រុមហ៊ុនធានារ៉ាប់រងនៅក្នុងប្រព័ន្ធធនាគារ មានចំនួនប្រមាណ ៦៦៦ លានដុល្លារអាមេរិក និងទឹកប្រាក់ប្រមាណ ៧៤ លានដុល្លារអាមេរិកទៀត​ ត្រូវបានវិនិយោគផ្ទាល់ក្នុងសេដ្ឋកិច្ចតាមរយៈការទិញមូលបត្រ ទាំងមូលបត្របំណុល ទាំងមូលបត្រកម្មសិទ្ធិ។

លោកបានការ«វិនិយោគទាំងនោះត្រូវបានធ្វើឡើងដោយផ្ទាល់នៅក្នុងវិស័យសេដ្ឋកិច្ចជាក់លាក់ តាមរយៈការទិញសញ្ញាប័ណ្ណនិងភាគហ៊ុនចុះបញ្ជីនៅផ្សារមូលបត្រកម្ពុជា និងមូលបត្ររដ្ឋ ហើយការវិនិយោគដោយប្រយោលនៅក្នុងវិស័យពិតនៃសេដ្ឋកិច្ចត្រូវបានធ្វើឡើង តាមរយៈការចាក់បញ្ចូលមូលនិធិវិនិយោគរបស់ក្រុមហ៊ុនធានារ៉ាប់រង ក្នុងទម្រង់ជាប្រាក់បញ្ញើនៅក្នុងប្រព័ន្ធធនាគារ»។

​វិស័យធានារ៉ាប់រងរបស់កម្ពុជាមានកំណើនទាបនៅឆមាសទី១ ឆ្នាំ ២០២៤នេះ​ដែលសម្រេចបាន​​ទឹកប្រាក់ចំនួន ១៧៨ លានដុល្លារ កើនឡើងប្រមាណតែ ១ ភាគរយ ធៀប​នឹង​រយៈ​ពេល​ដូចគ្នា កាលពីឆ្នាំ ២០២៣ មានចំនួន ១៧៦ លានដុល្លារ។ នេះបើយោងតាម​និយ័ត​ករ​ធានា​រ៉ាប់​​រង​កម្ពុជា (RIC)។

លោក ទូច ម៉េងឡេង ប្រធាននាយកដ្ឋានអភិវឌ្ឍន៍ទីផ្សារ នៃនិយ័តករធានារ៉ាប់រងកម្ពុជា មានប្រសាសន៍នៅក្នុងវេទិកាមួយកាលពីថ្ងៃទី ១៨ ខែកក្កដានេះថា វិស័យធានារ៉ាប់រងកម្ពុជាមានកំណើនវិជ្ជមានតិចតូច ប៉ុន្តែអ្វីដែលកើនខ្លាំង គឺការផ្ដល់សំណងដែល​មានការកើនឡើងជាង ៧០% បើធៀបនឹងរយៈពេលដូចគ្នា កាលពីឆ្នាំមុន តែទោះជាយ៉ាងណាវិស័យនេះ នៅតែបន្តរីកចម្រើនទៅមុខ។

លោក ពន្លឺ តុលា អគ្គនាយកក្រុមហ៊ុនព្រូដិនសលកម្ពុជា មានប្រសាសន៍ថា ការរីកចម្រើនវិស័យធនារ៉ាប់រងនៅឆមាសទី១ មានកំណើនតិច ដោយសារផលប៉ះពាល់នៃសេដ្ឋកិច្ចជាសកល និងវិបត្តិក្រោយជំងឺកូវីដ១៩។

លោក ប៊ូ ច័ន្ទភីរូ អគ្គនាយកនិយ័តករធានារ៉ាប់រងកម្ពុជា មានប្រសាសន៍ថា វិស័យ​ធានារ៉ាប់​រង​​​នៅកម្ពុជានៅកម្រិតទាបនៅឡើយបើធៀបនឹងពិភពលោក និង​​​តំបន់ ដោយសារចំណេះដឹងប្រជាពលរដ្ឋនៅមានកម្រិតជុំវិញវិស័យធានារ៉ាប់រង និងទំនុកចិត្ត​របស់ប្រជា​ពលរដ្ឋ។

​បច្ចុប្បន្ន​កម្ពុជាមានក្រុមហ៊ុនធានារ៉ាប់រងចំនួន ៤០ ដែលមានទ្រព្យសកម្មសរុប ១,១១ ពាន់លាន​ដុល្លារ។

យោងតាមរបាយការណ៍របស់និយ័ត​ករ​ធានា​រ៉ាប់​​រង​កម្ពុជា បុព្វលាភធានារ៉ាប់រងនៅឆ្នាំ ២០២៣ ​សម្រេចបាន ៣៤៤ លានដុល្លារ កើនជិត ៤% បើធៀបនឹងឆ្នាំ ២០២២ ដែលមាន ៣៣១ លានដុល្លារ៕