ប្រជាពលរដ្ឋរស់នៅភូមិទ្រុងមាន់ សង្កាត់អូរបែកក្អម ទទួលបានផ្លូវបេតុងថ្មី២ខ្សែ  

ប្រជាពលរដ្ឋជាច្រើនគ្រួសារនាំគ្នាសាទរយ៉ាងខ្លាំង ចំពោះការយកចិត្តទុកដាក់ពីអាជ្ញាធរមូលដ្ឋានធើ្វការចាក់បេតុងផ្លូវចំនួន២ខ្សែ ងាយស្រួលដល់អ្នកធ្វើដំណើរ ព្រោះកន្លងមកមានជង្ហុក ច្រើនថែមទាំងដក់ទឹកធ្វើឲ្យលំបាកក្នុងការធ្វើដំណើរក្នុងភូមិទ្រុងមាន់ សង្កាត់អូរបែកក្អម ខណ្ឌសែនសុខ រាជធានីភ្នំពេញ។

ក្នុងកិច្ចសម្ភាសន៍លោក ផល្លា តំណាងប្រជាពលរដ្ឋមានក្ដីសប្បាយរីករាយ និងថ្លែងអំណរអរគុណដល់អាជ្ញាធរមូលដ្ឋាន ក៏ដូចជាអាជ្ញាធរជំនាញពាក់ព័ន្ធ ដោះស្រាយការលំបាករបស់ប្រជាពលរដ្ឋ ប្រែក្លាយកំណាត់នេះជាផ្លូវបេតុង ជូនដល់ប្រជាពលរដ្ឋនិងអ្នកធ្វើដំណើរងាយស្រួលក្នុងការធ្វើដំណើរ។ ប្រជាពលរដ្ឋអ្នកធ្វើដំណើរលើកឡើងថា កន្លងមកកំណាត់ផ្លូវនេះ ដែលមានប្រវែងប្រមាណ៤៤០ ម៉ែត្រតែប៉ុណ្ណោះ មានជង្ហុកច្រើនថែមទាំងដក់ទឹកលំបាកពេលដែលធ្វើដំណើរស្រាចទឹកប្រឡាក់អ្នកធ្វើដំណើរជាដើម ។

លោក យឹម រ័ត្ន ចៅសង្កាត់អូរបែកក្អម បានឲ្យដឹងថា គម្រោងស្ថាបនាផ្លូវបេតុងនេះ គឺជាគម្រោងមូលនិធិសម្រាប់អភិវឌ្ឍន៍ឆ្នាំ២០២៤ របស់សង្កាត់ ដែលរដ្ឋបាលសង្កាត់សម្រេចជាគម្រោងជាអទិភាព។ លោកបញ្ជាក់ថា ផ្លូវបេតុងដែលនឹងគ្រោងស្ថាបនានេះ មានប្រវែង៤៤០មែត្រ ទទឹង៦ម៉ែត្រ កម្រាស់០.១៥ម៉ែត្រ និងស្លាកសញ្ញាមួយកន្លែង ជាគម្រោងផ្លូវបេតុងគ្មានសរសៃដែក(គ្រឹះថ្មមិចM30) ៕

 អត្ថបទ ៖ ម៉េង