សមត្ថកិច្ចបង្ក្រាបបទល្មើសដឹកជញ្ជូនកូនត្រីបាន៣០កាននៅស្រុកកងមាស ខណៈជនល្មើសរត់គេចខ្លួនបាត់

អធិការដ្ឋានរដ្ឋបាលជលផលមេគង្គ ខណ្ឌរដ្ឋបាលជលផល​ខេត្ត​កំពង់​ចាម ចុះបង្ក្រាបបទល្មើសដឹកជញ្ជូនកូនត្រីនៅចំណុចភូមិគុហេ ស្រុកកង​មាស ខេត្តកំពង់ចាម ចាប់បានកូនត្រី៣០កាន និងសម្ភារៈផ្សេងទៀត ខណៈជនល្មើសគេចខ្លួនបាត់។ នេះបើតាមការផ្សាយរបស់ក្រសួងកសិកម្ម រុក្ខាប្រមាញ់ និងនេសាទ នៅថ្ងៃទី១០ ខែសីហា ឆ្នាំ២០២៤។

ប្រភពពីក្រសួងបានឱ្យដឹងថា នៅថ្ងៃទី០៩ ខែសីហា ឆ្នាំ២០២៤ សមត្ថកិច្ចជំនាញអធិការដ្ឋាន​រដ្ឋបាល​ជលផលមេគង្គ ដោយមានការចូលរួមជាមួយខណ្ឌរដ្ឋបាល​ជលផលខេត្តកំពង់ចាម នៅវេលាម៉ោង៤៖០០ ទៀបភ្លឺ បានចុះ​ទៅ​បង្ក្រាបបទល្មើសដឹកជញ្ជូនកូនត្រី នៅចំណុចភូមិគុហេ ឃុំព្រែកកុយ ស្រុកកងមាស ខេត្តកំពង់ចាម។

ជាលទ្ធផល នៃការបង្រ្កាបបទល្មើសជលផល បានឃាត់ចាប់រថយន្ត pick up ម៉ាក NAVARA ពាក់ស្លាកលេខកំពង់ចាម 2B-5163 ដែលប្រើជា​មធ្យោបាយដឹកកូនត្រី និងកូនត្រីចម្រុះមានចំនួន​៣០កាន​ស្មើនឹង៦០០គីឡូក្រាម ចំណែកជនល្មើសបានរត់គេចខ្លួនបាត់។ វត្ថុតាងខាងលើត្រូវបានបញ្ជូនទៅខណ្ឌរដ្ឋបាលជលផលខេត្តកំពង់ចាម ដើម្បីកសាងសំណុំរឿងតាមនិតិវិធីច្បាប់ស្តីពីជលផល៕

ដោយ៖​ អុន ស្រីមាន