ព័ត៌មានជាតិ

ស្ដារប្រឡាយបង្ហូរទឹកព្រែកប្រា អាចរំដោះទឹកបាន ៤ សង្កាត់

បានផុស

២ years មុន

នៅ

ថ្ងៃអង្គារ ១៣ សីហា ២០២៤

ដោយ

លោក ចេង មុនីរ៉ា អភិបាលខណ្ឌច្បារអំពៅ បានមានប្រសាសន៍កាលពីព្រឹកថ្ងៃទី ១៣ សីហា នេះថា នាដើមសប្ដាហ៍នេះ លោកបានបញ្ជាឲ្យយកគ្រឿងចក្រទៅស្តារប្រឡាយទឹកក្នុងភូមិសាស្ត្រសង្កាត់ព្រែកប្រា ដើម្បីបង្ហូរទឹកចូលទៅក្នុងទន្លេបាសាក់។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

អភិបាលខណ្ឌច្បារអំពៅ បញ្ជាក់ថា ព្រែកនេះ ស្ថិតនៅខាងត្បូងស្ពានឆ្លងកាត់ពីព្រែកប្រាឆ្ពោះទៅសង្កាត់ចាក់អង្រែក្រោម ដែលស្ពាននេះកំពុងសាងសង់រាល់ថ្ងៃ។ ចំពោះព្រែកដែលកំពុងស្តារនេះ ពីដើមមកសុទ្ធតែលំនៅដ្ឋានប្រជាពលរដ្ឋមកសាងសង់ជាង ២០០ គ្រួសារ រហូតដល់ពេលនេះសាលារាជធានីភ្នំពេញបានសម្រេចរកដីជាថ្នូរឲ្យពួកគាត់ទៅរស់នៅស្របច្បាប់ក្បែរព្រែកនេះដែរ ប្រមាណជា ១ គីឡូម៉ែត្រប៉ុណ្ណោះ។ នៅពេលសំណង់ប្រជាពលរដ្ឋសង់លើព្រែក បង្កឲ្យមានផលលំបាកក្នុងការបង្ហូរទឹកចូលទៅក្នុងទន្លេបាសាក់ចេញពីតំបន់រងការលិចលង់។ ក្នុងនោះមានសង្កាត់ព្រែកប្រា សង្កាត់វាលស្បូវ សង្កាត់ព្រែកឯង និងសង្កាត់ព្រែកថ្មី ខណ្ឌច្បារអំពៅ រាជធានីភ្នំពេញ។ ដូច្នេះនៅពេលគ្រឿងចក្រស្តារព្រែកនេះរួច បានរំដោះទឹកលែងលិចលង់លំនៅដ្ឋានប្រជាពលរដ្ឋទៀតហើយ។

ថ្មីៗ នេះ លោកស្រី ជា ថារ៉េត ប្រជាពលរដ្ឋរស់នៅតំបន់បឹងព្រលឹត ភូមិអូរអណ្តូងទី ១ សង្កាត់ព្រែកប្រា ខណ្ឌច្បារអំពៅ រាជធានីភ្នំពេញ បានសំដែងនូវក្តីរីករាយ ព្រមទាំងអរគុណដល់ លោក ឃួង ស្រេង អភិបាលរាជធានីភ្នំពេញ និង លោក ចេង មុនីរ៉ា អភិបាលខណ្ឌច្បារអំពៅ ដែលលោកបានប្រើប្រាស់គ្រប់មធ្យោបាយ ដើម្បីស្តារប្រឡាយបង្ហូរទឹកចេញពីតំបន់ដែលគាត់រស់នៅបានរីងស្ងួត មិនលំបាកដូចរាល់ឆ្នាំតែងរងការលិចលង់នារដូវវស្សាអស់រយៈពេលរាប់ខែទើបស្រកទឹក៕

អត្ថបទ ៖ នរា