ព័ត៌មានជាតិ

តម្រាយផ្លូវធ្វើដំណើរទស្សនកិច្ចព្រំដែនថ្ងៃស្អែកនេះ មានចម្ងាយផ្លូវ ៧០០ គីឡូម៉ែត្រ

បានផុស

១ ខែ មុន

នៅ

ថ្ងៃសុក្រ ៦ កញ្ញា ២០២៤

ដោយ

នៅរសៀលនេះ រដ្ឋមន្ត្រីក្រសួងព័ត៌មាន រួមទាំងរដ្ឋមន្ត្រីទទួលបន្ទុករដ្ឋលេខាធិការដ្ឋានកិច្ចការព្រំដែន បានធ្វើបទបង្ហាញពីតម្រាយផ្លូវសម្រាប់ដំណើរទស្សនកិច្ចស្វែងយល់ពីតំបន់ត្រីកោណអភិវឌ្ឍ CLV-DTA នៅខេត្តទិសឦសានដែលមានខេត្តក្រចេះ មណ្ឌលគិរី រតនគិរី និងស្ទឹងត្រែង។

នៅចំពោះមុខពលរដ្ឋដែលចូលរួមស្តាប់បទបង្ហាញស្តីពី “របៀបរបបនៃដំណើរទស្សនកិច្ច និងកម្មវិធីទស្សនកិច្ចនៅខេត្តទិសឦសាន” នារសៀលថ្ងៃទី០៦ ខែកញ្ញា ឆ្នាំ២០២៤ នៅសាលប្រជុំក្រសួងរៀបចំដែនដី នគរូបនីយកម្ម និងសំណង់ រាជធានីភ្នំពេញ លោក នេត្រ ភក្ត្រា រដ្ឋមន្ត្រីក្រសួងព័ត៌មានបានគូសបញ្ជាក់ថា តម្រាយផ្លូវសម្រាប់ដំណើរការទស្សនកិច្ចទៅព្រំដែនទិសឦសាននៅថ្ងៃស្អែកនេះ គឺនៅតាមបណ្ដោយព្រំដែនក្នុងខេត្តត្បូងឃ្មុំ ក្រចេះ និងមណ្ឌលគិរី ដែលមានចម្ងាយផ្លូវទាំងទៅទាំងមកជាង ៧០០ គីឡូម៉ែត្រ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

«ដំណើរទស្សនកិច្ចរបស់យើងមាន ៣ តម្រាយផ្លូវ ដោយតម្រាយផ្លូវទីមួយ គឺយើងធ្វើដំណើរតាមបណ្តោយព្រំដែនពីខេត្តត្បូងឃ្មុំចូលទៅខេត្តក្រចេះ និងទៅច្រកឡាប៉ាខេខេត្តមណ្ឌលគិរី។ សរុបចម្ងាយផ្លូវពីរាជធានីភ្នំពេញទៅដល់ច្រកឡាប៉ាខេខេត្តមណ្ឌលគិរីគឺចម្ងាយ ៣៥០ គីឡូម៉ែត្រ អីចឹងទាំងទៅទាំងមកគឺ ៧០០ គីឡូម៉ែត្រ»។

លោក នេត្រ ភក្រ្តា បានបញ្ជាក់ថា ដោយសារតម្រាយផ្លូវធ្វើដំណើរទីមួយកាត់តាមផ្លូវជាតិលេខ ៨ ឆ្លងកាត់ស្ពានព្រែកតាមាក់ ក៏បានភ្ជាប់ដំណើរទស្សនកិច្ចជាមួយការចុះទៅទស្សនានៅភូមអន្លង់ជ្រៃ និងភូមិថ្លុកត្រាចក្នុងខេត្តត្បូងឃ្មុំ ដែលស្ថិតនៅជាប់ព្រំដែនជាមួយប្រទេសវៀតណាម។

បើតាមលោក នេត្រ ភក្រ្តា ការរៀបចំដំណើរទស្សនកិច្ចនៅទិសឦសាន ដើម្បីលុបមន្ទិលសង្ស័យដល់ពលរដ្ឋបានមើលឃើញជាក់ស្តែងនៃការបោះបង្គោលព្រំដែន ចៀសវាងជឿលើការអុជអាលពីមជ្ឈដ្ឋានជ្រុលនិយម។

«គោលដៅនៃដំណើរទស្សនកិច្ចទិសឦសាន គឺដើម្បីផ្តល់ឱកាសជូនសាធារណជនបានឃើញ និងស្វែងយល់ពីស្ថានភាពជាក់ស្ដែងនៃបណ្តាខេត្តជាប់នឹងព្រំដែនជាមួយប្រទេសវៀតណាម និងឡាវនិងស្វែងយល់ឱ្យបានស៊ីជម្រៅពីបច្ចេកទេសកិច្ចការព្រំដែន និងកិច្ចខិតខំប្រឹងប្រែងក្នុងការអភិវឌ្ឍ និងការពារអធិបតេយ្យភាពជាតិកម្ពុជា និងបូរណភាពដែនដី លុបបំបាត់ការយល់ខុសលើកិច្ចការព្រំដែនពីសំណាក់សាធារណជនមួយចំនួនតូច»។

ដំណើរការទស្សនកិច្ចនេះ បើកឲ្យពលរដ្ឋគ្រប់មជ្ឍដ្ឋានអាចចុះឈ្មោះតាមប្រព័ន្ធអនឡាញ ហើយការចុះឈ្មោះអនុវត្តតាមគោលការណ៍អ្នកចុះឈ្មោះមុនបានមុន។ នេះបើតាមលោក នេត្រ ភក្រ្តា។

ដំណើរទស្សនកិច្ចនៅខេត្តទិសឦសានបែងចែកជា ៣ ទីតាំង។ ទីតាំងទី១ តាមតំបន់បណ្ដោយព្រំដែនក្នុង «ខេត្តត្បូងឃ្មុំ-ក្រចេះ-មណ្ឌលគីរី» រយៈពេលមួយថ្ងៃ ចម្ងាយសរុបទាំងទៅទាំងមកជាង ៧០០ គីឡូម៉ែត្រ។ ទីតាំងទី២ តាមតំបន់បណ្ដោយព្រំដែនក្នុង «ខេត្តក្រចេះ-មណ្ឌលគិរី» រយៈពេល ២ ថ្ងៃ ចម្ងាយសរុបទាំងទៅទាំងមក ១ ១១៣ គីឡូម៉ែត្រ និងទីតាំងទី ៣ គឺតាមតំបន់បណ្តោយព្រំដែនក្នុង «ខេត្តស្ទឹងត្រែង រតនគីរី» រយៈពេល ២ ថ្ងៃ សរុបចម្ងាយទាំងទៅទាំងមក ១ ១១២ គីឡូម៉ែត្រ។

ដំណើរទស្សនកិច្ចនេះគឺមួយជើងមួយទីតាំង ដោយកម្រិតអ្នកចូលរួមមួយលើកអនុញ្ញាតិបានត្រឹមតែ ២០០ នាក់ប៉ុណ្ណោះ។

សម្រាប់ដំណើរទស្សនកិច្ចនេះដែរ ចាប់ផ្តើមពីខែកញ្ញាដល់ខែធ្នូឆ្នាំ ២០២៤ នៅរៀងរាល់ថ្ងៃសៅចុងសប្តាហ៍ ហើយរាល់ការធ្វើដំណើរ អ្នកចូលរួមនឹងមិនចំណាយអ្វីទាំងអស់ទាំងការហូបចុក ការធ្វើដំណើរ រួមទាំងការស្នាក់នៅសម្រាប់ទីតាំងមួយចំនួន។

ពាក់ព័ន្ធនឹងដំណើរទស្សនកិច្ចនេះ បើតាមលោក នេត ភក្រ្តា ដែលជាប្រធានក្រុមការងារសម្របសម្រួលដំណើរទស្សនកិច្ចផងនោះបានគូសបញ្ជាក់ថា រាល់ការចំណាយទាំងអស់គឺឧបត្ថម្ភដោយសម្តេចមហាបវរធិបតី ហ៊ុន ម៉ាណែត និងលោកជំទាវបណ្ឌិត និងការចូលរួមចំណែកឧបត្ថម្ភពីសប្បុរសជន ដោយមិនប៉ះពាល់ដល់កញ្ចប់ថវិការដ្ឋ ឬកញ្ចប់ថវិកាមូលនិធិកសាងហេដ្ឋារចនាសម្ព័ន្ធតាមព្រំដែននោះទេ៕