ក្រសួងរ៉ែ និងថាមពល ប្រាប់ពលរដ្ឋ ដែលកំពុងធ្វើអាជីវកម្មរ៉ែអនាធិបតេយ្យ ឱ្យបញ្ឈប់សកម្មភាពខុសច្បាប់ទាំងនេះ

នៅរសៀលថ្ងៃទី០៥ ខែតុលា ឆ្នាំ២០២៤ នេះ ក្រសួងរ៉ែ និងថាមពល បានប្រាប់ប្រជាពលរដ្ឋ ដែលកំពុងធ្វើអាជីវកម្មរ៉ែអនាធិបតេយ្យ ឱ្យបញ្ឈប់នូវរាល់សកម្មភាពខុសច្បាប់ទាំងនេះ។ ក្រសួងនឹងចុះបង្ក្រាបជាបន្តបន្ទាប់ រាល់សកម្មភាពរ៉ែអនាធិបតេយ្យនៅកម្ពុជា។

បន្ថែមពីនេះ ក្រសួងបានជំរុញឱ្យមានការធ្វើអាជីវកម្មរ៉ែ ដោយស្របច្បាប់ដែលនាំមកនូវផលប្រយោជន៍ជាតិជាច្រើនមានជាអាទិ៍ ការបង្កើតឱ្យមានឱកាសការងារនៅនឹងកន្លែង និងប្រយោល ការចូលរួមចំណែកដល់ការបង្កើតប្រភពចំណូលថវិកាជាតិបន្ថែម និងការបំបាត់នូវផលប៉ះពាល់ធ្ងន់ធ្ងរដល់បរិស្ថាន និងសង្គម ព្រមទាំងចូលរួមចំណែកអភិវឌ្ឍសហគមមូលដ្ឋានតាមរយៈការធ្វើអាជីវកម្មរ៉ែប្រកបដោយចីរភាព។

ជាមួយគ្នានេះ ក្រសួងក៏បានអំពាវនាវដល់គ្រប់ភាគីពាក់ព័ន្ធចូលរួមការអនុវត្តច្បាប់ និងទប់ស្កាត់បទល្មើសទាំងនេះដោយធ្វើការជូនដំណឹងអំពីសកម្មភាពរ៉ែអនាធិបតេយ្យមកក្រសួងរ៉ែ និងថាមពល តាមរយៈលេខទូរសព្ទ ០៩៥ ៧២៧ ៧២៧៕