ព័ត៌មានជាតិ

៩ ខែ ឆ្នាំនេះ ខ្យល់កន្ត្រាក់បណ្តាលឱ្យមនុស្សស្លាប់-របួសជាង ៤០ នាក់ និងបំផ្លាញផ្ទះជាង ៤០០ ខ្នង ថយចុះជាងឆ្នាំមុន

បានផុស

៧ ខែ មុន

នៅ

ថ្ងៃសុក្រ ១១ តុលា ២០២៤

ដោយ

នៅក្នុងរយៈពេល ៩ ខែ ឆ្នាំ ២០២៤ នេះ ខ្យល់កន្ត្រាក់បានកើតឡើងជាង ២៦៩ លើក បណ្តាលឱ្យមនុស្សស្លាប់ និងរបួសជាង ៤០ នាក់ រលំ និងរបើកដំបូលផ្ទះជាង ៤ ០០០ ខ្នង និងហេដ្ឋារចនាសម្ព័ន្ធមួយចំនួនទៀតផងដែរ។

លោក សុទ្ធ គឹមកុលមុនី អ្នកនាំពាក្យគណៈកម្មាធិការជាតិគ្រប់គ្រងគ្រោះមហន្តរាយ បានមានប្រសាសន៍នៅព្រឹកថ្ងៃទី ១១ តុលា នេះថា ខ្យល់កន្ត្រាក់ក្នុងរយៈពេល ៩ ខែ ឆ្នាំនេះ បានកើតឡើងចំនួន ២៦៩ លើក បណ្តាលឱ្យរលំផ្ទះ ៤៩០ ខ្នង របើកដំបូលផ្ទះ ៣ ៩៣៥ ខ្នង សាលារៀន ៥២ ខ្នង តូប ផ្សារ ៣៩ តូប អគាររដ្ឋបាល ២៣ កន្លែង ស្លាប់មនុស្ស ៥ នាក់ និងរបួស ៣៩ នាក់។

លោកបានបន្តថា ក្នុងចំណោមអ្នកស្លាប់ចំនួន ៥ នាក់ ក្នុងនោះមាន ១ នាក់ ស្លាប់ នៅខេត្តរតនគីរី ពោធិ៍សាត់ ១ នាក់ បាត់ដំបង ១ នាក់ សៀមរាប ១ នាក់ និងខេត្តព្រះវិហារ ១ នាក់។

លោក សុទ្ធ គឹមកុលមុនី បានបន្តថា តួលេខនេះបើធៀបទៅនឹងរយៈពេល ៩ ខែ ដូចឆ្នាំមុនឃើញថា អត្រាស្លាប់ និងរបួស មានការថយចុះ ខណៈឆ្នាំមុនខ្យល់កន្ត្រាក់បានកើតឡើងចំនួន ២៦៣ លើក បណ្តាលឱ្យរលំផ្ទះ ១ ៩៥៦ ខ្នង របើកដំបូលផ្ទះ ១២ ៦៦៤ ខ្នង សាលារៀន ៩១ ខ្នង តូបផ្សារ ៧៧ តូប អគាររដ្ឋបាល ៩៩ កន្លែង ស្លាប់មនុស្ស ៩ នាក់ និងរបួស ១៦៩ នាក់។

លោកបានបន្តទៀតថា ក្នុងចំណោមអ្នកស្លាប់ចំនួន ៩ នាក់ ក្នុងនោះមាន ១ នាក់ ស្លាប់នៅខេត្តស្ទឹងត្រែង ក្រចេះ ១ នាក់ កំពង់ចាម ១ នាក់ កោះកុង ១ នាក់ កំពត ១ នាក់ កំពង់ឆ្នាំង ២ នាក់ និងខេត្តសៀមរាបស្លាប់ ២ នាក់៕

អត្ថបទ ៖ សំអឿន