មណ្ឌលអប់រំកែប្រែចំនួន៤ ដែលទទួលការ​អនុវត្ត​ឃុំឃាំង​ខុសៗគ្នា

ដើម្បីធានាបាននូវប្រសិទ្ធភាពក្នុងការអនុវត្តមុខងាររបស់មណ្ឌលអប់រំកែប្រែ និងពន្ធនាគាររាជធានី-ខេត្ត ឱ្យស្របទៅតាមស្ថានភាពជនជាប់ឃុំ និងស្ថានភាពពន្ធនាគារ កម្ពុជាបានកំណត់ការបែងចែកគោលដៅឃុំឃាំងជនជាប់ឃុំ តាមមណ្ឌលអប់រំកែប្រែចំនួន៤ ផ្សេងៗគ្នា។

យោងតាមប្រកាស ស្តីពីការកំណត់គោលដៅឃុំឃាំងជនជាប់ឃុំសម្រាប់មណ្ឌលកែប្រែ និងពន្ធនាគាររាជធានី-ខេត្ត ចេញដោយក្រសួងមហាផ្ទៃ ឆ្នាំ២០២២ ប្រការ៣ បានចែងថា មណ្ឌលអប់រំកែប្រែ មានមុខងារគ្រប់គ្រងជនជាប់ឃុំជាទណ្ឌិត ក្នុងគោលដៅអនុវត្តកម្មវិធីអប់រំកែប្រែបណ្តុះបណ្តាលវិជ្ជាជីវៈ ស្តារនីតិសប្បទា និងកម្មវិធីសមាហរណកម្ម។ ក្នុងនោះ មណ្ឌលអប់រំកែប្រែចំនួន៤ ទទួលការ​អនុវត្ត​ឃុំឃាំង​ខុសៗគ្នា រួមមាន មណ្ឌលអប់រំកែប្រែទី១ មណ្ឌលអប់រំកែប្រែទី២ មណ្ឌលអប់រំកែប្រែទី៣ និងមណ្ឌលអប់រំកែប្រែទី៤។

មណ្ឌលអប់រំកែប្រែទី១ មានទីតាំងនៅក្នុងរាជធានីភ្នំពេញ ទទួលអនុវត្តឃុំឃាំងជនជាប់ឃុំបុរសជាទណ្ឌិត ដែលត្រូវបានតុលាការផ្តន្ទាទោសដាក់ពន្ធនាគារ ចាប់ពី​ ៥ឆ្នាំ រហូតដល់ក្រោម ១៥ឆ្នាំ។ មណ្ឌលអប់រំកែប្រែទី២ មានទីតាំងនៅក្នុងរាជធានីភ្នំពេញ ទទួលអនុវត្តឃុំឃាំងជនជាប់ឃុំស្ត្រីជាទណ្ឌិត។ មណ្ឌលអប់រំកែប្រែទី៣ មានទីតាំងនៅក្នុងខេត្តត្បូងឃ្មុំ ទទួលអនុវត្តឃុំឃាំងជនជាប់ឃុំបុរសជាទណ្ឌិត ដែលត្រូវបានតុលាការផ្តន្ទាទោសដាក់ពន្ធនាគារ ចាប់ពី ១៥ឆ្នាំ រហូតមួយជីវិត។ ចំណែក មណ្ឌលអប់រំកែប្រែទី៤ មានទីតាំងនៅក្នុងខេត្តពោសាធិ៍សាត់ ទទួលអនុវត្តឃុំឃាំងជនជាប់ឃុំបុរសជាទណ្ឌិត ដែលត្រូវបានតុលាការផ្តន្ទាទោសដាក់ពន្ធនាគារក្រោម ៥ឆ្នាំ ឬអនុវត្តទោសពន្ធនាគារនៅសល់ក្រោម ៥ឆ្នាំ។

តាមប្រការ៤ នៃប្រកាសដដែល ពន្ធនាគាររាជធានី-ខេត្ត មានមុខងារគ្រប់គ្រងជនជាប់ឃុំកំពុងស្ថិតក្នុងដំណើរការនីតិវិឌីតុលាការ និងអាចរក្សាទុកជនជាប់ឃុំជាទណ្ឌិត ដែលស្ថិតក្នុងចំណាត់ថ្នាក់សន្តិសុខទាប បានត្រឹមចន្លោះពី១០% ទៅ ១៥% នៃចំនួនទណ្ឌិតសរុបជាក់ស្តែង សម្រាប់ទុកបម្រើសេវានានាក្នុងពន្ធនាគារ៕