ខែកញ្ញាកន្លងទៅ យន្តការច្រកចេញចូលតែមួយ រកចំណូលបានជាង១០ពាន់លានរៀល

ពេញមួយខែកញ្ញា កន្លងទៅ យន្តការច្រកចេញចូលតែមួយ បានបម្រើសេវាប្រជាពលរដ្ឋជិត ៤សែនសេវា និងរកបានចំណូលសរុបជាង ១០ពាន់លានរៀល។ នេះបើតាមលោក ទូច សុឃៈ អ្នកនាំពាក្យរងក្រសួងមហាផ្ទៃ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ទូច សុឃៈ បានឱ្យដឹងថា សម្រាប់អង្គភាពច្រកចេញចូលតែមួយរាជធានី-ខេត្ត បានផ្ដល់សេវាជូនប្រជាពលរដ្ឋសរុបជាង ៨ម៉ឺនសេវា ក្នុងនោះ ពីចំណែកនៃវិស័យទាំង១៤ សេវាផ្តល់ច្រើនជាងគេ គឺវិស័យរៀបចំដែនដីនគររូបនីយកម្ម និងសំណង់ មានជាង ៣ម៉ឺនសេវា តាមពីក្រោយដោយវិស័យរដ្ឋបាលមានជាង ១ម៉ឺនសេវា ខណៈសេវាតិចជាង គេ គឺវិស័យពាណិជ្ជកម្មមានចំនួន ១សេវា។ 

លោក ទូច សុឃៈ បន្ថែមថា សេវាដែលបានផ្ដល់នៅអង្គភាព​ច្រកចេញចូលតែមួយរាជធានី-ខេត្តបានផ្ដល់ចំណូលជូនរដ្ឋសរុបជាង ១០ពាន់លានរៀល ស្មើនឹង២៥០០លានដុល្លារ ក្នុងនោះវិស័យទទួលបានចំណូលច្រើនជាងគេ គឺវិស័យរៀបចំដែនដីនគររូបនីយកម្ម និងសំណង់ជាង៧៧០០លានរៀល វិស័យសាធារណការ និងដឹកជញ្ជូនជាង៧០០លានរៀល និងវិស័យដែលទទួលចំណូលតិចជាងគេ​​ គឺវិស័យពាណិជ្ជកម្ម២សែនរៀល។ 

ចំណែក ការិយាល័យច្រកចេញចូលតែមួយក្រុង ស្រុក ខណ្ឌ លោកអ្នកនាំពាក្យរង បានឱ្យដឹងថា ខែកញ្ញាដូចគ្នា មន្រ្តីបានផ្តល់សេវាជាង​ ៣សែនសេវា។ ក្នុងចំណោមវិស័យទាំង១៧ អ្នកនាំពាក្យរង បានបន្ថែមថា ការងារអត្រានុកូលដ្ឋានផ្តល់បាន២សែនសេវា ការងារអត្រានុកូលកម្មផ្តល់បាន១សែនសេវា ខណៈវិស័យផ្តល់តិចជាងគេ គឺវិស័យកសិកម្មមានចំនួន ២៥សេវា។ សេវាសរុប បានផ្ដល់ចំណូលជូនរដ្ឋជាង៨០០លានរៀល គិតជាដុល្លារប្រមាណ២សែនដុល្លារ ខណៈចំណូលខ្ពស់ជាងគេ គឺវិស័យសុរិយោដី និងវិស័យសំណង់ គ្រាដែលវិស័យកសិកម្មមានអ្នកស្នើតិចជាងគេ។ 

គួរជម្រាបថា យន្តការច្រកចេញចូលតែមួយ បានក្លាយជាមធ្យោបាយផ្ដល់សេវាដ៏មានប្រជាប្រិយភាពមួយនៅកម្ពុជា ដ្បិតសម្រាប់ពលរដ្ឋ យន្តការនេះបានបញ្ចប់ភាពស្មុគស្មាញនៃនីតិវិធី បញ្ចប់អំពើពុករលួយ កាត់បន្ថយពេលវេលា និងទទួលបាននូវសេវាប្រកបដោយគុណភាព។ បច្ចុប្បន្ន សេវាច្រកចេញចូលតែមួយ ពុំមែនមានតែនៅថ្នាក់រាជធានីខេត្តក្រុងស្រុកខណ្ឌនោះទេ មាននៅឃុំសង្កាត់ ជាបន្តបន្ទាប់ ក៏បាននិងកំពុងដំណើរការច្រកចេញចូលតែមួយនេះផងដែរ៕