អ្នកនាំពាក្យរដ្ឋាភិបាលប្រកាសថា ការដកខ្លួនពីCLV មិនត្រូវការឆ្លងកាត់រដ្ឋសភា ឬឡាយព្រះហស្តលេខាពីព្រះមហាក្សត្រទេ

អ្នកនាំពាក្យរាជរដ្ឋាភិបាលកម្ពុជា បានចេញមកបញ្ជាក់ថា ការដកខ្លួនពីCLV-DTA មិនត្រូវការឆ្លងកាត់រដ្ឋសភា ឬឡាយព្រះហស្តលេខាពីព្រះមហាក្សត្រទេ។ អ្នកនាំពាក្យរាជរដ្ឋាភិ​បាលកម្ពុជាចេញមកបញ្ជាក់ដូច្នេះ គឺបន្ទាប់ពីសង្កេតឃើញថា ក្រុមប្រឆាំងជ្រុលនិយមមួយក្តាប់តូចនៅក្រៅស្រុក នៅតែបន្តយកបញ្ហាCLV-DTA ធ្វើបាតុកម្មម្ដងហើយម្ដងទៀត ដោយក្រុមដែលមាននិន្នាការប្រឆាំងទាំងនោះលើកឡើងថា ដើម្បីបញ្ចប់កិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា ឡាវ វៀតណាម គឺត្រូវតែឆ្លងកាត់ការអនុម័តពីរដ្ឋសភា និងត្រូវមានការឡាយព្រះហស្តលេខាដោយព្រះមហាក្សត្រ នៃព្រះរាជាណាចក្រកម្ពុជា។

តាមរយៈសេចក្ដីថ្លែងការណ៍ ចេញនៅថ្ងៃអង្គារ នេះ អ្នកនាំពាក្យរាជរដ្ឋាភិបាលកម្ពុជា សង្កត់ធ្ងន់ថា៖«តំបន់អភិវឌ្ឍន៍ត្រីកោណកម្ពុជា ឡាវ និងវៀតណាម (CLV-DTA) គឺជាកិច្ចសហប្រតិបត្តិការធម្មតារវាងរាជរដ្ឋាភិបាលនៃព្រះរាជាណាចក្រកម្ពុជា និងរដ្ឋាភិបាលនៃសាធារណរដ្ឋប្រជាធិបតេយ្យប្រជាមានិតឡាវ និងរដ្ឋាភិបាលនៃសាធារណរដ្ឋសង្គមនិយមវៀតណាម ដោយមិនត្រូវការឆ្លងកាត់ការផ្តល់សច្ចាប័នពីរដ្ឋសភា ឬការឡាយព្រះហស្តលេខាពីព្រះមហាក្សត្រទេ។ ដូច្នេះ ការដកខ្លួនចេញពីកិច្ចសហ-ប្រតិបត្តិការនេះ គឺជាការសម្រេចរបស់រាជរដ្ឋាភិបាលតែប៉ុណ្ណោះ។»។

អ្នកនាំពាក្យបានចាត់ទុកថា ក្រុមដែលមាននិន្នាការប្រឆាំងនៅក្រៅប្រទេសមួយក្ដាប់តូច កំពុងតែបន្តយកប្រធានបទកិច្ចសហប្រតិបត្តិការណ៍តំបន់ត្រីកោណអភិវឌ្ឍន៍កម្ពុជា ឡាវ និងវៀតណាម ដែលហៅកាត់ថា CLV-DTA ទៅធ្វើអាជីវកម្មនយោបាយទាំងងងឹតងងុល ដោយនិយាយទាំងមិនយល់អ្វីទាំងអស់។

អ្នកនាំពាក្យរាជរដ្ឋាភិបាលយល់ឃើញថា ការបន្តយកបញ្ហានេះមកធ្វើអាជីវកម្ម គឺសរបញ្ជាក់ពីកង្វះខាតចំណេះដឹង ខ្វះការស្រាវជ្រាវ និងខ្វះការយល់ដឹងខាងផ្លូវច្បាប់យ៉ាងខ្លាំងពីសំណាក់ក្រុមប្រឆាំងជ្រុលនិយម។ អ្នកនាំពាក្យ ចាត់ទុកសកម្មភាពបែបនេះ មិនត្រឹមតែមិនបានជួយអ្វីដល់ប្រទេសជាតិប៉ុណ្ណោះទេ ប៉ុន្តែវាជាសកម្មភាពបំផ្លិចបំផ្លាញ និងពង្វក់ស្មារតីយុវជនមួយចំនួនឱ្យវង្វេងតាមមនោគមវិជ្ជានយោបាយជ្រុលនិយមដ៏ខ្មៅកខ្វក់ និងដ៏គ្រោះថ្នាក់របស់ក្រុមដែលមាននិន្នាការប្រឆាំងជ្រុលនិយមតែប៉ុណ្ណោះ​​​។

អ្នកនាំពាក្យរាជរដ្ឋាភិបាល បញ្ជាក់ជូនថា រាជរដ្ឋាភិបាល នីតិកាលទី៧  នៃរដ្ឋ​សភា ដឹកនាំដោយ សម្តេច ហ៊ុន ម៉ាណែត នាយករដ្ឋមន្ត្រីក្រកម្ពុជា មានគោលនយោបាយច្បាស់លាស់ និងមានឆន្ទៈមោះមុតក្នុងការអភិវឌ្ឍប្រទេសបន្តពី សម្តេច ហ៊ុន សែន ដោយធានាការពារឱ្យបានជាដាច់ខាតនូវសុខសន្តិភាព ស្ថិរភាពនយោបាយ និងការអភិវឌ្ឍលើគ្រប់វិស័យ ដើម្បីឈានឆ្ពោះទៅសម្រេចចក្ខុវិស័យកម្ពុជាឆ្នាំ២០៥០ ក្លាយជាប្រទេសដែលមានចំណូ​ល​ខ្ពស់តាមការគ្រោងទុក ដោយមិនអនុញ្ញាតឱ្យក្រុមជ្រុលនិយមមកបំផ្លិចបំផ្លាញ ឬរារាំងដំណើរ​​​ការកសាងជាតិបានជាដាច់ខាត។

អ្នកនាំពាក្យ នៅតែអះអាងថា រាជរដ្ឋាភិបាលប្តេជ្ញាបន្តការអភិវឌ្ឍតំបន់ព្រំដែនភូមិភាគឦសាន ក៏ដូចជាតំបន់ព្រំដែនទូទាំងប្រទេស ឱ្យកាន់តែរីកចម្រើន ដោយរក្សាឱ្យបានជាដាច់ខាតនូវអធិបតេយ្យភាពជាតិ ​និងបូរណភាពទឹកដី មិនឱ្យបាត់បង់សូម្បីមួយមិលី្លម៉ែត្រឡើយ និងបន្តរក្សាស្ថានភាពព្រំដែនមិត្តភាព សន្តិភាព កិច្ចសហប្រតិបត្តិការ និងការអភិវឌ្ឍ ដើម្បីឧត្តមប្រយោជន៍ជូនប្រទេសជាតិ និងប្រជាពលរដ្ឋ។

នៅក្នុងសេចក្ដីថ្លែងការណ៍ ដែលចេញនៅថ្ងៃទី២៩ ខែតុលា នេះ ជាចុងក្រោយ អ្នកនាំពាក្យរាជរដ្ឋាភិបាលកម្ពុជា អំពាវនាវឱ្យក្រុមដែលមាននិន្នាការប្រឆាំងជ្រុលនិយមទាំងឡាយ បញ្ឈប់ការ​យកបញ្ហា CLV-DTA ទៅធ្វើអាជីវកម្មនយោបាយបែបញុះញង់ និងបំផ្លិចបំផ្លាញតទៅទៀត។

សូមរំលឹកថា កាលពីថ្ងៃទី២០ ខែកញ្ញា ក្រោយពីឆ្លងការជជែកពិភាក្សារវាងសម្ដេចតេជោ ហ៊ុន សែន និងសម្ដេចធិបតី ហ៊ុន ម៉ាណែត នាយករដ្ឋមន្ត្រីកម្ពុជា ជាមួយថ្នាក់ដឹកនាំជាន់ខ្ពស់ដទៃទៀត ក៏ បានសម្រេចចិត្ដដកកម្ពុជា ចេញពី CLV-DTA។

ដើម្បីដកខ្លួនចេញពី CLV-DTA តាមនីតិវិធីផ្លូវការ រដ្ឋមន្ត្រីក្រសួងការបរទេស បានផ្ញើលិខិតផ្លូវការទៅកាន់ភាគីឡាវ និងវៀតណាម។ នៅក្នុងលិខិតផ្លូវការនៅបានបញ្ជាក់ថា កម្ពុជា សម្រេចចិត្តដកខ្លួនចេញពី CLV-DTA បន្ទាប់ពីបានពិចារណា និងវាយតម្លៃដោយម៉ត់ចត់ ពីវឌ្ឍនភាពនៃ CLV-DTA រួចមក កម្ពុជាយល់ថា កិច្ចសហប្រតិបត្តិការនេះបានឈានដល់គោលដៅរបស់ខ្លួនហើយ។ កម្ពុជាជឿថា ប្រទេសនីមួយៗមានសមត្ថភាពគ្រប់គ្រាន់ ដើម្បីបន្ត និងធានាការអភិវឌ្ឍជាតិរៀងខ្លួន៕