ពិព័រណ៍ប្រភពផ្គត់ផ្គង់សម្ភារៈវិស្វកម្មអន្តរជាតិ លើកទី១២នឹងធ្វើឡើងនៅចុងខែនេះនៅប្រទេសឥណ្ឌា

ក្រសួងពាណិជ្ជកម្មបានអំពាវនាវដល់ម្ចាស់ក្រុមហ៊ុនឬសហគ្រាស និងសាធារណជនចូលរួម​ ពិព័រណ៍ប្រភពផ្គត់ផ្គង់សម្ភារៈវិស្វកម្មអន្តរជាតិ លើកទី១២ (​IESS)” ដែលនឹងប្រព្រឹត្តទៅនាចុងខែវិច្ឆិកាខាងមុខនៅទីក្រុងចេនណៃ ប្រទេសឥណ្ឌា ដែលនឹងផ្តល់ឱកាសដល់ម្ចាស់សហគ្រាស និងធុជនកម្ពុជាអាចស្វែងរកដៃគូរពាណិជ្ជកម្មដោយផ្ទាល់ផងដែរ។

បើយោងតាមសេចក្តីជូនដំណឹងរបស់ក្រសួង ពិព័រណ៍នេះនឹងប្រព្រឹត្តទៅចាប់ពីថ្ងៃទី២៧-២៩ ខែវិច្ឆិកា ឆ្នាំ២០២៤ នៅទីក្រុងចេនណៃ ប្រទេសឥណ្ឌា។​

«IESS គឺជាវេទិកាដ៏ធំបំផុតមួយដែលផ្តោតលើការជំរុញពាណិជ្ជកម្មនិងវិនិយោគអន្តរជាតិក្នុងវិស័យ វិស្វកម្មនៅក្នុងប្រទេសឥណ្ឌា តាមរយៈការតាំងពិព័រណ៍ ជំនួបអាជីវកម្មនិងអាជីវកម្ម(B2B) ជំនួបអ្នកលក់ និងអ្នកផ្គត់ផ្គង់ផលិតផលសកល និងសិក្ខាសាលា»។ នេះបើយោងតាមក្រសួងពាណិជ្ជកម្ម។

គណៈកម្មការរៀបចំ នឹងផ្តល់ឱ្យក្រុមហ៊ុន/សហគ្រាសកម្ពុជា នូវការស្នាក់នៅរយៈពេល២យប់ដោយឥតគិតថ្លៃ ការប្រជុំB2Bជាមួយអ្នកតាំងពិព័រណ៍ឥណ្ឌា ការធ្វើដំណើរទៅ- មកពីអាកាសយានដ្ឋាន និងការអញ្ជើញចូលរួមកម្មវិធីការតភ្ជាប់បណ្តាញធុរកិច្ច។

«ក្រសួងពាណិជ្ជកម្ម នៃព្រះរាជាណាចក្រកម្ពុជាក្នុងនាមអ្នកសម្របសម្រួល សូមអញ្ជើញ លោក លោកស្រី ជាម្ចាស់ក្រុមហ៊ុន/សហគ្រាស អ្នកនាំចូល និងសាធារណជនទូទៅ ដែលមានបំណងចង់ចូលរួមក្នុងព្រឹត្តិការណ៍ ពិព័រណ៍ខាងលើ សូមចុះឈ្មោះចូលរួមតាមរយៈគេហទំព័រ https://lesshow.in/overseas-buyer/»៕

​