ព័ត៌មានជាតិ

សិក្ខាកាម២៣រូប បានបញ្ចប់វគ្គបណ្តុះបណ្តាលគ្រូកីឡាវាយកូនឃ្លីលើតុដោយជោគជ័យ

បានផុស

១ year មុន

នៅ

ថ្ងៃអង្គារ ១០ ធ្នូ ២០២៤

ដោយ

វគ្គសាមគ្គីអូឡាំពិកស្តីពីគ្រូបង្វឹកកីឡាវាយកូនឃ្លីលើតុនៃសហព័ន្ធកីឡាវាយកូនឃ្លីលើតុ អន្តរជាតិ និងកីឡាវាយកូនឃ្លីលើតុប៉ារ៉ាកម្រិត១ និងការបោះជំរុំហ្វឹកហាត់ បានបញ្ចប់ទៅភាពជោគជ័យ។

ក្នុងពិធីបិទវគ្គវគ្គបណ្តុះបណ្តាលនេះ មានវត្តមានតំណាងគណៈកម្មាធិការជាតិអូឡាំពិកកម្ពុជា សហព័ន្ធកីឡាវាយកូនឃ្លីលើតុកម្ពុជា និងនាយកដ្ឋានអភិវឌ្ឍកីឡាវាយកូនឃ្លីលើតុរបស់សហព័ន្ធកីឡាវាយកូនឃ្លីលើតុអន្តរជាតិ (ITTF) បានចូលរួមជាគណៈអធិបតីដើម្បីផ្ដល់វិញ្ញាបនបត្រ ដល់សិក្ខាកាមទាំងអស់ដែលបានបញ្ចប់វគ្គសិក្សា។

សិក្ខាកាមដែលបានបញ្ចប់វគ្គសិក្សា បានក្លាយជាធនធានសំខាន់ក្នុងការអភិវឌ្ឍនកីឡាវាយកូនឃ្លីលើតុ និងលើកស្ទួយវិស័យមួយនេះ ដើម្បីសម្រេចបាននៅសមិទ្ធផលថ្នាក់ទាំងជាតិ និងអន្ដរជាតិនាពេលខាងមុខ។

លោក ប៊ុយ សោភ័ណ្ឌ តំណាងគណៈកម្មាធិការជាតិអូឡាំពិកកម្ពុចា បានលើកឡើងថា ៖«ខ្ញុំសូមកោតសរសើរ និងវាយតម្លៃខ្ពស់ ចំពោះសិក្ខាកាមទាំងអស់តែបានយកចិត្តទុកដាក់ ស្រូបយកចំណេះដឹងថ្មីៗ និងគោលការណ៍គ្រឹះនៃបង្វឹកកីឡាវាយកូនឃ្លីលើតុ។ វគ្គបណ្ដុះបណ្ដាលនេះបានរួមចំណែកយ៉ាងសំខាន់ ក្នុងការអភិវឌ្ឍធនធានមនុស្សនៅក្នុងវិស័យកីឡាវាយកូនឃ្លីលើតុកម្ពុជា។ ខ្ញុំសង្ឃឹមថា សិក្ខាកាមទាំងអស់នឹងយកចំណេះដឹង និងបច្ចេកទេសថ្មីៗ យកទៅប្រើប្រាស់ និងអនុវត្តជាក់ស្តែង ជំរុញអត្ដពលិកឲ្យទទួលបានជោគជ័យ»។

ក្នុងរយៈមួយសប្តាហ៍ សិក្ខាកាមដែលចូលរួមពិតជាបានរៀនសូត្រ និងចំណេះដឹងថ្មីៗបន្ថែម ដើម្បីយកទៅពង្រឹងលើជំនាញដែលខ្លួនមានស្រាប់។ ក្នុងវគ្គបណ្តុះបណ្តាលគ្រូបង្វឹកកីឡាវាយកូនឃ្លីលើតុមាន១២វិញ្ញាសា៖

-ការបង្វឹកកម្រិតដំបូង និង តាមសាលារៀន (Beginner & School Level Coaching)

-មគ្គុទ្ទេសក៍ជំនួយអំពីការសង្គ្រោះបឋមកម្រិតស្រាល (Minor First Aid Guide)

-សកម្មភាពសប្បាយៗសម្រាប់បង្ហាត់កីឡាវាយកូនឃ្លីលើតុ (Table Tennis Fun Activities)

-ដំណាក់កាលមូលដ្ឋាន និងកម្រិតខ្ពស់ (Basic & Advanced Strokes)

-បច្ចេកទេសចេញសេវា (Serving Techniques)

-មូលដ្ឋានគ្រឹះនៃការដេផ្លាសេ ឬការបំលះទី (Basic Footwork)

-បច្ចេកទេសបោះបាល់ច្រើន (Multi Ball techniques)

-ប្រវត្តិ និងច្បាប់កីឡាវាយកូឃ្លីលើតុសម្រាប់ប៉ារ៉ា (History & Rules of Para Table Tennis)

-ការអប់រំកាយកម្រិតមូលដ្ឋាន (Basic Physical Training)

-ការរៀបចំផ្លូវចិត្តជាមូលដ្ឋាន / ដំណើរការចិត្តសាស្ត្រកីឡា (Basic Mental Preparation / Sports Psychology Process)

-ការចាត់ថ្នាក់កីឡាវាយកូនឃ្លីលើតុសម្រាប់ប៉ារ៉ា (Para Table Tennis Classification)

-ការរៀបចំ និងគ្រប់គ្រងការប្រកួត (Tournament Organisation & Competition Management)

សរុបសិក្ខាកាមសរុប២៣នាក់ក្នុងចំណោម២៥នាក់ ស្មើរនឹង៩២% ដែលជាចំនួនដ៏ល្អសម្រាប់វគ្គសិក្សា ITTF កម្រិត១៕