រដ្ឋបាលជលផលត្បូងឃ្មុំ លែងត្រីរាជ ញី ឈ្មោលពីរក្បាលទម្ងន់ជាង២០០គីឡូក្រាមចូលទន្លេវិញ

សមត្ថកិច្ចខណ្ឌរដ្ឋបាលជលផលត្បូងឃ្មុំ កាលពីថ្ងៃទី១០ ខែធ្នូ ឆ្នាំ២០២៤ សហការជាមួយរដ្ឋបាលជលផលអធិការដ្ឋានរដ្ឋបាលជលផលមេគង្គ កម្លាំងវរសេនាតូច​យោភូមិភាគ២ និងប្រជាពលរដ្ឋភូមិព្រែកតូច បានចូលរួមលែងត្រីរាជចំនួន ២ក្បាលទម្ងន់ជាង២០០គីឡូក្រាមចូលក្នុងទន្លេមេគង្គវិញ ស្ថិតនៅភូមិ​ព្រែកតូច ឃុំទន្លេបិទ​ ស្រុកត្បូងឃ្មុំ ខេត្តត្បូងឃ្មុំ។

ការចូលរួមលែងត្រីរាជញីឈ្មោលទម្ងន់ជាង២០០គីឡូក្រាមនេះ គឺធ្វើឡើងបន្ទាប់ពីប្រជាពលរដ្ឋនៅភូមិព្រែតូចនេសាទបាន រួចប្រគល់ជូនសមត្ថកិច្ចជលផល។​ តាមការបញ្ជាក់ពីមន្ត្រីជលផល ត្រីរាជទាំងពីរក្បាលនោះ ត្រីឈ្មោល ទម្ងន់ ៩៥គីឡូក្រាម ត្រីញី ទម្ងន់ ១២០គីឡូក្រាម។

សមត្ថកិច្ចខណ្ឌរដ្ឋបាលជលផលត្បូងឃ្មុំ បន្ថែមថា បទល្មើសនេសាទនៅចំណុចព្រែកសណ្តាន់ និងជុំវិញបឹងយាយស (បឹងជីធាង) ឃុំសេដា ស្រុកតំបែរ ពុំមានបទល្មើសណាមួយគួរឲ្យកត់សម្គាល់ទេ។ តែទោះយ៉ាងណាសមត្ថកិច្ចខណ្ឌរដ្ឋបាលជលផលត្បូងឃ្មុំ នៅតែបន្តសហការជាមួយកម្លាំងសហគមន៍នេសាទ ដើម្បីទប់ស្កាត់ការនេសាទខុសច្បាប់បន្ថែមទៀត។

ត្រីរាជ គឺជាប្រភេទត្រីទឹកសាប ដែលចូលចិត្តរស់នៅតាមបឹងទន្លេសាប និងតំបន់មេគង្គលើ ជាពិសេសតាមអន្លង់នៅក្នុងទន្លេមេគង្គ ក្នុងខេត្តក្រចេះ និងស្ទឹងត្រែង។ បច្ចុប្បន្នត្រីនេះ ត្រូវបានចាត់ថ្នាក់ក្នុងបញ្ជីក្រហម ជាត្រីកំពុងរងការគំរាមកំហែងយ៉ាងខ្លាំង ឈានទៅរកការផុតពូជ របស់អង្គការសហភាពអន្តរជាតិ ដើម្បីអភិរក្សធម្មជាតិ IUCN។ ត្រីរាជ ក៏ត្រូវបានហាមឃាត់ការនេសាទ ទិញលក់ និងដឹកជញ្ជូន ចាប់តាំងពីសម័យសង្គមរាស្ត្រនិយមមកម្ល៉េះ តាមរយៈក្រមនេសាទលេខ ៨០ ន.ស ចុះថ្ងៃទី២៣ ខែមេសា ឆ្នាំ១៩៥៦៕