ព័ត៌មានជាតិ

អ្នកនាំពាក្យ ៖ សពជនជាតិចិននៅតម្កល់ទុកនៅមន្ទីរពេទ្យនៅឡើយទេ រង់ចាំលទ្ធផលតេស្តសិន

បានផុស

៥ years មុន

នៅ

ថ្ងៃចន្ទ ១៥ មីនា ២០២១

ដោយ

លោក ឃាង ភារម្យ អ្នកនាំពាក្យសាលាខេត្តព្រះសីហនុបានឲ្យដឹងនៅល្ងាចថ្ងៃទី១៥នេះថាសាកសពជនជាតិចិន យើងកំពុងតម្កល់ទុកនៅមន្ទីរពេទ្យបង្អែកខេត្តព្រះសីហនុនៅឡើយទេ ដោយរង់ចាំលទ្ធផលតេស្តសិន ទើបសម្រេចថាត្រូវធ្វើយ៉ាងណាបន្តទៀត។

លោកបានបន្តថា ចំពោះសពជនជាតិចិននេះ សាលាខេត្តបានជូនដំណឹងនិងធ្វើការទំនាក់ទំនងជាមួយស្ថានទួតចិនរួចហើយ។

លោកបានបន្តទៀតថា «យើងនឹងរង់ចាំមើលការពិនិត្យបញ្ជាក់បន្ថែមទៀតពេលលទ្ធផលតេស្តបង្ហាញ»។

លោកបានបន្ថែមថា តាមការវាយតម្លៃបឋមរបស់ក្រុមគ្រូពេទ្យ គឺជនជាតិចិនដែលស្លាប់នោះមានជំងឺរ៉ាំរ៉ៃមានរលាកលំពែងនិងសួតរ៉ាំរ៉ៃនិងមានឡើងជាតិស្ករខ្ពស់។ក្នុងនោះក្រុមគ្រូពេទ្យបានយកសំណាកសពទៅធ្វើតេសត្តរកជំងឺកូវីដ១៩នៅវិទ្យាស្ថានប៉ាស្ទ័រផងដែរ។

គួរបញ្ជាក់ថា ជនជាតិចិនម្នាក់បានស្លាប់នៅក្នុងអំឡុងពេលធ្វើចត្តាឡីស័ក ក្នុងខេត្តព្រះសីហនុ នារសៀលថ្ងៃទី១៤ ខែមីនា ឆ្នាំ២០២១នេះមាន ឈ្មោះ RAO SHAOXING អាយុ២៧ឆ្នាំ កាន់លិខិតឆ្លងដែនលេខ EH4480832 បានចូលមកដល់ប្រទេសកម្ពុជា នៅថ្ងៃទី៣០ ខែធ្នូ ឆ្នាំ២០២០ តាមច្រកអាកាសយានដ្ឋានអន្តរជាតិខេត្តព្រះសីហនុ។

នៅថ្ងៃទី២៦ ខែកុម្ភៈ ឆ្នាំ២០២១ បានស្នាក់នៅ និងធ្វើចត្តាឡីស័កនៅបន្ទប់លេខ៩១៨ ក្នុងអគារស្នាក់នៅរួមរបស់បុគ្គលិកកាស៊ីណូ មួយកន្លែង ស្ថិតនៅភូមិ២ សង្កាត់លេខ៤ ក្រុងព្រះសីហនុ ខេត្តព្រះសីហនុ។ នៅយប់ថ្ងៃទី១៣ ខែមីនា ឆ្នាំ២០២១ វេលាម៉ោង២០:៤២នាទី ដោយបុរសរូបនេះមានអាការៈហត់ និងចុះខ្សោយខ្លាំង ក៏ត្រូវបានបញ្ជូនមកសង្គ្រោះបន្ទាន់នៅមន្ទីរពេទ្យបង្អែកខេត្តព្រះសីហនុ។

ដោយពិនិត្យឃើញថា បុរសរូបនេះ មានអាការៈកាន់តែធ្ងន់ធ្ងរ ដូចនេះក្រុមគ្រូពេទ្យបានរៀបចំបែបបទដើម្បីបញ្ជូនទៅសង្គ្រោះនៅរាជធានីភ្នំពេញ ប៉ុន្តែដោយបុរសរូបនេះមានស្ថានភាពសុខភាព ចុះខ្សោយពេកទើបធ្វើឲ្យគាត់ទទួលមរណភាព នៅវេលាម៉ោង០១និង៤៣នាទីរសៀល ថ្ងៃទី១៤ ខែមីនា ឆ្នាំ២០២១ នៅមន្ទីរពេទ្យបង្អែកខេត្តព្រះសីហនុ៕

ដោយ ៖ សំអឿន

Related Topics: