ព័ត៌មានជាតិ

មន្រ្តីជំនាញពន្យល់អត្ថន័យបច្ចេកទេស អគារជាប់គាំង និងគម្រោងវិនិយោគជាប់គាំងនៅខេត្តព្រះសីហនុ

បានផុស

២ years មុន

នៅ

ថ្ងៃពុធ ២៥ ធ្នូ ២០២៤

ដោយ

បញ្ហាអគារជាប់គាំង និងគម្រោងវិនិយោគជាប់គាំងក្នុងខេត្តព្រះសីហនុ ត្រូវបានរដ្ឋាភិបាលដាក់ចេញចំណាត់ការដោយបង្កើតក្រុមការងារពិសេសមួយ ដើម្បីជំរុញអគារជាប់គាំង និងគម្រោងវិនិយោគជាប់គាំងក្នុងខេត្តព្រះសីហនុ ឲ្យបន្តសកម្មភាពវិនិយោគឡើងវិញ។

នៅខេត្តព្រះសីហនុបើតាមមន្រ្តីក្រុមការងារជំរុញការវិនិយោគក្នុងខេត្តព្រះសីហនុបានអះអាងថា មានអគារជាប់គាំងសរុប ៥២៧ អគារ ខណៈអគារដែលជាប់គាំងចំនួន ១០៣ អគារត្រូវបានទទួលការលើកទឹកចិត្តពិសេសពីរដ្ឋាភិបាល ដើម្បីចាប់ផ្ដើមបន្តដំណើរការសាងសង់ឡើងវិញ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អុឹម សុខធី ប្រធានលេខាធិការដ្ឋាន នៃក្រុមការងារជំរុញការវិនិយោគក្នុងខេត្តព្រះសីហនុបានគូសបញ្ជាក់ថា រាជរដ្ឋាភិបាលកម្ពុជា បានដាក់ឱ្យអនុវត្ត «កម្មវិធីពិសេសជំរុញការវិនិយោគក្នុងខេត្តព្រះសីហនុ» ចំពោះគម្រោងវិនិយោគ ឬសកម្មភាពធុរកិច្ចមានទីតាំងស្ថិតនៅខេត្តព្រះសីហនុ។

លោកថា ចាប់តាំងពីឆ្នាំ ២០១៦ រាជរដ្ឋាភិបាលបានដាក់ចេញវិធានការជាកញ្ចប់ ដើម្បីដោះស្រាយគម្រោងវិនិយោគជាប់គាំងនៅខេត្តព្រះសីហនុ ពោលគឺរាល់គម្រោងវិនិយោគដែលបានផ្អាក ពន្យារ និងពុំមានសកម្មភាព ដើម្បីជំរុញការវិនិយោគឡើងវិញ។

ពាក់ព័ន្ធអគារជាប់គាំងនិងគម្រោងវិនិយោគជាប់គាំង លេខាធិការដ្ឋាននៃក្រុមការងារជំរុញការវិនិយោគក្នុងខេត្តព្រះសីហនុ លោក អុឹម សុខធី បានធ្វើការពន្យល់ពីពាក្យបច្ចេកទេសនៃអគារជាប់គាំង និងគម្រោងវិនិយោគជាប់គាំង តាមរយៈ «កម្មវិធីពិសេសជំរុញការវិនិយោគក្នុងខេត្តព្រះសីហនុ» ដែលកំពុងដាក់ឲ្យអនុវត្តចំពោះគម្រោងវិនិយោគ ឬសកម្មភាពធុរកិច្ចមានទីតាំងស្ថិតនៅខេត្តព្រះសីហនុ៕