ព័ត៌មានជាតិ

ខេត្តកោះកុងបញ្ជូនសំណាកអ្នកពាក់ព័ន្ធសហគន៍២០កុម្ភៈជាង៣០០០នាក់ទៅធ្វើតេស្តរកកូវីដ១៩

បានផុស

៥ years មុន

នៅ

ថ្ងៃអង្គារ ១៦ មីនា ២០២១

ដោយ

លោក ទូសាវុធ អភិបាលរងខេត្តកោះកុងបានមានប្រសាសន៍នៅល្ងាចថ្ងៃទី១៦នេះថា រហូតមកដល់ពេលនេះរដ្ឋបាលខេត្តបានបញ្ជូនសំណាកអ្នកដែលពាក់ព័ន្ធនឹងព្រឹត្តិការណ៍សហគមន៍២០កុម្ភៈជាង៣០០០នាក់ ជាបុគ្គលិកបម្រើការងារនៅក្នុងក្រុមហ៊ុនញូញៀនទៅធ្វើតេស្តរកមេរោគកូវីដ១៩។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបានបន្តថា ក្នុងចំណោមសំណាកជាង៣០០០នោះ ក្រសួងបានធ្វើតេស្តជាបន្តបន្ទាប់ដោយរកឃើញមានវិជ្ជមានកូវីដ១៩ចំនួន១៣នាក់ក្នុងនោះជនជាតិចិន១០នាក់ខ្មែរ២នាក់និងសឹង្ហបុរី១នាក់រួមទាំង៣នាក់នៅថ្ងៃទី១៦នេះផងដែរ។

លោកបានបន្តទៀតថា អ្នកឆ្លងកូវីដ១៩ចំនួន៣នាក់ចុងក្រោយនេះមានខ្មែរ២នាក់ដែលបានឆ្លងជាមួយជនជាតិចិន៨នាក់និងស្ត្រីចិន១នាក់ទៀតបានឆ្លងពីជនជាតិចិននិងសឹង្ហបុរីដែលបានរកឃើញជាលើកដំបូង។

យ៉ាងណាក៏ដោយ លោកបានបន្ថែមថា រដ្ឋបាលខេត្តកំពុងរង់ចាំសំណាកជាច្រើនទៀតដែលបានផ្ញើទៅធ្វើតេស្តដែលនៅមិនទាន់ចេញលទ្ធផល។

លោកបានបញ្ជាក់ថា «អ្វីដែលត្រូវធ្វើបន្តនោះគឺត្រូវធ្វើតេស្តអ្នកជាប់ពាក់ព័ន្ធដែលមានអ្នកខ្លះត្រូវធ្វើតេស្តលើកទី២ខ្លះលើកទី៣និងខ្លះទៀតដែលមានការពាក់ព័ន្ធផ្ទាល់រកមិនឃើញត្រូវធ្វើតេស្តជាលើកទី៤ជាបន្តទៀតដើម្បីឲ្យប្រកដប្រជាថាពួកគាត់មិនមានឆ្លងកូវីដ១៩ព្រោះថាមនុស្សដែលពាក់ព័ន្ធក្នុងក្រុមហ៊ុនញូញៀនយើងបានយកសំណាកអស់ហើយប្រមាណជាង៣០០០នាក់»។

លោក អភិបាលរងខេត្តកោះកុងបានឲ្យដឹងដែរថាអាជ្ញាធរបានស្នើសុំឲ្យក្រុមហ៊ុនផ្អាកការចេញចូលមួយរយៈសិនដោយអ្នកខាងក្រៅហាមចូលក្នុងក្រុមហ៊ុនហើយអ្នកនៅខាងក្នុងក្រុមហ៊ុនមិនត្រូវអនុញ្ញាតឲ្យចេញមកខាងក្រៅឡើយដើម្បីទុកលទ្ធភាពឲ្យក្រុមការងារធ្វើការស្រាវជ្រាវបន្ថែមរកអ្នកជាប់ពាក់ព័ន្ធជាមួយជនជាតិចិននិងសឹង្ហបុរី២នាក់ដែលមានតេស្តវិជ្ជមានកូវីដ១៩។

គួរបញ្ជាក់ថា គិតត្រឹមព្រឹកថ្ងៃទី១៦មីនា ឆ្នាំ២០២១នេះ មានអ្នកឆ្លងកូវីដ១៩ក្នុងព្រឹត្តិការណ៍សហគមន៍២០កុម្ភៈចំនួន៩១៥នាក់ ស្រី៤២៤ ប្រុស៤៩១នាក់ នៃអ្នកឆ្លងសរុប១៤៣០នាក់និងមានអ្នកជាសះស្បើយចំនួន៨១៨នាក់និងអ្នកកំពុងសម្រាលពេទ្យចំនួន៦០៩នាក់ ក្នុងនោះមានស្លាប់១នាក់៕

ដោយ ៖ សំអឿន