ព័ត៌មានជាតិ
ទំនាក់ទំនងជាង២២ឆ្នាំ កម្ពុជាសម្រេចបង្កើតស្ថានទូតនៅក្នុងប្រទេសទីម័រឡេស្តេ
ក្នុងទំនាក់ទំនងជាង ២២ឆ្នាំ កម្ពុជា សម្រេចបង្កើតស្ថានទូតផ្លូវការរបស់ខ្លួនប្រចាំនៅក្នុងប្រទេសទីម័រឡេស្តេតែម្ដង ខណៈបច្ចុប្បន្ន ស្ថានឯកអគ្គរាជទូតកម្ពុជាប្រចាំប្រទេសដែនកោះមួយនេះ មាននិវេសនដ្ឋាន នៅឯទីក្រុងហ្សាកាតា ប្រទេសឥណ្ឌូនេស៊ី។

យោងតាមអនុក្រឹត្យរបស់សម្ដេចធិបតី ហ៊ុន ម៉ាណែត ចុះកាលពីថ្ងៃទី២២ ខែតុលា ឆ្នាំ២០២៤ គឺរាជរដ្ឋាភិបាលកម្ពុជា បានសម្រេចបង្កើតស្ថានឯកអគ្គរាជទូតកម្ពុជាប្រចាំប្រទេសទីម័រឡេស្ដេ មាននិវេសនដ្ឋាន នៅទីក្រុងឌីលី ដែលជារដ្ឋធានីរបស់ប្រទេសនេះ។ ស្ថានឯកអគ្គរាជទូតនេះ ត្រូវដឹកនាំដោយប្រធានបេសកកម្ម១រូប មានឋានៈជាឯកអគ្គរាជទូតវិសាមញ្ញ និងពេញសមត្ថភាព។ ចំណែក សមាសភាពមន្ត្រីការទូត មន្ត្រីបច្ចេកទេស និងបុគ្គលិកសេវា នឹងត្រូវកំណត់តាមតម្រូវការនៃការងារជាក់ស្តែង។
គួរជម្រាបថា ព្រះរាជាណាចក្រកម្ពុជា និងសាធារណរដ្ឋប្រជាធិបតេយ្យទីម័រឡេស្តេ បានបង្កើតទំនាក់ទំនងនូវការទូត នៅថ្ងៃទី២៩ ខែកក្កដា ឆ្នាំ២០០២ ភ្លាមៗក្រោយទីម័រឡេស្តេបានក្លាយជារដ្ឋឯករាជ្យពេញលេញមួយ នៅថ្ងៃទី២០ ខែឧសភា ឆ្នាំ២០០២។

ក្នុងរយៈពេលប្រមាណ ២២ឆ្នាំមកនេះ ទំនាក់ទំនងការទូតរវាងប្រទេសទាំង២ គឺបានសម្រេចជាផ្លែផ្កាគួរឱ្យកត់សម្គាល់ ក្នុងនាមជាមិត្តភាពដ៏ល្អ និងកិច្ចសហប្រតិបត្តិការទ្វេភាគី ដែលមានការរីកលូតលាស់ពីមួយឆ្នាំទៅមួយឆ្នាំ។ ជាពិសេស តាំងពីឆ្នាំ២០១១ កម្ពុជាបានប្រកាសគំាទ្របេក្ខភាពទីម័រឡេស្តេ ដើម្បីក្លាយជាសមាជិកអាស៊ាន រហូតដល់ឆ្នាំ២០២២ នៅពេលដែលកម្ពុជាធ្វើជាប្រធានអាស៊ាន ក៏បានប្រកាសទទួលស្គាល់ទីម័រឡេស្តេ ជាសមាជិកអ្នកសង្កេតការណ៍របស់អាស៊ាន ដែលអាចចូលរួមប្រជុំនៅគ្រប់វេទិការបស់អាស៊ាន ហើយកម្ពុជា នៅតែបន្តរក្សាជំហរគាំទ្របេក្ខភាពរបស់ប្រទេសទីម័រឱ្យក្លាយជាសមាជិកពេញសិទ្ធិអាស៊ាន នាពេលខាងមុខ៕
អត្ថបទ៖ ធឿន វ៉ាន់សុង

-
ចរាចរណ៍១ ថ្ងៃ ago
ស្នងការរងខេត្តឧត្ដរមានជ័យម្នាក់ គាំងបេះដូងស្លាប់ពេលបើកបររថយន្ដ រួចជ្រុលបុករថយន្តមួយគ្រឿងទៀត
-
សន្តិសុខសង្គម១ សប្តាហ៍ ago
មនុស្ស៩នាក់ស្លាប់ក្នុងគ្រោះថ្នាក់ចរាចរណ៍នាថ្ងៃទី២នៃពិធីបុណ្យចូលឆ្នាំថ្មី
-
ព័ត៌មានអន្ដរជាតិ៦ ថ្ងៃ ago
ខេត្ត Phuket របស់ថៃរងការវាយប្រហារដោយទឹកជំនន់ភ្លាមៗ ក្រោយមានភ្លៀងធ្លាក់ខ្លាំង
-
ព័ត៌មានអន្ដរជាតិ៦ ថ្ងៃ ago
រុស្ស៊ី បង្ហាញឈ្មោះ៤ប្រទេស ដែលនឹងភ្លក់គ្រាប់របស់ខ្លួនមុនគេ ពេលផ្ទុះសង្គ្រាមធំ
-
សុខភាព២ ថ្ងៃ ago
ដំណឹងល្អ! កម្ពុជានឹងដាក់ឱ្យប្រើប្រាស់ថ្នាំព្រឹបប្រភេទចាក់បង្ការ មុនពេលប្រឈមនឹងការឆ្លងមេរោគអេដស៍ នៅខែឧសភា ខាងមុខ
-
ព័ត៌មានអន្ដរជាតិ៦ ថ្ងៃ ago
ខ្លះៗអំពីរថយន្តដែលលោក ស៊ី ជីនពីង យកពីចិនមកជិះនៅកម្ពុជា
-
ព័ត៌មានអន្ដរជាតិ៤ ថ្ងៃ ago
ត្រាំ ប្រកាសថា អាចនឹងលែងជួយបញ្ចប់សង្គ្រាមរុស្ស៊ី-អ៊ុយក្រែន បើមើលទៅ ពិបាកពេក
-
ព័ត៌មានអន្ដរជាតិ៦ ថ្ងៃ ago
សង្ក្រាន្ត៥ថ្ងៃនៅថៃ គ្រោះថ្នាក់ចរាចរណ៍ សម្លាប់មនុស្ស ១៧១នាក់