សម្ដេច ហ៊ុន សែន ផ្ញើសារអបអរសាទរទីម័រដែលបានក្លាយជាសមាជិកទី១១ផ្លូវការរបស់អាស៊ាន

ប្រទេសទីម័រ​ ត្រូវ​បានប្រកាសទទួលស្គាល់ផ្លូវការជាសមាជិកទី១១ របស់អាស៊ាន នៅ​ថ្ងៃទី២៦ ខែតុលានេះ ក្នុងពិធីបើកកិច្ចប្រជុំកំពូលអាស៊ាន នៅទីក្រុងកូឡាឡាំពួ ដែល​ម៉ាឡេស៊ីធ្វើ​ជាម្ចាស់​​​ផ្ទះ​​សម្រាប់តួនាទី​ប្រធានប្តូរវេន​​។ ជាអ្នកតែងជួយជ្រោមជ្រែង និងគាំទ្រទីម័រឱ្យចូលក្នុងសមាគមប្រជាជាតិ​​អាស៊ីអាគ្នេយ៍​មួយនេះ សម្ដេចតេជោ ហ៊ុន សែន បានផ្ញើសារអបអរសាទរទីម័ររដែលបានក្លាយជាសមាជិកផ្លូវការរបស់អាស៊ាន។

សារលិខិតរបស់សម្ដេចតេជោ ហ៊ុន​ សែន​ ប្រធានព្រឹទ្ធសភាកម្ពុជា ផ្ញើទៅកាន់ទាំងប្រធានាធិបតីរបស់ទីម័រ លោក ចូហ្សេ ម៉ានូអ៊ែល រ៉ាមូស អរតា និងនាយករដ្ឋមន្ត្រី លោក ខៃ រ៉ាឡា សាណាណា គុសម៉ៅ បានសម្ដែងនូវការស្វាគមន៍យ៉ាងកក់ក្តៅបំផុត និងអបអរសាទរចំពោះទីម័រឡេស្តេ ដែលបានចូលជាផ្លូវការជាសមាជិកពេញសិទ្ធិនៃសមាគមអាស៊ាន បន្ទាប់ពីបានរង់ចាំយ៉ាងយូរ។ សម្ដេច ថា នេះជានិមិត្តរូបនៃមោទនភាពសម្រាប់ប្រជាជនទីម័រឡេស្តេទាំងមូល និងជានិមិត្តរូបនៃឯកភាព មជ្ឈភាព និងវប្បធម៌អាស៊ាន។

សាររបស់សម្ដេចតេជោ គូសរំលេចថា ជាមិត្តដ៏យូរឆ្នាំ និងដៃគូមិនងាករេក្នុងដំណើរចាប់តាំងពីការទទួលយកទីម័រឡេស្ដេជាគោលការណ៍ជាសមាជិកទី១១ នៃអាស៊ាន ក្នុងសន្និសីទកំពូលអាស៊ានលើកទី៤០ និង៤១ នៅភ្នំពេញ គឺកម្ពុជាគាំទ្រយ៉ាងពេញទំហឹងចំពោះការចូលរួមជាសមាជិកពេញសិទ្ធិរបស់ទីម័រឡេស្តេ ដែលនឹងពង្រឹងកិច្ចខិតខំប្រឹងប្រែងរួមក្នុងការបង្កើនឯកភាព បរិយាបន្ន និងការអភិវឌ្ឍប្រកបដោយចីរភាពទូទាំងតំបន់ ជាពិសេសក្នុងបរិការណ៍សកលលោកបច្ចុប្បន្នដែលពោរពេញដោយបញ្ហាប្រឈមកាន់តែស្មុគស្មាញ។

បើតាមសម្ដេចតេជោ នៅពេលដែលតំបន់កំពុងប្រឈមនឹងបញ្ហាជាច្រើន ទាំងក្នុងប្រទេស តំបន់ និង អន្តរជាតិ ការចូលរួមសកម្ម និងប្រកបដោយគោលការណ៍របស់ទីម័រឡេស្តេ នឹងរួមចំណែកដ៏មានអត្ថន័យក្នុងការសម្រេចបាននូវចក្ខុវិស័យរួមនៃតំបន់មួយប្រកបដោយសន្តិភាព ភាពធន់ និងវិបុលភាព។

សម្ដេចតេជោ ក៏បានគូសទៅកាន់មេដឹកនាំទីម័រអំពីការទន្ទឹងរង់ចាំធ្វើការសហការយ៉ាងជិតស្និទ្ធជាមួយភាគីទីម័រ ដើម្បីពង្រឹងទំនាក់ទំនងទ្វេភាគី និងលើកកម្ពស់សហគមន៍អាស៊ានឱ្យកាន់តែរីកចម្រើននៅឆ្នាំខាងមុខ។ សម្ដេចតេជោ ជឿជាក់ថា ចំណងមិត្តភាពរវាងប្រទេសកម្ពុជា និងទីម័រ នឹងកាន់តែរឹងមាំ ក្រោមសមាជិកភាពរួមគ្នានៅក្នុងអាស៊ាន៕