ភ្ញៀវទេសចរជាតិ ​និងអន្តរជាតិ​ជិត៣ម៉ឺននាក់ បានទៅលេងកម្សាន្ត និងឆ្លងឆ្នាំសកលនៅខេត្តរតនគិរី

ភ្ញៀវទេសចរជាតិ អន្តរជាតិ និងប្រជាពលរដ្ឋក្នុងខេត្តប្រមាណជិត ៣ម៉ឺននាក់ បានមកចូលរួមកម្សាន្តសប្បាយ និងអបអរទសារបុណ្យឆ្លងឆ្នាំថ្មី ឆ្នាំសកល ២០២៥ នៅក្នុងខេត្តរតនគិរី។ នេះបើតាមការអះអាងឱ្យដឹងរបស់មន្ទីរទេសចរណ៍ខេត្តរតនគិរី។

ក្នុងរយៈពេល ៣ថ្ងៃ នៃបុណ្យចូលឆ្នាំថ្មី ឆ្នាំសកល ដោយគិតចាប់ពីថ្ងៃទីថ្ងៃទី៣០ ខែធ្នូ ឆ្នាំ២០២៤ ដល់ថ្ងៃទី០១ ខែមករា ឆ្នាំ២០២៥ ខេត្តរតនគិរី មានភ្ញៀវទេសចរជាតិ និងអន្តរជាតិមកលេងកម្សាន្តចំនួន ២៧,៧១៨នាក់ កើនឡើង១៦.៤៥% ក្នុងនោះភ្ញៀវទេសចរជាតិ មានចំនួន ១១,២៣៥ នាក់ កើនឡើង៣៤.៣៤% ភ្ញៀវទេសចរអន្តរជាតិ មានចំនួន១៦២ នាក់កើនឡើង១៨៤% និងចំនួនប្រជាពលរដ្ឋក្នុងខេត្តដើរលេងកម្សាន្តក្នុងពិធីឆ្លងឆ្នាំសកលមានចំនួន១៦,៧២៣នាក់ កើនឡើង៦.១០%។

លោក ង៉ែត ពិទូ ជាប្រធានមន្ទីរទេសចរណ៍ ខេត្តរតនគិរី បានឱ្យដឹងថា ខេត្តរតនគិរី បានរៀបចំសេវាកម្មស្នាក់នៅ សេវាកម្មម្ហូបអាហារ និងសេវាកម្មដឹកជញ្ជូនភ្ញៀវ បានល្អ និងទទួលយកបានសម្រាប់ភ្ញៀវទេសចរមកលេងកម្សាន្ត និងអបអរសាទរឱកាសឆ្លងឆ្នាំសកល ឆ្នាំ២០២៥។ ចំណែក តំបន់រមណីយដ្ឋាននានាវិញ មានការគ្រប់គ្រងបរិស្ថាន សណ្តាប់ធ្នាប់ បានល្អប្រសើ ដោយមានរៀបចំណតរថយន្ត និងម៉ូតូឱ្យមានរបៀបរៀបរយ។

លោក ញ៉ែម សំអឿន អភិបាលខេត្តរតនគីរី បានបញ្ជាក់ថា រដ្ឋបាលខេត្តបានយកចិត្តទុកដាក់ខ្ពស់ក្នុងការរៀបចំឱ្យមានសោភ័ណភាពទីប្រជុំជន ទីក្រុង និងតាមបណ្ដាក្រុងស្រុកទាំងអស់ក្នុងខេត្តរតនគិរី ដោយមានការរៀបចំភ្លើងបំភ្លឺតាមទីសាធារណៈ តាមបណ្តាអង្គភាពរបស់រដ្ឋ និងវិស័យឯកជន ដើម្បីលើកស្ទួយសោភ័ណភាពទីក្រុង និងរផ្តល់សេវាកម្មជូនប្រជាពលរដ្ឋក្នុងខេត្ត ក៏ដូចភ្ញៀវទេសចរជាតិ និងអន្តរជាតិ ដែលបានមកទស្សនាខេត្តរតនគិរី។

ទិវាឆ្លងឆ្នាំថ្មីឆ្នាំនេះ ប្រជាពលរដ្ឋក្នុងខេត្តរតនគិរី មានភាពសប្បាយរីករាយ និងសារទរចំពោះរដ្ឋបាលខេត្តរតនគិរី ដែលបានរៀបចំព្រឹត្តិការណ៍ឆ្លងឆ្នាំសកល។ ប្រជាពលរដ្ឋភាគច្រើនក្នុងខេត្ត បានជប់លៀងនៅតាមគេហដ្ឋាន និងជុំវិញមាត់បឹងកន្សែង ដើម្បីអបអរសាទរក្នុងព្រឹត្តិការណ៍ឆ្លងឆ្នាំសកល ២០២៥៕

ដោយ៖ ខៀវ ចាប