ស្អែកនេះ ក្រសួង២ រួមគ្នារៀបចំពិធីលើកកម្ពស់វិស័យទេសចរណ៍ និងប្រយុទ្ធប្រឆាំងព័ត៌មានក្លែងក្លាយ

នៅថ្ងៃទី១៥ ខែមករា ឆ្នាំ២០២៥ ព្រឹកស្អែកនេះ ក្រសួងព័ត៌មាន និងក្រសួងទេសចរណ៍ សហការរៀបចំពិធី «ផ្សព្វផ្សាយការលើកកម្ពស់វិស័យទេសចរណ៍ និងការប្រឆាំងព័ត៌មានក្លែងក្លាយ» ក្រោមអធិបភាពរបស់រដ្ឋមន្ត្រីក្រសួងព័ត៌មាន លោក នេត្រ ភក្ត្រា និងរដ្ឋមន្ត្រីក្រសួងទេសចរណ៍ លោក ហួត ហាក់ នៅទីស្តីការក្រសួងព័ត៌មាន។

បើតាមសេចក្តីជូនដំណឹងរបស់ក្រសួងព័ត៌មាន «ពិធីផ្សព្វផ្សាយការលើកកម្ពស់វិស័យទេសចរណ៍ និងការប្រឆាំងព័ត៌មានក្លែងក្លាយ» មានគោលបំណងផ្សព្វផ្សាយឱ្យកាន់តែទូលំទូលាយដល់អ្នកសារព័ត៌មាន ពីវិស័យទេសចរណ៍កម្ពុជា និងផែនការប្រែក្លាយកម្ពុជាជាគោលដៅទេសចរណ៍ដ៏មានភាពទាក់ទាញ សម្បូរបែប កក់ក្តៅ ស្នាមញញឹម ផាសុខភាព និងសុវត្ថិភាព ដើម្បីបន្តរួមចំណែកដល់កំណើនសេដ្ឋកិច្ចជាតិ។

បន្ថែមពីនេះ កម្មវីធីនេះ​ក៏ធ្វើឡើងស្របពេលដែលកម្ពុជា និងពិភពលោកកំពុងប្រឆាំងនឹងព័ត៌មានក្លែងក្លាយ ដែលកំពុងបង្កឱ្យមានការយល់ច្រឡំ និងផ្តល់ផលប៉ះពាល់លើវិស័យមួយចំនួន រួមទាំងវិស័យទេសចរណ៍ផងដែរ៕