ព័ត៌មានជាតិ

សមាជិក ប.ស.ស ចូលនិវត្តន៍ទទួលមរណភាពប្តី ឬ ប្រពន្ធ និង កូន នឹងទទួលបានប្រាក់សោធនឧត្តរជីវីពី ប.ស.ស

បានផុស

២ years មុន

នៅ

ថ្ងៃពុធ ១៥ មករា ២០២៥

ដោយ

បេឡាជាតិសន្តិសុខសង្គម(ប.ស.ស) នៃក្រសួងការងារ និងបណ្ដុះបណ្ដាលវិជ្ជាជីវៈ បានឱ្យដឹងថា ក្នុងករណីអ្នកចូលនិវត្តន៍ ឬ ទុព្វលភាព ឬ សមាជិក ប.ស.ស បានបង់ភាគទានយ៉ាងតិច ៦០ ខែ បានទទួលមរណភាព ប្ដី ឬ ប្រពន្ធ និង កូន ក្នុងបន្ទុកនោះ នឹងទទួលបានប្រាក់សោធនឧត្តរជីវីពី ប.ស.ស។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ប.ស.ស បានបញ្ជាក់ថា ប៉ុន្តែមុននឹងទទួលបានប្រាក់សោធនឧត្តរជីវី ពី ប.ស.ស លុះត្រាតែ ប្ដី ឬ ប្រពន្ធ មានសំបុត្រអាពាហ៍ពិពាហ៍ និងគ្មានប្រាក់ចំណូល កូន មានអាយុមិនលើស ១៨ ឆ្នាំ គ្មានចំណូល និងមិនទាន់រៀបអាពាហ៍ពិពាហ៍ និងបើកូនមានជំងឺរ៉ាំរ៉ៃ ឬ ពិការ ដែលមិនអាចរកចំណូលបាន ផ្ដល់ជូនមួយជីវិត។ សម្រាប់ព័ត៌មានបន្ថែម សូមទំនាក់ទំនងមកកាន់លេខ ១២៩៧ ឬ ១២៨៦ ឬ តាមរយៈប្រព័ន្ធផ្សព្វផ្សាយបណ្ដាញសង្គម។

លោក កត្តា អ៊ន រដ្ឋលេខាធិការ និងជាអ្នកនាំពាក្យក្រសួងការងារ និងបណ្ដុះបណ្ដាលវិជ្ជាជីវៈ បានមានប្រសាសន៍ថា គិតត្រឹមថ្ងៃទី ២៥ ខែធ្នូ ឆ្នាំ ២០២៤ បេឡាជាតិសន្តិសុខសង្គម(ប.ស.ស) មានសមាជិកកើនឡើងដល់ ២ ៧០៥ ៩១៩ នាក់ នៅទូទាំងប្រទេស ដែលបង្ហាញយ៉ាងច្បាស់ថា ប្រជាពលរដ្ឋកាន់តែជឿទុកចិត្ត និងយល់ដឹងច្បាស់ពីអត្ថប្រយោជន៍ នៃ ប.ស.ស។

លោកបានបន្តថា ចំណោម សមាជិក ប.ស.ស ជាង ២ លាន ៧ សែននាក់ ក្នុងនោះ សមាជិក ប.ស.ស ផ្នែកថែទាំសុខភាពលើវិស័យសាធារណៈមានចំនួន ៥០៤ ៧៩៦ នាក់ សមាជិក ប.ស.ស វិស័យឯកជនចំនួន ១ ៥៦៩ ២៣២ នាក់ សមាជិក ប.ស.ស ជាបុគ្គលស្វ័យនិយោជន៍ចំនួន ៤៨១ ២២០ នាក់ និង សមាជិក ប.ស.ស ជាអ្នកក្នុងបន្ទុកសមាជិក ប.ស.ស (សហព័ទ្ធ និងកូន) ចំនួន ១៥០ ៦៧១ នាក់៕

អត្ថបទ ៖ សំអឿន