មន្ត្រី​អភិរក្ស​សត្វ​ព្រៃ​នៅ​ ស្រុកសៀមប៉ាង តាម​បង្ក្រាប​ជន​សង្ស័យដាក់អន្ទាក់សត្វព្រៃ

មន្ត្រីអភិរក្សសត្វព្រៃ​នៅ​ស្រុកសៀមប៉ាងសហការជាមួយសមត្ថកិច្ចពាក់ព័ន្ធ ចុះ​ល្បាតក្នុងតំបន់អភិរក្ស ប្រមូលអន្ទាក់ និងសត្វជ្រូកព្រៃដុតបំផ្លាញចោល ដើម្បីដាស់ស្មារតីដល់ជនសង្ស័យឱ្យឈប់ប្រព្រឹត្តបទល្មើស ហើយនាំគ្នាងាកមកស្រឡាញ់និងឈប់បរិភោគសត្វព្រៃទាំងអស់គ្នា។

ក្នុង​សកម្មភាព​ចុះ​ល្បាត​នៅ​ក្នុង​តំបន់​អភិរក្សសត្វព្រៃ​នៅ​ក្នុង​ភូមិសាស្ត្រភូមិ​ខាំភោគ ឃុំព្រែកមាស ស្រុកសៀមប៉ាង ខេត្តស្ទឹងត្រែង  កាលពីថ្ងៃទី១៤-១៥-១៦ ខែមករា ឆ្នាំ២០២៥ លោក សុខ ឃឿន នាយកដែនអភិរក្សសត្វព្រៃសៀមប៉ាង បាន​បញ្ជាក់​បន្ត​ថា នៅ​ក្នុង​តំបន់​អភិរក្ស​សត្វ​ស្លាប​សៀមប៉ាង មន្ត្រីអភិរក្សបានចុះល្បាតរៀងរាល់សប្តាហ៍ដើម្បីពិនិត្យមើលវត្តមានសត្វស្លាប-សត្វចតុបាត និង តាមដានជនសង្ស័យដែលលួចដាក់អន្ទាក់សត្វព្រៃ និងប្រមួល​យក​មក​រក្សាទុក​ដើម្បី​ដុត​បំផ្លាញ​ចោល​នៅ​ពេលណាមួយ។

លោកបន្តថា នៅសប្តាហ៍ទី២ ខែមករានេះ មន្ត្រីអភិរក្សប្រមូលបានអន្ទាក់សត្វ ដែលជនសង្ស័យ​លួច​ដាក់​ក្នុងព្រៃបានជាង១០០អន្ទាក់ និង​បាន​តាម​ប្រមាញ់​ជន​សង្ស័យ​ ដែលសម្លាប់សត្វជ្រូកព្រៃ ហើយរត់ចោលបន្សល់ទុកសត្វជ្រូកព្រៃ​មួយ​ក្បាល​មាន​ទម្ងន់​ប្រមាណ​ជាង៣០គីឡូក្រាម ហើយ​មន្ត្រី​យើង​យក​មក​ដុត​បំផ្លាញចោល​នៅ​នឹងកន្លែងតែម្តង។

លោក ឌី សុធា ប្រជាពលរដ្ឋ​រស់នៅភូមិ ឃុំព្រែកមាស ស្រុកសៀមប៉ាង បានបញ្ចាក់ថា សកម្មភាពនេះ បានបង្ហាញពីការរួមគ្នាអភិរក្សពពួកសត្វព្រៃឱ្យរស់នៅគង់វង់ ព្រោះនៅតំបន់ព្រៃអភិរក្សសៀមប៉ាងមានពពួកសត្វព្រៃកំពុងរស់នៅច្រើនដូច ជាជ្រូកព្រៃ ប្រើស ក្តាន់ ខ្ទីង ទន្សោង ទន្សាយ ខ្លាឃ្មុំ ស្វាធំ តូច និងសម្បូរសត្វស្លាប់ច្រើនរយប្រភេទទៀត។

លោកគាំទ្រ​ការ​បង្ក្រាប់បទល្មើសនេះ ព្រោះ​បាន​លើកកម្ពស់​ការ​ការពារ​ធនធាន​ជីវចម្រុះ​ផង​ការ​ពារ​ព្រៃ​និង​ដើមឈើធម្មជាតិធំៗ  ដែល​ជា របស់​យើង​ទាំងអស់គ្នា ព្រោះធនធានទាំងនេះ នៅ​សេសសល់​តិចតួច​តែប៉ុណ្ណោះ។

សូម​បញ្ជាក់​ថា នៅ​ក្នុង​ភូមិសាស្ត្រ ដែន​ជម្រក​សត្វព្រៃ​សៀមប៉ាង  ស្រុកសៀមប៉ាង ខេត្តស្ទឹងត្រែង មានប៉ែកខាងកើតនៅក្នុងឃុំសន្តិភាព និង ឃុំសេកុង មាន​ផ្ទៃដី​លាត​សន្ធឹង​ជាប់​ទៅ​ទឹក​ដី​ខេត្តរតនគីរី និងប៉ែកខាងលិចនេះ នៅក្នុងឃុំព្រែកមាស មានផ្ទៃដីលាតសន្ធឹងជាប់ទៅនឹងទឹកដីនៃប្រទេសឡាវ សម្បូរសត្វព្រៃរស់នៅគ្រប់ប្រភេទផងដែរ៕

ដោយ ៖ ហុង វិនជូ