ព័ត៌មានជាតិ

គ្រួសារជនរងគ្រោះស្លាប់ដោយជំងឺកូវីដនៅបឹងសាឡាងបានទទួលអំណោយ ពីសម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន

បានផុស

៥ years មុន

នៅ

ថ្ងៃសុក្រ ១៩ មីនា ២០២១

ដោយ

ភ្នំពេញ ៖ លោក ឯក ឃុនដឿន អភិបាលខណ្ឌទួលគោក នាយប់ថ្ងៃទី ១៩ ខែមីនា ឆ្នាំ២០២១នេះ បាន នាំយកអំណោយ ជាថវិកានិងគ្រឿងឧបភោគបរិភោគរបស់សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន ជូនគ្រួសារសពលោក អនុសេនីយ៍ត្រី គឹម ឃីស៊ុន ដែលបានទទួលមរណភាពដោយជំងឺកូវីដ-១៩ កាលពីប៉ុន្មានម៉ោងមុននេះ នៅបឹងសាឡាង ខណ្ឌទួលគោក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មន្ត្រីរដ្ឋបាលខណ្ឌទួលគោកបានឲ្យដឹងថា លោក ឯក ឃុនដឿន អភិបាលខណ្ឌទួលគោក នៅយប់ថ្ងៃទី១៩ មីនានេះបានដឹកនាំក្រុមការងារ ចុះសួរសុខទុក្ខគ្រួសារសព លោក អនុសេនីយ៍ត្រី គឹម ឃីស៊ុន ស្ថិតនៅផ្ទះលេខ១៥ ផ្លូវ២៥៥ សង្កាត់បឹងសាឡាង ខណ្ឌទួលគោក រាជធានីភ្នំពេញ ដែលបានទទួលមរណភាពដោយជំងឺកូវីដ-១៩ និងបាននាំយកអំណោយរបស់ សម្ដេចកិត្ដិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហមកម្ពុជា ដែលរួមមាន ថវិកាចំនួន ៥.០០០.០០០ រៀល អង្ករ ១៥០គីឡូក្រាម មី ៣កេស ទឹកត្រី ៣យួរ ទឹកស៊ីអ៊ីវ ៣យួរ ទឹកសុទ្ធ ៣កេស និងគ្រឿងឧបភោគបរិភោគ និងបានណែនាំឲ្យបន្តគោរពតាមការណែនាំរបស់ក្រសួងសុខាភិបាល។

ពាក់ព័ន្ធនិងករណីស្លាប់របស់លោក អនុសេនីយ៍ត្រី គឹម ឃីស៊ុននេះ បើតាមការបញ្ជាក់ពីលោកស្រី វេជ្ជបណ្ឌិត យក់ សម្បត្តិ រដ្ឋលេខាធិការក្រសួងសុខាភិបាលបានឲ្យដឹងថា មានបុរសជនជាតិខ្មែរ ឈ្មោះ គឹម ឃីស៊ុន (Koem khisun) អាយុ៤៦ឆ្នាំ ពិតជាបានស្លាប់ដោយជំងឺកូវីដ-១៩ ដោយមិនមានជំងឺគួបផ្សំនោះទេ។

បុរសរូបនេះ ត្រូវបានរកឃើញវិជ្ជមានកូវីដ-១៩ កាលពីថ្ងៃ១០ ខែមីនា ឆ្នាំ២០២១។ គាត់មានអាការរលាកសួតសងខាងធ្ងន់ធ្ងរ និងស្ថិតក្នុងការប្រើម៉ាស៊ីនជំនួយដង្ហើម VNI នៅថ្ងៃទី១២ ខែមីនា ហើយបានស្លាប់នៅម៉ោង ៣និង៣០ នាទីល្ងាចថ្ងៃទី ១៩ ខែមីនានេះ ដោយខ្សោយសួតខ្លាំង ដែលបណ្តាលមកពីជំងឺកូវីដ-១៩ វ៉ៃលុក។

នេះគឺជាករណីស្លាប់ទី៣ ហើយបន្ទាប់ពីករណីទី២ ជាម្តាយរបស់តារាចម្រៀងវីដាណែតដែលបានស្លាប់នៅម៉ោង ១១និង៤៥ នាទីព្រឹកនេះនៅមន្ទីរពេទ្យមិត្តភាពខ្មែរសូវៀត៕

ដោយ ៖ ស្រីរ័ត្ន