អភិបាលខេត្តស្វាយរៀង ជំរុញឱ្យអាជ្ញាធរបន្តបង្ក្រាបក្មេងទំនើង គ្រឿងញៀនឱ្យបានល្អ គ្មានករណីលើកលែងឡើយ

លោក ប៉េង ពោធិ៍សា អភិបាលខេត្តស្វាយរៀង បានដាក់ចេញទិសដៅសំខាន់ៗ ៦ចំណុច ក្នុងនោះ លោកបានជំរុញឱ្យអាជ្ញាធរ កងកម្លាំងមានសមត្ថកិច្ចត្រូវយកចិត្តទុកដាក់ទៅលើសន្តិសុខសណ្តាប់នៅក្នុងមូលដ្ឋានរបស់ខ្លួនឱ្យបានល្អប្រសើរ និងបន្តបង្ក្រាបករណីក្មេងទំនើងដែលចេញអុកឡុងសង្គមឱ្យបានខ្ជាប់ខ្ជួន បញ្ហាគ្រឿងញៀន ដោយគ្មានករណីលើកលែងឡើយ។

ការដាក់ទិសដៅនេះ ធ្វើនៅថ្ងៃទី២៥ ខែកុម្ភៈ ឆ្នាំ២០២៥ ក្នុងកិច្ចប្រជុំបូកសរុបលទ្ធផលការងារប្រចាំខែកុម្ភៈ និងលើកទិសដៅការងារខែមីនា ឆ្នាំ២០២៥ របស់រដ្ឋបាលខេត្តស្វាយរៀង។ ជាមួយគ្នានេះ បន្ទាប់ពីមានប្រសាសន៍ស្វាគមន៍ និងប្រគល់ថវិកាជ័យលាភីក្នុងការអនុវត្តភូមិ/ឃុំមានសុវត្ថិភាព ដល់លោកអភិបាលក្រុងស្រុកទាំង៨ លោកអភិបាលខេត្តបានដាក់ចេញនៅទិសដៅសំខាន់ៗ ៦ចំណុច ដូច ទី១ អាជ្ញាធរ កងកម្លាំងមានសមត្ថកិច្ចត្រូវយកចិត្តទុកដាក់ទៅលើសន្តិសុខសណ្តាប់នៅក្នុងមូលដ្ឋានរបស់ខ្លួនឱ្យបានល្អប្រសើរ។ ទី២ អាជ្ញាធរក្រុង ស្រុក មន្ទីរអង្គភាពទាំងអស់ត្រូវយកចិត្តទុកដាក់លើបញ្ហាអនាម័យបរិស្ថាននៅតាមទីប្រជុំជននានា ជាពិសេសស្រុក ក្រុង ដែលនៅជាប់បណ្តោយផ្លូវជាតតិលេខ១ ត្រូវពិនិត្យ និងសម្អាតឱ្យបានស្អាត និងបន្តផ្សព្វផ្សាយដល់ប្រជាពលរដ្ឋទុកដាក់សំរាម ឱ្យបានត្រឹមត្រូវ។

ទិសដៅទី៣ អាជ្ញាធរក្រុង-ស្រុក និងកងកម្លាំងគ្រប់មូលដ្ឋានទាំងអស់ បន្តយកចិត្តទុកដាក់លើការបង្ក្រាបក្មេងទំនើងដែលបង្កការអុកឡុកប៉ះពាល់ដល់សណ្តាប់ធ្នាប់ និងរបៀបរៀបរយក្នុងសង្គមមិនត្រូវលើកលែងឡើយ។ ទី៤ អាជ្ញាធរគ្រប់លំដាប់ថ្នាក់ ត្រូវពង្រឹងការទប់ស្កាត់ការជួញដូរចែកចាយ និងប្រើប្រាស់គ្រឿងញៀននៅតាមមូលដ្ឋានឲ្យបានម៉ឺងម៉ាត់។ ទី៥ បន្តការផ្សព្វផ្សាយច្បាប់ចរាចរណ៍ផ្លូវគោក និងរឹតបន្តឹងការអនុវត្តច្បាប់ ជាពិសេសជំរុញការពាក់មួកសុវត្ថិភាពឲ្យបានត្រឹមត្រូវ។ ទី៦ មន្ទីរការងារ រួមទាំងរដ្ឋបាលក្រុង-ស្រុក និងអាជ្ញាធរមូលដ្ឋានត្រូវយកចិត្តទុកដាក់បន្តការផ្សព្វផ្សាយទៅដល់ប្រជាពលរដ្ឋដែលកំពុងស្វែងរកការងារធ្វើ ដើម្បីចុះឈ្មោះចូលបម្រើការងារនៅតាមតំបន់រោងចក្រនានាក្នុងខេត្តដែលកំពុងមានតម្រូវការកម្លាំងពលកម្ម។

ជាចុងបញ្ចប់នៃកិច្ចប្រជុំនេះដែរ អភិបាលខេត្តស្វាយរៀង បានអនុញ្ញាតឲ្យមានការលើកឡើងនូវបញ្ហាប្រឈមផ្សេងៗ និងចំណុចវិជ្ចមានមួយចំនួនទៅលើការអនុវត្តការងាររបស់មន្ទីរអង្គភាពនានាដែលពាក់ព័ន្ធ។ ជាពិសេស លោក ប៉េង ពោធិ៍សា បានប្រគល់ថវិការដែលអនុវត្ត គោលការណ៍ភូមិ-ឃុំមានសុវត្ថិភាពបានល្អជូនដល់ក្រុង-ស្រុកទាំង៨ ក្នុងខេត្តស្វាយរៀងផងដែរ៕

ដោយ៖ ភក្ដី