អាកាសធាតុខេត្តរតនគិរី ឡើងកម្ដៅដល់៣៧ °C ក្ដៅជាងម្សិលមិញ

តាមការព្យាករណ៍អាកាសធាតុ របស់មន្ទីរធនធានទឹកនិងឧតុនិយម ខេត្តរតនគិរី នៅព្រឹកថ្ងៃទី ០៥ ខែ មីនា ឆ្នាំ ២០២៥ បានឲ្យដឹងថា ស្ថានភាពធាតុអាកាសខេត្តរតនគិរី ទទួលឥទ្ធិពល ពីទ្រនុងសម្ពាធខ្ពស់ បណ្តាលឱ្យសីតុណ្ហភាពប្រែប្រួលពី ២៤°C ទៅ ៣៧°C និងមានខ្យល់បក់ ប្រែប្រួលទិស និងមានល្បឿន ២ ទៅ ៥ ម៉ែត្រ/វិនាទី។

អាកាសធាតុបែបនេះធ្វើឲ្យ ផ្ទៃមេឃស្រទុំឃើញពន្លឺព្រះអាទិត្យតិចតួច ដែលបណ្តាលមកពីមានពពកច្រើននៅចាប់ពីម៉ោង ៥ៈ០០ ព្រឹក ដល់ម៉ោង ១១ៈ០០ ព្រឹក លុះរសៀលទើបមានអាកាសធាតុធម្មតា។ ការប្រែប្រួលអាកាសធាតុបែបនេះ ចាប់ពីថ្ងៃចាប់ពីថ្ងៃ ០៥ ខែ មីនា ឆ្នាំ ២០២៥ ដល់ថ្ងៃ ០៧ ខែ មីនា ឆ្នាំ២០២៥ ។

កាលពីថ្ងៃម្សិលមិញនៅខេត្តរតនគិរីផ្ទៃមេឃស្រទុំនៅពេលព្រឹក ប៉ុន្តែនៅថ្ងៃរសៀលចាប់ផ្ដើមកើនកម្តៅដល់ ៣៦ °C ប៉ុន្តែនៅថ្ងៃនេះមានកម្រិតកម្តៅ ៣៧ °C ស្ថានភាពបែបនេះបន្ត អូសបន្លាយរហូតដល់ ៣ ថ្ងៃជាប់ៗ ។

 ការប្រែប្រួលអាកាសធាតុបែបនេះ អាជ្ញាធរអំពាវនាវប្រជាពលរដ្ឋយកចិត្តទុក ដាក់រក្សាសុខភាព ដោយផឹកទឹកឆ្អិន ហូបអាហារបានចម្អិនល្អ ដើម្បីគេចផុតពីជម្ងឺផ្សេងៗ ហើយត្រូវប្រើប្រាស់ទឹកសន្សំសំចៃ និងទុកដាក់ទឹកនៅទីកន្លែងសុវត្ថិភាព ដោយត្រឹមត្រូវ ៕

អត្ថបទ៖ ខៀវ ចាប