លោក អ៊ុន ចាន់ដា អំពាវនាវប្រជាកសិករកុំនាំគ្នាធ្វើស្រែប្រាំងក្នុងពេលនេះ ព្រោះអាចប្រឈមខ្វះទឹកដាក់ស្រែ

អភិបាលខេត្តកំពង់ចាម លោក អ៊ុន ចាន់ដា អំពាវនាវ ដល់ប្រជាកសិករ ដែលនៅឆ្ងាយពីប្រភពទឹក ហើយធ្វើស្រែពឹងផ្អែកពីទឹកភ្លៀង សុំកុំនាំគ្នាធ្វើស្រែប្រាំងក្នុងខណៈពេលនេះ ព្រោះអាចប្រឈមខ្វះទឹកដាក់ស្រែ បណ្តាលឱ្យស្រូវស្កកឬខូចទៅវិញ។ លោកបានលើកឡើងបែបនេះ ក្នុងកិច្ចប្រជុំសាមញ្ញលើកទី១០ អាណត្តិទី៤ របស់ក្រុមប្រឹក្សាខេត្ត នាថ្ងៃទី១៤ ខែមីនា ឆ្នាំ២០២៥។

លោកអភិបាលខេត្ត បានមានប្រសាសន៍ថា សម្រាប់ការធ្វើស្រែប្រាំងរបស់ប្រជាកសិករដែលនៅជិតប្រភពទឹកគ្រប់គ្រាន់ អាជ្ញាធរពុំមានការហាមឃាត់នោះទេ មានតែលើកទឹកចិត្តដល់ប្រជាកសិករឱ្យស្រែប្រាំង ២ដងទៅ ៣ដង តាមលទ្ធភាព និងទៅតាមស្ថានភាពជាក់ស្តែងនៃប្រភពនៅទីនោះ។ ប៉ុន្តែ អាជ្ញាធរ សូមលើកទឹកចិត្ត និងអំពាវនាវ ដល់ប្រជាកសិករ ដែលនៅឆ្ងាយពីប្រភពទឹក ដែលធ្វើស្រែពឹងផ្អែកពីទឹកភ្លៀង សុំកុំនាំគ្នាធ្វើស្រែប្រាំងក្នុងខណៈពេលនេះ ព្រោះអាចប្រឈមខ្វះទឹកដាក់ស្រែ បណ្តាលឱ្យស្រូវស្កកឬខូចទៅវិញ។ លោកថា ការធ្វើស្រែប្រាំងក្នុងពេលនេះប្រឈមការខ្វះខាតទឹកចំពោះអ្នកនៅឆ្ងាយពីប្រភពទឹក ជាហេតុធ្វើឱ្យស្រូវស្កក ពិបាកក្នុងការដោះស្រាយទឹកដាក់ស្រែជូនប្រជាកសិករ ដើម្បីការពារកុំឱ្យប្រជាកសិករខាតបង់ថវិកា និងកម្លាំងពលកម្ម។

បន្ថែមពីនេះ លោកក៏បានជំរុញទៅដល់មន្ទីរកសិកម្ម សហការជាមួយមន្ទីរពាណិជ្ជកម្ម ស្វែងរកដៃគូសហការ ព្រមទាំងសហគ្រាសរោងចក្រកិនស្រូវ ចុះប្រមូលទិញស្រូវរបស់ប្រជាកសិករដែលពួកគាត់ផលិតបាន ដើម្បីចូលរួមលើកកម្ពស់ជីវភាពរបស់ប្រជាពលរដ្ឋឱ្យកាន់តែធូរធារ ហើយឱ្យពួកគាត់មានកម្លាំងចិត្តក្នុងការធ្វើស្រែបន្តទៅទៀត៕